Éxodo 17

₁Qaq 'enauac so Israel le'ecpi ca'ai ye toolec 'alhua Sin, nache nqocheeta, ipacchiguilo naua lamaxasoxonaxaco Ñim Nataxala'. Qaq co'ollaq qaỹata'ague, nache naña ye Refidim, qalaxaye qaica ca 'etaxat yemaye da huo'otaq nỹom somayepi. ₂Huaña, nache qoỹenapega so Moisés, qoỹeeta':

«¡Ña 'auauo'o ca qaraquip, yaqto' ñiỹomaq!»

Nache so Moisés 'enapeco':

«¿Ta'ainco' ye aỹem qauỹaxañiitacot? Qataq ¿ta'ainco' ye qavi'iguiñeetac Ñim Lo'onatac 'Enauacna?»

₃Qalaxaye se'eso nhuo' le'ecpi ỹataqta huo'o na laquip, ỹoqo'oye 'eetega so Moisés, 'eeta':

«¿Che ta'ainco' da qomi' 'anqateeguesopa co'ollaxa ye Egipto? ¿Choche qomi' 'aualaateque na qaraquip, qataq na qoyalaqpi qataq na qana'atetpi?»

₄Nache so Moisés nqouagaxaunot Ñim Nataxala', 'eeta':

«¿Cam sheeteco' ne'ena shiỹaxauapi? ¡Ye mashe yaqta'a da aỹem ỹalauat da aỹem irolec na coma'!»

₅Nache Ñim Nataxala' 'enapeco':

«'Aua'au qome qataq 'auauo'oi caua 'arỹa't na lqueroxonecpi na Israel le'ecpi. Qataq 'auache ana 'arashelte anam 'aurolec co'ollaq 'auaxaangui aso auaxai. Ime, qaq qojec. ₆Qaq 'am seuatta'aguet yem Horeb, soota'a qome añi coma'. Qaq qom 'auaxangui añimaxa, nache naỹenec na 'etaxat, da yaqto' nỹom ne'ena shiỹaxauapi.»

Qaq 'era da 'eetec so Moisés, ỹauaachigui so lqueroxonecpi na Israel le'ecpi. ₇Nache ỹamata'ac se'eso 'alhua da Meribá, cha'aye nache huaña co'ollaxa da so Israel le'ecpi huo'o da nachoxoc. Nataqa'en ỹamata'ac da Masah, cha'aye huaña co'ollaxa da ỹe'eguen Ñim Lo'onatac 'Enauacna, 'eeta': «¿Peta'a qomi' hueta'agueto'ca cam Nataxala', huo'otaq saishet da qomi' hueta'agueta?»

₈Nache so amaleciitapi naỹa ye Refidim da delogui' so Israel le'ecpi. ₉Nache so Moisés 'enapego' so Josué, 'eeta':

«'Auauo'oi qome caua 'auaconeua'alo shiỹaxau'. Ime, qaq qojec 'aulogui' na amaleciitapi. Aỹem qalaq sootalec qonte' nte'eta añi qaỹoqotcheguemec 'alhua, llasoqta'a qome aye lashelte Ñim Lo'onatac 'Enauacna.»

₁₀Nache so Josué ỹo'ot da la'aqtac so Moisés, nache jec da delogui' so amaleciitapi. Qaq so Moisés, Aarón qataq so Hur, qalaq taresheguemec aso qaỹoqotcheguemec qasoxonaxa. ₁₁Qaq so Moisés naxa da ỹachaxaayishegue'm naua lhua'q, nache doxonaxaatai' so Israel le'ecpi. Qalaxaye naxa da nauaxaỹaxaayiñi naua lhua'q, nache qaltaq doxonaxaatai' so amaleciitapi. ₁₂Qalaxaye co'ollaq mashe imateguelo naua lhua'q so Moisés, nache qaỹacona so coma'. Ime, nache nso'oolec qanqa'en. Nache so Aarón qataq so Hur, nasoqtrañi naua lhua'q so Moisés, ñi 'oonolec soomaye nasoqta'a na 'oonolec lhuaq so Moisés. Huaña nache ishet da ỹachaxaatrashegue'm naua lhua'q so Moisés, choche ivitta'a da inoxooñi aso nala'. ₁₃Ỹoqo'oye so Josué ishet da loxonec so nalleppi so amaleciitapi, irota'a so ỹeelonec.

₁₄Nache Ñim Nataxala' 'enapega so Moisés, 'eeta':

«'Erelec qome aca nere de'era, yaqto' saishet da qaicoua'ai. Ime, nache hua'aqchigui 'anqa'en ñi Josué, da aỹem imauec qome da sapalaxat da na'aqtaguec na amaleciitapi.»

₁₅Nache so Moisés nauaxaỹaxaasheguem aso lca'atoxonaxalate, nache ỹanagui da le'enaxat: «Ñim Nataxala' 'eeta'am aca ỹa'ana maye seca'attalec.» ₁₆Nache 'enapeco':