Da 'eetec da qañi'iguelaxat qataq da qaichoxoren na Israel le'ecpi
1Qaq qom mashe qami' nvitalo 'enauac de'era qami' sa'aqtaxaatapeguema, nchoxonnaxataxanaxac qataq da qauem maye qami' sanema da qalca'aigui, qataq qauennataxañi qom qoviita'a ca na'alhua na ỹotta'a't shiỹaxauapi maye qami' ỹo'ora'alo Ñim Nataxala' maye Qanatamnaxala'ai, 2qaq qom qavi'iguelaqaiỹa Ñim Nataxala', qataq da qaumachiỹo'ot da qarquiyaqteỹaxaqui qataq da qanachaalataxaqui, qataq da qaualaqaiguet qataq na qaỹa'alquipi 'enauac ne'ena qami' samaxaleguete nagui, 3nache Ñim Nataxala' maye Qanatamnaxala'ai qaltaq ỹe'eguelaxa qome da qami' ichoxore'n, qataq qami' laỹona't, nache qami' ñe'eguelaxa't qami' ỹachegoxotchiguiñalo ca na'alhua ca ỹotta'a't shiỹaxauapi maye qami' ỹo'ora'alo co'ollaxa Ñimaye. 4Qaq na'aictaxa da ỹataqta qaỹoqta ca qoñiitaña ana 'alhua, qalaxaye ñaqaiyeta qome Ñim Nataxala' maye Qanatamnaxala'ai, qami' ñe'eguelaxa't qome da yaqto' qami' laỹona't. 5Nache Ñim Nataxala' qami' ñe'eguelaxatalo qome ca 'alhua maye lalamaxat co'ollaxa so hua'au qarta'ailpi, da yaqto' qaltaq qaralamaxache. Nache qami' ỹanema da lchoxonnataxanaxa, qataq qalota naqa'en ca qaỹa'alquipi, napacalec na llalaqpi so hua'au qarta'ailpi. 6Qataq Ñim Nataxala' nqateua'a qome na qauemsat naua qarquiyaqchilli', nataqa'en cam qami' chegoxogueta yaqto' da qarquiyaqteỹaxaqui qataq da qanachaalataxaqui ỹataqta ỹauotec Ñim Nataxala' maye Qanatamnaxala'ai, yaqto' nache 'eetai' da qarca'alletauec. 7Qataq Ñim Nataxala' maye Qanatamnaxala'ai, namaxa qome 'enauac da qauem na qampa'aguenaxauaipi, qataq nam qami' icaata'ape souaxat da qami' nquiỹategalo. 8Nache qami' qavi'iguelaqỹa da ỹataqta qaualaqaiguet Ñim Nataxala', nache qauo'oche na lamaxasoxonaxacpi maye qami' samaxaleguete nagui. 9Qaq huaña qome nache Ñim Nataxala' maye Qanatamnaxala'ai, ỹataqta no'on naqa'en 'enauac cam qauo'oche, qataq no'on naqa'en da qarco'oxoqui qataq da lco'oxoc ca qareloipi, qataq no'on naqa'en na ala ca qorañiguishiqui. Nache Ñim Nataxala' machiguiñi qome da qaltaq qami' ỹo'oteque ca no'on qanaỹamaxataxaqui, 'eeta'am co'ollaq ỹo'otec da no'on naỹamaxataxac so hua'au qarta'ailpi, 10qaq da ỹoqta qaualaqaiguet Ñim Nataxala' maye Qanatamnaxala'ai, qataq qaupaquiitelec da qauo'oche na lamaxasoxonaxacpi, qataq na nanettalec ana lmalate da napaxaguenataxanaxac, qataq ỹataqta qaumachiỹo'ot da qarquiyaqteỹaxaqui, qataq da qanachaalataxaqui.
11Nache ne'ena namaxasoxonaxacpi maye qami' sanema nagui, namayepi saishet da ỹapac qalaqaic qataq saishet qaỹoqtaique. 12Qataq saishet da hueta'ague da piguem da huo'otaq qoñiita' ca qara'aqtaqui: ¿Negue'tom ca ishet da tasheguema na piguem da yaqto' qomi' nda'alo da yaqto' saỹatenaq, qataq da salaxasoxoguet de'era napaxaguenataxanaxac? 13Qataq saishet da hueta'atague da le'ego aca auaxai da huo'otaq qoñiita' ca qara'aqtaqui: ¿Negue'tom ca ishet da ỹa'axasoxoolec aca auaxai da ỹe'eguena'ata da qomi' ndo'otalo da yaqto' saỹatenaq qataq salaxasoxoguet de'era napaxaguenataxanaxac? 14Cha'aye de'era namaxasoxonaxac, damaye saqaỹapeque da qoñiita, cha'aye damaye mashe huetaiguilo naua qa'apilli' qataq naua qarquiyaqchilli' da yaqto' qaualaqaiguet.
15Qaq nagui qami' sanema da qalca'aiua'a da achaalataxac qataq da no'on, huo'otaq da nleuaxa qataq da qauem. 16Ỹoqo'oye qami' samaxaleguete nagui da qauauochec qome Ñim Nataxala' maye Qanatamnaxala'ai, qataq qoquiitegue da lataxac da llecỹaxac, qataq qauo'oche na lamaxasoxonaxacpi, qataq na lapaxañi lataxacpi, qataq na lqataxacpi. Yaqto' qanca'alleetauec qome qataq qami' nquictrauec, nache Ñim Nataxala' maye Qanatamnaxala'ai, qami' ỹanema da lchoxonnataxanaxa qom qaunoxoñiiua'a ye 'alhua maye qaralamaxache qome. 17Qalaxaye qom saishet da qaualaqaiguet 'enauac ne'ena, qom nacherata da qanqo'oñiỹa ca ỹaqa'a atamnaxala'pi da qaua'ayiỹoto naua qarllectelli' da qanatamñiitacot, 18qaq qami' sa'aqtaxaatema nagui da qaullivi qome, qataq saishet da qaỹoqtec da qoñiitalec yi'iye 'alhua qom ime da qaua'axasoxoñiilec so tala Jordán. 19Qaq nagui ỹauaachigui ñaqa'en na piguem qataq ana 'alhua da qami' sanema da qalca'aiua'a da nca'alaxa huo'otaq da nleuaxa, da no'on huo'otaq da qauem. Qaq no'on qome da qalca'aiua'a da nca'alaxa, yaqto' qanca'alliitauec qome, qataq ca qami' chegoxogueta, 20qataq qauauochec qome Ñim Nataxala' maye Qanatamnaxala'ai, qataq ỹataqta qaualaqaiguet, cha'aye nacheñi Ñim chegoqchigui da qanachaalataxaqui, qataq da qaỹoqtec qome naqa'en da qoñiitalec ye 'alhua maye ỹachaxanapecot co'ollaxa da ỹanem soua hua'au' qarta'alli', Abraham, Isaac qataq Jacob.
