Qaiuaxanaxana aso shiiquioxoi
1Nache Ñim Nataxala' 'enapega so Moisés, 'eeta':
«'Anqo'oneua'a qome ñi faraón, cha'aye aỹem so'otec ñimaye qataq na ltauapi da ỹataqta qaramchigui, yaqto' sachaxana namayepi da lta'araic ỹo'oxoyec maye ishet da so'ot, 2yaqto' 'am ishet da 'aua'aqtaxanem qome ca 'aỹa'alaqpi qataq ca 'arhualpi da Aỹem so'otec na Egipto da lta'araic ỹo'oxoyec, yaqto' qami' qauaỹaañita da aỹem maye Nachaỹem Nataxala'».
3Nache so Moisés qataq so Aarón, nqo'ooreua'a so faraón nache 'enapegalo', 'eeta':
«Ñim Nataxala' maye Natamnaxala' na hebreopi da la'aqtac, 'eeta': ¿Chaq lagui qaq 'am ishet da 'aỹa'axaañi da 'anapagaqaanaxac? 'Aua'aqta'a qome da jec na ỹalamaxatpi, da yaqto' Aỹem natamnot. 4Cha'aye qom ñaq queta da 'anqanaxattac da yaqto' saishet da jec namayepi, nache qonte', qaq aỹem ñamaxalec aca shiiquioxoipi na 'ana'alhua. 5Ime, nache imattalec na 'alhua, ivitta'a da saq yo'oxolec anamaye. Ime, qaq chec nam saq 'amaqtaq lli'iỹoxot aso lache, nataqa'en chec ana qo'oipaq maye ñaxattaleguete naua nanaxanaqa'ate. 6Ỹataqta nlaqchigui qome na 'arma' lta'araic qataq na lma'pi na 'artauapi qataq 'enauac na lma'pi na Egipto le'ecpi. Damaye ỹataqta sa ỹauanapega so hua'au 'arta'alpi, qataq so 'arapiyelpi se'eso na'a'q co'ollaq ñaq huo'o, choche ivitta'a nagui.»
Qaq co'ollaq ime da ltaxaỹaxac so Moisés, nache ncolliiñi, nache ca'ai so lma' lta'araic so faraón. 7Nache so ltauapi so faraón, 'enapeco':
«¿Chaq laguio', qaq ỹaxaañi da qomi' sa ỹalemaxa't se'esoua ỹale't? No'on taxa da 'aua'aqta'a da jec yi'iye shiỹaxauapi, da yaqto' natamnot cam Lataxala' maye Natamnaxala'. ¡Peta'a saisheto' da 'auanoma da mashe nlatañi na Egipto!»
8Nache so faraón qaltaq damaxasoxoneugalo soua Moisés qataq so Aarón. Nache 'enapegalo, 'eeta':
«Qauesomiỹa qome, ña qanatamñiỹot cam Nataxala' maye Qanatamnaxala'ai. Qalaxaye ñaq aỹem qaua'aqtaxañim ¿chaq negue't qome ca jecpi?»
9Nache so Moisés, 'enapeco':
«Qomye qarỹatac na ñaqpiolec qataq na qarqueroxonecpi, qoyalaqpi, qoyalpi, qataq ana qarelo qaguetapi, huacapi, cha'aye ỹataqta lta'araic da qayo'oxonnataxanaxac da sho'oxorenaq Ñim Nataxala'.»
10Qalaxaye so faraón 'enapegalo' soomaye, 'eeta':
«Ỹataqta yo'oqtec da qauem dam qoñiitapeguec. ¿Qataq qaupi'itaxañiitega peta'a da qami' hueta'agueta qome Ñim Nataxala'? ¿Qalqo' qaupi'itaxañiitega da qami' sasheetrec, nataqa'en na qaỹa'alquipi? 11Cha'aye saishet qome da nache 'eetec de'era. Qami' ỹepi qandoitec qome da qoqui, da yaqto' qanatamñiỹot cam Nataxala', cha'aye nachera dam qoñiitapeguec.»
Nache so faraón damaxasoxooleguete da qaỹo'oldauec soomaye. 12Qalaxaye Ñim Nataxala' 'enapega so Moisés, 'eeta':
«'Auachaxaasheguem na 'arhuaq, 'analoqteetelec na Egipto, yaqto' anac aca shiiquioxoipi, yaqto' chec 'enauac ana nañiguishepi na Egipto qataq 'enauac anam lli'iỹoqte aso lache.»
