Eclesiastés 2

₁Qaq huaña nache aỹem seuennataxaatac nache, sheeta': «Nagui she'eguen da so'ot nam na'ashaxacpi yaqto' sootaigui da no'on achaalataxac.» ¡Qalaxaye nataqa'en damaye qaica ca naigui! ₂Huaña nache saỹaten dam naỹalliguiyec da chochaq 'oopashec, qataq dam na'ashaxac ỹataqta qaica ca naigui.

₃Qataq so'ogoxona da ñetoonaxac qataq da ỹaỹaanec da she'eguen da lamaicỹaxac na lataxa, qataq ỹataqta ñañaneguet namaye da yaqto' saỹaten da nachera dam ỹaỹamaqchiguiñi da ỹo'ottac ca ỹale da ñaq huo'o da nachaalataxac da netalec ana 'alhua.

₄Qataq so'ot co'ollaxa na lta'araic no'onatacpi, qataq ño'oxoosheguem so lta'araic ima', qataq huo'o so ỹalamaxat ỹanaxanqa' uva lma'pi. ₅Qataq so'o't soua ỹalamaqa'ate ỹanaxanqa'ate, nache saaleguete soomaye ana ỹotta'a't qo'oipaqpi maye huo'o ana ala. ₆Qataq so'ot aso late'erai laỹe' na 'etaxat da yaqto' secottalec asom qo'oipaqpi maye ñaxattalec somaye, ₇qataq sesheenaxana so ilatacpi qataq aso ilatapi, qataq huo'o nataqa'en so ilatacpi lañoqo' ye ima', qataq nataqa'en nquictauec aso ilo huacapi qataq aso qaguetapi, nache ñapacalec som hua'au nta'alpi ye Jerusalén. ₈Qataq ỹataqta qalota so ỹapoñiguishec na lcat plata qataq na oro, nsallaxa maye lalamaxat co'ollaxa som laỹepi nta'alpi maye hueta'alo naua lỹa't 'aleu'. Qataq huo'o so ỹo'onaxanaxanecpi, qataq aso ỹo'onaxanaxanapi, qataq ñauane' 'enauac nam ỹo'ot da lamaicỹaxac cam shiỹaxaua, qataq ỹataqta qalota aso ihuapi. ₉Aỹem sevira'a da ỹataqta aỹem 'amaqtaqaic, qataq qalota som ỹogoxoshetpi, ñapacalec som hua'au nta'alpi ye Jerusalén, qaq nataqa'en dam naỹaanec saishet da aỹem ca'ai. ₁₀Qaq saỹauano' da saq so'ot nam ñeqopittegapi, qataq qaica ca na'ashaxac ca saq so'ot. Qaq ỹo'ot da lamaicỹaxac da iquiyaqteỹaxac 'enauac nam so'otpi co'ollaxa, qaq de'era ỹamaicỹaxac, nachera dam ñesheetenaguec. ₁₁Qaq ime, nache semeteetac 'enauac nam ỹo'onatacpi, qataq nam huo'o da lqalaic co'ollaq so'ottac, nache sela'a da 'enauac namayepi da qaica ca naigui, 'eeta'am da 'eetec da huotaique da qanllañi na la'at, qataq qaica ca qaỹachegoxotaigui damaye, ana'ana 'alhua.

₁₂Qaq ime, nache qaltaq seuennataxaalec dam naỹaanec, qataq dam 'oopashec qataq da qaica ca qaỹaỹaanapec, qaq ¿negue't cam ishet da ỹo'ot cam dalaxaic nta'a maye aỹem nca'atalec qome? Ye nam huo'o mashe nache 'eetai' da qaỹo'ot co'ollaxa. ₁₃Qaq huaña, nache sela'a da ỹataqta huo'o da qaỹachegoxotaigui da naỹaanec, qaq saq 'ena'am da qaica ca qaỹaỹaanapec, 'eeta'am nam yo'oqchiguiñi da huo'o na qaỹachegoxotaigui, qaq saq 'ena'am na napalaxa.

