So Mardoqueo qoỹanem da la'amaqchec
1Qaq nache huaigui se'eso pe, da so nta'a saishet da do'oche, qaq ỹoqo'oye damaxasoxoolec da qandoua'a somaye aso nere maye nanettalec 'enauac nam huo'o da la'amaqchec maye qaỹo'otpi yi'iye 'alhua, da yaqto' qaitaxaỹaxan. 2Nache qailalec so na'aqtaxanaxac maye huetalec asomaye, dam 'eetec so Mardoqueo da ỹauatalec co'ollaxa so naỹamaxataxa'c so Bigtan, qataq so Teres, maye lataxala'ate so nauaatalec so nta'a, da huotaique ỹalaua't co'ollaxa so nta'a Asuero. 3Qaq huaña nache so nta'a denataxan, 'eeta':
¿Negue't ca nsheetenaguec, qataq ca llo'oxoyec maye qoỹanem so Mardoqueo, co'ollaq ỹo'ot de'era? Nache ỹasat som ltauapi somaye, 'eeta': ¡Qomye qaica!
4Qaq so Amán mashe huenoxoneua'a so qasoxoc maye dataỹauga so ỹaqauga lma' so nta'a, da yaqto' dequiguiỹaua'a so Mardoqueo da qaicoñerasheguemec aso 'epaq maye damaxasoxoolec co'ollaxa somaye da qaiqataxanai'. Nache so nta'a denataxan, 'eeta':
¿Negue't dam coleetac ye qasoxoc?
5Nache so ltauapi somaye ỹasat, 'eeta': ¡Qomye Amán! Nache so nta'a, 'enapeco':
¡Ñaq qampa'axañeeuo!
6Nache so Amán pa'auo, nache so nta'a inat somaye, 'eeta':
¿Negue't cam qaỹo'otec cam shiỹaxaua maye na nta'a huotaique da ỹo'oxoren?
Nache so Amán ipa'axaatauo da lhuennataxac, maye 'eeta': ¿Negue'tom ca lỹa ỹo'oxoren ñim nta'a, ye nachaỹemta? 7Qaq ime nache ỹasat, 'eeta':
Que'eca ỹale 8iuen da qandoua'a aca npoto maye 'eeta'am ana 'aỹa'aatañi 'am nta'a, qataq ca 'oonolec caaỹo nam maiche 'annotaxala'pi naxa, qataq ỹaatañi qanqa'en aca naro'o ca nta'a. 9Qaq aca'aca mpoto qataq ca caaỹo, iuen da qoỹanem cam ỹataqta 'amaqtaqaic na 'aramaxashecpi, da yaqto' nacheca cam huapegue' da no'otaxanaxan que'eca ỹale, maye huotaique da 'aỹa'anem da la'amaqchec, qataq nache ỹauecta'aguet que'eca caaỹo maye netalec camaye, da coleeteguelec naqa'en ye nlagaqa' maye nangui na laiñi na huaqta'a't nỹecpi, nache ỹa'alaqtalec camaye, 'eeta': ¡'Era da qoỹeetec cam shiỹaxaua maye ñi nta'a huotaique da ỹanem da la'amaqchec!
10Qaq huaña nache so nta'a 'enapega so Amán, 'eeta':
Hua', ñaq 'auỹalapigui' qome da 'auacona aca mpoto, qataq 'auaconeua'a ca caaỹo, nache ipacchigui 'anqa'en dam qonapec, qaq nache 'auo'otec damaye ñim judío Mardoqueo, maye nso'ootañi netaña ñi lasom ñi nma' lta'araic. Qaq saishet qome da 'oonolec 'anqa'en ca deqaptauec nam qonapecpi.
11Nache so Amán ỹacona aso mpoto, qataq ỹaconeua'a so caaỹo, nache no'otaxanaxan so Mardoqueo, nache ỹaueca'aguet so caaỹo da iconnaxaateguelec so nlagaqa' se'eso huaqta'a't nỹecpi, qataq hua'auta nache ỹa'alaqtalec somaye, 'eeta': «¡'Era da qoỹeetec ca shiỹaxaua maye ñi nta'a ỹanem da la'amaqchec!»
12Qaq co'ollaq ime da qaiqueuoxootapigui' so Mardoqueo, nache ỹe'eguelaxaua'a so lasom so nma' lta'araic, qaq so Amán qalaq ỹataqta iỹalapigui' da taỹa so lma', qaq ỹataqta daquicota qataq ỹapotalec na lashec. 13Qaq huaña so lma' nache da'aqtaxaateguem aso lhua, qataq so nauochaxauapi 'enauac dam huaigui somaye, nache somayepi 'enapega somaye, 'eeta':
Ñi'iñi Mardoqueo, ñim huo'omshe deqat da 'ara'amaqchec, ñimaye da judío, nache saishet da 'auañoxot da 'anauec, maye nacherata da ñimaye taỹa'a da imauec da 'am nauec.
14Qaq co'ollaq ñaq saxanaxa da ime da ltaxaỹaxac somayepi, nache nvireuo so lamaxashecpi so nta'a, da yaqto' iỹalapegue' da ỹauec so Amán, ỹauega so nquia'axac maye ỹo'ot aso Ester.
