Iuen da qailo'oguet ca ỹactec da la'amaqchec
1Ỹactec da ỹaỹamaqchiguiñi da no'on
da na'aqtaguec cam shiỹaxaua, qaq saq 'ena'am cam ỹataqta no'on coraxat.
Ỹactec da no'on cam na'a'q maye huetoigui ca nleuaxa,
qaq saq 'ena'am cam na'a'q maye huetoigui da nañoxoc.
2Ỹactec da no'on da qotaỹa ca hueta'a ca leuaxaic,
qaq saq 'ena'am da qotaỹa ca huaña ca na'ashaxac;
cha'aye da nleuaxa nachera dam loga't 'enauac nam shiỹaxauapi,
qaq iuen da iuennata'a damaye nam nca'altauecpi.
3Ỹactec da no'on da noinaxac, qaq saq 'ena'am da naỹalliguiyec,
cha'aye damaye ishet da na'axat da nasheguiỹaxac,
qalaxaye no'onaxat da nquiyaqteỹaxac.
4Da lhuennataxac na ỹaanaxanaxaicpi
hueta'a cam huaña da nasouaxac,
qaq na qaica ca ỹaỹaanapec qalaq ndotec
da iuennatega cam huaña da na'ashaxac.
5Ỹactec da no'on da qana'axaỹaxana
ca l-laxasoxonaxac cam ỹaanaxanaxaic,
qaq saq 'ena'am da qana'axaỹaxaatega
da lo'onaxanaxac cam qaica ca ỹaỹaanapec.
6Cha'aye da laỹalliguiyec ca qaica ca ỹaỹaanapec,
'eeta'am da l-lamaxa aca ỹaxat ỹavictac maye qaỹasaxangui ca norec,
qaq damaye nataqa'en qaica ca naigui.
7Dam sancherapec nataxac na'axat cam ỹaanaxanaxaic,
qataq da qaiỹaxaata'a da qaisheeten
da huo'o ca qaỹo'ot damaye na'axat da nataxac.
8Ỹactec da ỹaỹamaqchiguiñi da imeta qanqa'en cam qaỹo'ot,
qaq saq 'ena'am cam chegoqchiguiña co'ollaq qaỹacoolec.
Ỹactec da no'on da hualaxaunaxac,
qaq saq 'ena'am da 'amqaanaxac.
9Saishet qome da 'aua'aqta'a da 'am ỹauectac da nalemataic, cha'aye damaye lalamaxat cam shiỹaxaua maye qaica ca ỹaỹaanapec.
10Saishet qome da 'aunataxaatac da ta'ainco' soua hua'au vi'iye da ỹactec da 'onaxaiqa, cha'aye de'era nnataxanaxac saishet da huetaigui ca naỹaanec.
11Da naỹaanec ỹataqta 'onaxaic qataq ỹaỹamaxaañi nam netalec ana 'alhua da nnaictague' nataqa'en dam nsallaxa. 12Cha'aye da naỹaanec qataq aca anom, 'eeta'am aca npaqtaxanaqte, qalaxaye da naỹaanec ỹactec da naigui, cha'aye ỹami' da lca'alaxa cam hueto'ot damaye.
13Ñaq 'aumeten nam ỹo'ot co'ollaxa Ñim Lo'onatac 'Enauacna: qaq ¿negue't cam ishet da nlaxanec cam namaxagui naqa'en Ñimaye? 14Qaq ỹoqo'oye da sana'aigue da 'icỹaxac, nache 'antootapeguec damaye; qalaxaye qom qauem da 'icỹaxac, nache iuen da 'auennataxan da 'enauaque naamaye maiche ỹo'o't Ñim Lo'onatac 'Enauacna, qaq cam ỹale qalaq saishet da ỹaỹaten cam tata'ague. 15Qaq huaigui dam qaica ca naigui ñachaalataxac da sauaachigui 'enauac ne'enapi, da nam soxoraic shiỹaxauapi nataqa'en ileu, na'aictaxa da nlaqchigui da lsoxoyec, qaq nam qauemaicpi, qalaq na'aictaxa da ỹaguec da layeloxo qalaq ỹataqta qaỹoqtec da nachaalataxac.
