Da nalaataguec so Amán
1Qaq so nta'a qataq so Amán, je'c da nqo'oora so nquia'axac, 2qaq so lỹa na'a'q nache huaigui se'eso nquia'axac da so nta'a 'enapega aso Ester, 'eeta':
¡Ñaq aỹem 'auỹaxanot cam qonetapeguec, qaq aỹem 'am sanem qome, na'aictaxa da tachiguingui na laiñi da ỹo'onataxanaxac!
3Nache aso Ester ỹasat, 'eeta':
'Am nta'a, da aỹem 'auauotec, qataq da 'auaỹamaxareeta, nache 'oonolec da sheetapeguec qataq seỹaxaategueua'a 'am nta'a, aỹem 'anca'alaxatec, qataq nam ihuo' le'ecpi, 4cha'aye na ihuo' le'ecpi qataq aỹem, qomi' qaime'n da yaqto' imauec da qomi' qailaxachiguilo. Taxa da qomi' qaime'n da yaqto' qomi' nlataqa, nache qaica taxa ca ỹa'aqtac, cha'aye ñim qomi' ipa'agueeta'ape, saishet taxa da na'axat da 'aro'onataxanaxac 'am nta'a. 5Nache so Asuero denataxan, 'eeta':
¿Negue't camaxa, qataq hua'ague ca neta'ague cam huotaique da ỹo'ot de'era maye ỹataqta lta'araic?
6Nache aso Ester, 'enapeco': ¡Qomye ñim qomi' ipa'agueeta'ape qataq qomi' ỹasauaxatta'ape, nacheñi ñi'iñi qauemaic Amán! Qaq so Amán co'ollaq hua'axaỹa de'era, nache ỹataqta sa da'añiigue souaxat da ñi'iỹa so nta'a, qataq aso nate'e. 7Nache so Asuero ñisheguem, ỹataqta nlaqchigui da lalemataic, nache ca'ai so huaña so nquia'axac, nache tauga so nanaxanaqa' se'eso nma' lta'araic. Qalaxaye so Amán, co'ollaq ỹauatton da so nta'a mashe lhuennataxac da ỹaneguet da nleuaxa somaye, nache somaye no'onañi da yaqto' nachoxonnot aso Ester da nca'alaxatec somaye. 8Qaq so nta'a co'ollaq ñe'eguelaxauo chegaqauga so nanaxanaqa', nache taua'a so huaña so nquia'axac, nache co'ollaq ila'a da so Amán ỹa'atto'oto naua l-llecte aso Ester, nache ỹa'alaxalec, 'eeta': ¿Peta'a 'auauotaique nataqa'en da 'avi'in ana nate'e, da sauaachigui 'anqa'en da huaña na ima'? Qaq co'ollaq nasaxauec de'era la'aqtac so nta'a, nache qaỹapolec na lashec so Amán. 9Qaq so lamaxashecpi so nta'a, huo'o so le'enaxat Harboná, somaye, 'eeta': Ye lma' ñi Amán huo'o ara lhuotta 'epaq, maye ivi' veintidós metros ye lshequitcheguema, maye ñimaye iqataxanai' co'ollaxa da huotaique qaicoñerasheguemec so Mardoqueo, som ỹale maye ỹataqta no'oñi naua ltaxaỹaxaco maye 'am ỹanema, 'am nta'a. Nache so nta'a 'enapeco': ¡Hua', damaye qaucoñiyasheguemec qome acamaye! 10Qaq 'era da 'eetec so Amán da qaicoñerasheguemec aso maiche lo'onata maye huotaique co'ollaxa da icoñerasheguemec so Mardoqueo. Qaq co'ollaq qaỹo'ot damaye, nache vi'iiguet da lalemataic so nta'a.
