Qaỹa'axata'a da l-leuaxa so na'auaxanec ñalaqpi
1Nache Ñim Nataxala' 'enapega so Moisés, 'eeta':
«Aỹem ñaq shecto'ot da qaltaq ñanacot qome ca lỹa seuaxanec ñi faraón qataq 'enauac na Egipto le'ecpi. Qaq qom ime camaye, nache ñi faraón qami' ỹasheetrec, qalaxaye saishet da choche qami' ỹasheetrec, chaqrata da ñimaye ỹataqta qami' ỹo'oldauec qome. 2Qalaxaye nagui qonapega na Israel le'ecpi nam ỹalleppi qataq na 'alpi, da iỹaxanot na lauoreuapi ỹalleppi huo'otaq na 'alpi da iỹaxanaique na nogoxoshet maye chegaqaigui na lcat plata qataq oro.»
3Nache Ñim Nataxala' ỹanem da so Egipto le'ecpi ỹataqta huo'o da lqouagaxa so Israel le'ecpi. Nataqa'en so ltauapi so faraón ỹataqta sa latetapec so Moisés, 'eeta'am naqa'en ca ỹale maye huo'o naq 'enec, nache 'eeta'am nataqa'en da lhuennataxac 'enauac so Egipto le'ecpi.
4Nache so Moisés 'enapega so faraón, 'eeta':
«Ñim Nataxala' 'eeta' da la'aqtac, qom laiñi na pe, nache aỹem sequeuolec 'enauac na Egipto. 5Nache ileu qome na la'auaxanec llalec na Egipto le'ecpi, ivira'a ñi la'auaxanec llalec ñi faraón ñim netagui da no'onataxanaxac, ivira'a nataqa'en nam la'auaxanec llalec ana nlatapi maye lo'o ana namaicnaxanaqte coma'. Nataqa'en ileu na la'auaxanec llalec na shiguiỹacpi. 6Nache imauec qome na Egipto huo'o ca na'alaxac. Damaye ỹataqta sa qaỹauanapega qataq sa lỹa qome da qaltaq qanauane'. Qaq 'era da la'aqtac Ñim Nataxala'.
7Qataq yaqto' qami' ishet da qauaỹaañita da Ñim Nataxala' ỹataqta iỹotauga na Egipto le'ecpi qataq na Israel le'ecpi, qaq saishet qome da huo'o ca 'oonolec pioq da ito'oguet ca shiỹaxaua na Israel le'ecpi, huo'otaq ca shiguiỹac. 8Huaña qome, nache aỹem naỹa 'enauac ne'ena 'artauapi, nache ỹa'alyiñi naua l-llecte da aỹem iỹaxanot, 'eeta': Qoqui qome, 'am qataq 'enauac nam shiỹaxauapi maye 'am quetague', huaña qome nache ishet da ashec.»
Nache ỹataqta dalemata so Moisés co'ollaq ca'ai so faraón. 9Qaq co'ollaq ime, nache Ñim Nataxala' 'enapega so Moisés, 'eeta':
«Ñi faraón ỹataqta saishet da qami' ỹoqocha'alo, qalaxaye yaqto' nquictec da ỹo'oxoyec souaxat da so'otec na Egipto».
10Nache so Moisés qataq so Aarón, ỹo'o't 'enauac de'era ño'oxoyec, ỹauaachigui naqa'en so faraón, qalaxaye so faraón saishet da ỹashen da ca'ai ye Egipto so Israel le'ecpi, cha'aye Ñim Nataxala' nache 'ena'ac da somaye ỹataqta qaramchigui añi lquiyaqte.
