'Enauac nam huo'o, huo'o ye laloqo'
1'Enauac nam huetalec ana 'alhua, huo'o ye laloqo', huo'o ye laloqo' da yo'oq 'enauac namayepi:
2Huo'o ye laloqo' da huo'o na ñiguiñi,
qataq huo'o ye laloqo' da huo'o na ileu.
Huo'o ye laloqo' da qoỹaañi na nañiguishec,
qataq huo'o ye laloqo' da qanqat na ala na nañiguishec.
3Huo'o ye laloqo' da huo'o na qaỹalauat,
qataq huo'o ye laloqo' da huo'o na qanataren.
Huo'o ye laloqo' da huo'o na qailaxachigui,
qataq huo'o ye laloqo' da huo'o na qano'oxoosheguem.
4Huo'o ye laloqo' da huo'o da noinaxac
qataq huo'o ye laloqo' da huo'o da naỹalliguiyec.
Huo'o ye laloqo' da huo'o da nasouaxac,
qataq huo'o ye laloqo' da huo'o da tonaxac.
5Huo'o ye laloqo' da qailagaxat na coma'pi,
qataq huo'o ye laloqo' da qalapona't namayepi.
Huo'o ye laloqo' da huo'o da nqapalaxac,
qataq huo'o ye laloqo' da qaica da nqapalaxac.
6Huo'o ye laloqo' da huo'o da nmitaxanaxac
qataq huo'o ye laloqo' da qoỹaxaañi damaye.
Huo'o ye laloqo' da naỹamaqtaxanaxac,
qataq huo'o ye laloqo' da qaỹasaxauec na naỹamaqtac.
7Huo'o ye laloqo' da huo'o na qaicolaxattac,
qataq huo'o ye laloqo' da qantet namaye,
huo'o ye laloqo' da ñe'emaxat ca shiỹaxaua,
qataq huo'o ye laloqo' da detaqa ca shiỹaxaua.
8Huo'o ye laloqo' da nauotaxanaqtaic,
qataq huo'o ye laloqo' da nquiỹaxanaqtaic.
Huo'o ye laloqo' da alaataxac,
qataq huo'o ye laloqo' da nlagaxayec.
9¿Negue't cam ỹachegoxotaigui cam shiỹaxaua da ỹaguec da lo'onataxanaxac? 10Qaq aỹem sela'a nam qapa'atta no'onatacpi maye Ñim Lo'onatac 'Enauacna, ỹanem co'ollaxa nam shiỹaxauapi da yaqto' ỹo'ottac. 11Ñimaye co'ollaq ỹo'ot namayepi, nache 'enauac da 'onaxaic naqa'en, qataq ỹachaigui ye lhuennataxa ca shiỹaxaua da ỹaỹaten nam chochaq tatec, na'aictoxo' da ca shiỹaxaua saivi' da ỹaỹaten nam ỹo'otpi co'ollaxa Ñim Lo'onatac 'Enauacna, qataq cam ñaq taỹa'a da ỹo'ot.
12Qaq huaña nache aỹem saỹaten da qaica ca lỹa no'on maye ishet da ỹo'ot ca shiỹaxaua, nacherata da matapiguiñi, qataq ỹo'ot cam no'on da ñaq huo'o da nachaalataxac, 13qataq nataqa'en lachetaqtaxanaxat Ñim Lo'onatac 'Enauacna, da ca shiỹaxaua deque'etac, nỹomtac qataq matapiguiñi, souaxat da na'achecỹaxac maye chegaqaigui dam lo'onataxanaxac.
14Qataq nataqa'en saỹaten da 'enauac nam ỹo'otpi Ñim Lo'onatac 'Enauacna, namayepi chochaq tatec. Qaica ca ishet da qaiqotteneuo, qataq qaica ca ishet da qanqat namayepi, cha'aye Ñim Lo'onatac 'Enauacna, nache lataxac naqa'en, yaqto' nam shiỹaxauapi huo'o naq 'enec naqa'en Ñimaye. 15Nam huo'o nagui, qalaq nache 'eetai' da huo'o co'ollaxa, qataq cam taỹa'a da huo'o qome, qalaq mashe huo'o. Qaq Ñim Lo'onatac 'Enauacna, ỹo'ot da na mashe ỹoxogue co'ollaxa, qaltaq ỹe'eguelaxa da huo'o.
Da saỹaỹamaxañi lataxac da achaalataxac
16Qataq nataqa'en sela'a da ana'ana 'alhua huo'o da ncachaxac, qataq ye hueta'a taxa dam ỹaỹamaqchiguiñi, qataq da nalochiguiñi lataxac, qalaq hueta'a da qauem. 17Qaq ỹoqo'oye aỹem shenapec da Ñim Lo'onatac 'Enauacna, nmit qome ca ỹale maye no'on da lataxac, qataq ca 'etaxaloxoic, cha'aye huo'o ye laloqo' 'enauac nam yo'oq qataq nam qaỹo'otpi. 18Qaq nataqa'en seuennataxaateguelec da lataxac nam shiỹaxauapi, nache shenapec da Ñim Lo'onatac 'Enauacna, ỹe'eguen nam ỹalleppi, da yaqto' namayepi ishet da ntouen, nache ila'a da 'eeta'am na shiguiỹacpi. 19Qaq ỹoqta 'eesa da na shiỹaxauapi, qataq na shiguiỹacpi, nache 'eeta'a't dam llecỹaxac: 'enauac da taỹa'a da ileu, qataq naua la'a'che nache 'eeta'a't. Qaq ỹoqo'oye ca shiỹaxaua saishet da napacalec da lataxac ca shiguiỹac, qaq damaye ỹataqta qaica ca naigui, 20qataq 'enauac da 'oonolec yem taỹa'a, cha'aye co'ollaq qaỹo'ot namayepi, nache qaỹachegoxotaigui na 'alhua, qaq 'enauac da ỹe'eguelaqtoigui qome ana 'alhua. 21Qaq ¿negue't cam ishet da ỹataqta 'eesa naqa'en, da so saqcha'a lca'alaxa ca shiỹaxaua taigue da piguem, qaq so saqcha'a lca'alaxa ca shiguiỹac, qalaq taigui na ỹataqta pa'aguiñi ana 'alhua? 22Qaq aỹem sela'a da qaica ca lỹa no'on da ỹo'ot ca shiỹaxaua, nacherata da ntootapeguec dam lo'onataxanaxac, cha'aye nachera dam nsheetenaguec, cha'aye qaica ca ishet da qaltaq ñe'eguelaxat da yaqto' imeten nam dalaxaicpi maye taỹa'a da huo'o, qom mashe ime da ileu camaye.