₁₅Qaq huaña, nache sheeta': «Dam taỹa'aguet cam qaica ca ỹaỹaanapec, nataqa'en aỹem saỹa'aguet, qaq ỹoqo'oye ỹataqta qaica ca naigui dam qalota ỹaỹaanec. ¡Qaq ivira'a damaye da ỹataqta qaica ca naigui! ₁₆Cha'aye qaica ca ishet da qaltaq iuennatega cam ỹaanaxanaxaic, qataq cam qaica ca ỹaỹaanapec, cha'aye da mashe qaỹoqteguelo naua vi'iye, nache 'enauaque da qaicoua'aisalo, cha'aye cam ỹaanaxanaxaic, qataq cam qaica ca ỹaỹaanapec 'eeta'a't da ileu'.»

₁₇Qaq huaña nache sevira'a da saỹemec da ñachaalataxac, cha'aye 'enauac nam qaỹo'otpi ana'ana 'alhua da aỹem dataỹa'aguet. Qaq ỹataqta 'eesa da qaica ca naigui, 'eeta'am da 'eetec da huotaique da qanllañi na la'at.

₁₈Qataq sevira'a nataqa'en da saỹemec 'enauac nam ỹo'onatacpi co'ollaxa ana'ana 'alhua, cha'aye saỹaten da 'enauac namayepi talec cam aỹem nca'atalec qome. ₁₉Qaq huo'o dam ỹataqta 'eesa, da camaye na'aictaxa da ỹaanaxanaxaic huo'otaq da qaica ca laỹaanataxanaxac, qalaxaye camaye ỹauo'o lalamaxat qome, 'enauac nam ỹataqta lta'araic da ỹo'onataxanaxac co'ollaq so'ottac, qataq so'ogoxona da ỹaỹaanec da yaqto' ishet da aỹem hueto'ot namayepi ana'ana 'alhua. ¡Qaq damaye nataqa'en ỹataqta qaica ca naigui! ₂₀Qaq co'ollaq sela'a nam so'otpi ana'ana 'alhua, nache huo'o da ñetogotaxac souaxat da ỹataqta lta'araic da ỹo'onataxanaxac co'ollaxa, ₂₁cha'aye huo'o na do'ogoxona da naỹaanec, qataq da nauattonaxanaxac, qataq nam nauane'pi dam lo'onataxanaxac, da yaqto' talec 'enauac cam sa do'onataxan co'ollaxa. ¡Qaq damaye nataqa'en ỹataqta qaica ca naigui, qataq ỹataqta saỹaỹamaxañi! ₂₂Qaq, ¿negue'tom cam ỹachegoxotaigui cam shiỹaxaua da ỹaguec da lo'onataxanaxac, qataq da ỹaguec da lhuogoxo da netalec ana'ana 'alhua? ₂₃Cha'aye 'enauac dam nachaalataxac da nlaqchigui da nqui'ic, qataq saỹalemaxat da lo'onataxanaxac, ivira'a ye pe da qaica ca nmataqa' da lhuennataxac. ¡Qaq damaye nataqa'en qaica ca naigui!

₂₄Qaq dam ỹaỹamaqchiguiñi maye ishet da ỹo'ot cam ỹale, damaye, 'eeta': deque'etac, qataq nỹomtac, qataq nque'etaxaachigui da alaỹaxac da lo'onataxanaxac, cha'aye selalec da nataqa'en damaye, chegoqo'ot Ñim Lo'onatac 'Enauacna. ₂₅Cha'aye, ¿negue'to' ca ishet da deque'etac, huo'otaq da ntootapigui', da saishet da nacheñi Ñimaye? ₂₆Cha'aye Ñim Lo'onatac 'Enauacna, ỹanem da laỹaanec, qataq da lauattonaxanaxac, qataq da lamaicỹaxac cam taalec da ỹaỹamaxareeta Ñimaye, qalaxaye cam 'etaxaloxoic, qalaq ỹanem da lo'onataxanaxac da lapootac qataq nquictasheguem da lsallaxa, da yaqto' ime, nache ỹanem cam taalec da ỹaỹamaxareeta Ñimaye. ¡Qaq damaye nataqa'en qaica ca naigui, 'eeta'am da 'eetec da huotaique da qanllañi na la'at!