13Nache so Moisés, ỹachaxaasheguem aso lashelte, naloqteetelec naqa'en ye Egipto. Nache Ñim Nataxala' anacot so la'at, chegaqa'ague da nala' lliguisheguem, nache anactac se'eso na'a'q qataq imauec so 'oonolec pe. Qaq so lỹa na'a'q, nache se'eso la'at maye chegaqa'ague da nala' lliguisheguem, anacot aso shiiquioxoipi. 14Nache 'enauac ye Egipto ỹataqta nlaqchigui ana shiiquioxoipi. Soua hua'au' vi'iye ỹataqta sa qaỹauanapega da nache 'eetec de'era, da ỹataqta qalota ana shiiquioxoipi, qaq saq 'ena'am se'eso na'a'q. 15Cha'aye ỹataqta nlaqtelec se'eso 'alhua, ivitta'a da saishet da yo'oxolec. Nache ỹauta 'enauac ana nañiguishe qataq 'enauac ana nañiguishe ala maye lli'iỹoqte aso lache. Ỹataqta qaica ca no'onañi nam darala ye Egipto, ivira'a na no'onaxa qataq ana qo'oipaqpi.
16Nache so faraón saỹaỹaloxon da damaxasoxoneuga so Moisés qataq so Aarón, nache 'enapegalo', 'eeta':
«Aỹem huo'o da ỹasouaxashet Ñim Nataxala' maye Qanatamnaxala'ai, nataqa'en qami'. 17Qalaxaye qami' ñachoxonnoto da chaqnatac nagui da aỹem qauchoxoyiñi souaxat da ỹasouaxashet. Qataq aỹem qanqouagaxauñiilec qome da qanqouagaxauñiỹot Ñim Nataxala' maye Qanatamnaxala'ai, da yaqto' nqateeguesop aỹem de'era lhuaxanaxanaxac maye dalaataxanapec.»
18Nache so Moisés, co'ollaq choche ca'ai so lma' lta'araic so faraón, nache nqouagaxaunot Ñim Nataxala'. 19Nache Ñim Nataxala' ỹashaxanec so la'at, chegaqa'ague naqa'en da avit so la'at lta'araic. Nache ỹache naqa'en aso shiiquioxoipi, ỹasaxangui aso auaxai togaxarai. Nache saishet da no'onañi naqa'en aca 'oonole shiiquioxoi 'enauac ye Egipto. 20Qalaxaye Ñim Nataxala', ỹo'otec so faraón da qaltaq qaramchigui naqa'en añi lquiyaqte da saishet da ỹashenec so Israel le'ecpi.
Qaiuaxanaxana so napalaxa
21Nache Ñim Nataxala' 'enapega so Moisés, 'eeta':
«'Auachaxaasheguemec qome na 'arhuaq na piguem, yaqto' huo'o ca napalaxa lta'araic 'enauac na Egipto, ivitta'a qome da choche qaipottapeecra'.»
22Nache so Moisés ỹachaxaasheguemec na lhuaq na piguem. Nache ivi' soua tres na'axa'te da huo'o so napalaxa lta'araic 'enauac ye Egipto. 23Nache ivittrec se'esoua na'axa'te da qaica ca ishet da ila'a ca lauoreua, nataqa'en qaica ca ishet da iraxan ca lma'. Qalaxaye 'enauac na lma'pi so Israel le'ecpi yo'oqchiguiñi.
24Nache so faraón damaxasoxoneuga so Moisés, nache 'enapega, 'eeta':
«Qauesomiỹa qome qanatamñiỹot cam Nataxala', qauaviqui qome nataqa'en na qaỹa'alquipi, qalaxaye qaucotañi qome ana qareloi qaguetapi qataq ana huacapi».
25Qalaxaye so Moisés 'enapeco':
«'A'i, 'am qome qomi' 'aỹa'anema ca shiguiỹacpi, da yaqto' savigaxataq da sauoqo'o qarachetaqtaxanaqte da sanaqot Ñim Nataxala' maye Qanatamnaxala'. 26Nataqa'en sachoq qome 'enauac ana qarelopi. Saishet da no'onañi ca 'oonolec shiguiỹac, cha'aye namayepi huo'o qome ca saconaxaua'a, da yaqto' sho'oxorenaq Ñim Nataxala'. Qaq ỹoqo'oye nagui da saxanaxa da sevitaxa ca ñeqo'onaqtega, qaq saxanaxa da saỹaanaq ca seuenaq da yaqto' sho'oxorenaq Ñim Nataxala'.»
27Qalaxaye Ñim Nataxala' ỹo'otec so faraón da ỹataqta qaramchigui añi lquiyaqte, da yaqto' saishet da ỹashenec somayepi. 28So faraón nataqa'en 'enapego' so Moisés, 'eeta':
«Aỹem qoca'ai, qaq nache tachiguiña da aỹem 'anaua'a. Cha'aye ca na'a'q qom qaltaq aỹem 'auanaua'a, nache 'aleu qome».
29Nache so Moisés 'enapeco':
«Aja', ỹaỹamaqchiguiñi da 'ara'aqtac. Nagui nache tachiguiña da sa 'am ñauane'.»