16Saishet qome da 'auapagaqnauec da no'on da 'arataxac,
qataq saishet da 'auapagaqnauec da 'am ỹaanaxanaxaic.
Cha'aye da qonetec de'era nache maiche 'anlaxatteguiñi da 'arataxac.
17Saishet da 'auapagaqnauec da 'am qauemaic,
qataq saishet da 'aue'enaxat ca qaica ca ỹaỹaanapec.
Cha'aye da qonetec de'era nache ishet da 'aleu da saxanaxa da ivita ca 'araloqo'.
18Qaq no'on qome da 'auaconeguet de'era,
na 'arhuaq saishet qome da ỹaxanec damaye.
Cha'aye cam huo'o naq 'enec naqa'en Ñim Lo'onatac 'Enauacna,
nache no'on da llecỹaxac da inoxonaqchetec 'enauac de'era.
19Dam naỹaanec ỹa'añaqchet cam ỹaanaxanaxaic,
napacalec cam diez 'añaxaicpi nta'alpi maye hueta'a cam huaqta'a't nỹecpi.
20Qalaxaye ỹoqta 'eesa da qaica ca ỹale ana'ana 'alhua, da na'aictaxa da no'on da lataxac qataq ỹo'ottac ca ỹaỹamaqchiguiñi da qaica ca lasouaxashet.
21Saishet qome da 'auqochetega 'enauac nam na'aqtaxanaxacpi, yaqto' saishet qome da 'aua'axaỹa ca qauem la'aqtac maye 'am ỹasaxalec ca 'aramaxashec. 22Cha'aye 'am nataqa'en 'auaỹateeta, da qalota naxa da 'auasaxalec na qauem 'ara'aqtac ca 'arỹa.
Da qanmitaique da naỹaanec
23Qaq ñemit co'ollaxa 'enauac ne'enapi serolec dam ỹaỹaanec, cha'aye sauotaique da aỹem ỹaanaxanaxaic, qalaxaye sa sevi' da saỹaten namayepi. 24¡Qaq 'enauac nam huo'opi ỹataqta sa sevi' da saỹaten! ¡Ỹataqta 'eesa da huo'o da lqalaic, ỹoqo'oye qaica ca ishet da ỹaỹaten! 25Qaq huaña nache ñalemaqte' da yaqto' sanata da nauattonaxanaxac, qataq ñapaxagueetega, qataq ñimittaique cam ỹaỹamaqchiguiñi loga't damaye. Qaq huaña nache saỹaten da saỹaỹamaxañi da qaica ca ỹaỹaanapec ca shiỹaxaua, qataq da qaica ca qaỹaỹaanapec nachera da 'oopashec.
26Qataq huo'o da selalec maye ỹataqta huo'o da lqui'ic, damaye ỹataqta napacalec da nleuaxa, qaq 'eeta': aca 'alo da do'ogoxona da lquiyaqteỹaxac da lapaxañi aca lqoina, qataq naua lhuaxaye da nsoxouo ca loxonec. Qaq cam ỹalaxaguet Ñim Lo'onatac 'Enauacna nache saishet da loxonec acamaye, qalaxaye cam 'etaxaloxoic nache ishet da taigui ca laleguec acamaye. 27Qaq co'ollaq semat da ñaloqteetega't da lataxac ñi 'oonolec naamaye, nache aỹem 'aqtaxanaxaic saỹaten da: 28ñaq saxanaxa da sanata cam ỹataqta ñimittaique, nacherata da selalec so 'oonolec ỹale da ỹalectaigui so mil, qalaxaye som 'alpi saishet da selalec aca 'oonole da ỹalectaigui asomayepi. 29Qaq nachaqrata da selalec da Ñim Lo'onatac 'Enauacna, ỹo'ot co'ollaxa da nalochiguiñi da lataxac so shiỹaxaua, qalaxaye maicheso da nmitaique da na'axat dam nachaalataxac.
