1Qalaxaye so Moisés 'enapeco':
«Yemayepi qome saishet da aỹem ỹa'amaqten, qataq saishet da aỹem ỹoqocha'a. Nacherata da aỹem 'enapega qome, 'eeta': ‹Ñim Nataxala' yo'oqta da saishet da 'am nachaxana.›»
2Nache Ñim Nataxala' inat so Moisés, 'eeta':
«¿Negue't na 'alasoqta'a?»
Nache so Moisés 'enapeco':
«Qomye ỹashelte.»
3Nache Ñim Nataxala' 'enapega, 'eeta':
«'Eco', ña 'auasaxauec.»
«Nache so Moisés ỹasaxauec asomaye. Nache asa'aso nashelte nañigui na na'araxanaq, nache so Moisés dataueeguesop somaye» 4Qalaxaye Ñim Nataxala' 'enapega, 'eeta':
«Ña 'auacona yemaye, 'auacootec na la'araxashet.»
Nache so Moisés ỹacoochigui co'ollaxa na la'araxashet so na'araxanaq nache somaye qaltaq ipactegue da nashelte.
5Qaq 'era qome da 'eetec da 'am qaỹa'amaqten da ỹataqta 'eesa da 'am nachaxana nam Nataxala', maye Natamnaxala' soua hua'au' 'arta'al, Natamnaxala' so Abraham, Isaac qataq so Jacob.
6Nache Ñim Nataxala' 'enapeco' 'eeta':
«'Eco', ña 'aushetoigui ana 'artogue na 'arhuaq.»
Nache so Moisés ishetoigui ana ltogue na lhuaq, qaq co'ollaq nqatec, nache ila'a da nchega na lhuaq qataq ỹapagaq, 'eeta'am ana aloñi da lapagaxa. 7Nache Ñim Lo'onatac 'Enauacna qaltaq 'enapega, 'eeta':
«'avi'eguelaxalec da 'aushetoigui ana 'artogue na 'arhuaq.»
Nache so Moisés qaltaq ỹe'eguelaxalec da ishetoigui ana ltogue na lhuaq. Qaq co'ollaq nqatec na lhuaq, nache qaltaq ipactegue da no'oitom, 'eeta'am da maiche lo'oxoỹaxac na lo'oc. 8Ime, nache Ñim Nataxala' 'enapeco':
«De'era hua'auchiguiñi na'anec da saishet da 'am qaỹa'amaqten, qataq da saishet da 'am qaiqocha'a, qalaxaye qaỹa'amaqten qome da nca'ataxanauo na'anec. 9Qalaxaye qom saishet da 'am qaỹa'amaqten, qataq da saishet da qaiqocha'alo ne'enaua dos na'aneqa, nache 'emaxaña ca 'etaxat aso tala Nilo qataq nache 'aucorelec na 'alhua. Nache que'eca 'emaxashec 'etaxat maye 'auachegoxotangui so tala, da huecorelec ana 'alhua, nache camaye nañigui na ntago'q.»
10Qalaxaye so Moisés 'enapego' Ñim Nataxala', 'eeta':
«¡Aicoue, 'Am Ỹataxala'! ye aỹem na'aprapeguec naxa naua ỹa'aqtaqa da setaqa. Qaq damaye nache 'eetai', saishet da cheta'ague nagui da 'autaqtague' ne'ena 'arlatac, cha'aye nache 'eetai' soua hua'au' vi'iye aỹem 'apaic, qataq ỹaqalanec da itaxaỹaxac.»
11Nache Ñim Nataxala' 'enapega, 'eeta':
«¿Chaq negue't ca ỹauo'o na alap ca shiỹaxaua? ¿Qataq chaq negue't ca chegoqchigui da qaicaua naua la'aqtaqa ca shiỹaxaua, huo'otaq da da'añaigui na lqaic, huo'otaq da sa nauaañi, huo'otaq da nauaachiguiñi? ¿Peta'a sa nachaỹemo'? 12Qaq ỹoqo'oye nagui 'aue, qojec, aỹem 'am soota'aguet qome da 'autaqa, qataq 'am sapaxaguenec ca llec ca 'artaxaỹaxac.»
13Qalaxaye so Moisés ñaqaiyeta da queta da la'aqtac, 'eeta':
«¡Aicoue, 'am Ỹataxala'! Aỹem 'anqouaguec taxa, da 'auamaq ca lỹa shiỹaxaua.»
14Nache Ñim Nataxala', dalemataỹa so Moisés, nache 'enapego', 'eeta':
«¿Peta'a saisheto' da 'arqaỹa ñi Aarón maye leviita? Aỹem saỹaten da ñimaye ỹataqta ỹaỹaten da ltaxaỹaxac. Qataq ñimaye 'am huaqatta'aguet qome qataq ỹataqta machiguiñi qom 'am nauane'. 15'Autaxaỹapegue' qome ñimaye, nache 'aua'axatem 'enauac na 'am samaxalec da 'aua'axat, yaqto' ñimaye nache ỹa'axat na 'ara'aqtacpi qome. Qaq aỹem soota'aguet qome ñimaye, qataq da ivita da qautaqai, qalaq qami' sapaxagueneque ca lataxac cam qauo'oche. 16Qaq ñi Aarón 'am detaqlec qome da detaxaỹapegue' na nhuo' le'ecpi, qaq 'eeta'am da nache 'am da 'autaqtac. Qaq 'am, nache qoneta'am da nache aỹem da setaqtac. 17Qaq 'auache qome ana 'arashelte, cha'aye anamaye nachana ana 'auo'onataxana da 'auo'ot ca na'anec maye ỹo'ot da na'aalaxa.»
So Moisés ỹe'eguelaxa ye Egipto
18Nache so Moisés ỹe'eguelaxa ye netaña so lacho' Jetro. Nache 'enapego', 'eeta':
«Aỹem she'eguelaxa ye Egipto yem netaña cam ỹalamaxatpi ỹaqaỹañecpi. Sauotaique da semeenaxana da huo'otaq ñaq huo'o camayepi.»
Nache so Jetro 'enapeco':
«Aja', 'aue, qojec, qataq qaica ca da qome da 'icỹaxac.»
19Qaq co'ollaq ñaq netaña ye 'alhua Madián so Moisés, nache Ñim Nataxala' 'enapego', 'eeta':
«'avi'eguelaxa qome ye Egipto, cha'aye mashe ileu 'enauac yem ỹauotaique da 'am ỹalauat.»
20Nache so Moisés ỹauec aso lhua, qataq so llalec nache ỹanaxanaxaleguete so 'ashena. Ime, nache ỹe'eguelaxa ye Egipto. Nache ỹachetac aso lashelte maye lalamaqte Ñim Lo'onatac 'Enauacna. 21Ime, nache Ñim Nataxala' 'enapega so Moisés, 'eeta':
«Qom 'avita ye Egipto, nache ỹataqta 'aulotelco' 'enauac nam 'am samaxalec maye ỹo'ot ca na'aalaxa, qataq ỹauaachigui 'anqa'en ñi faraón da na'añaxac maye 'am sanem. Qaq aỹem, sanem qome ñimaye da ỹataqta qaramchigui añi lquiyaqte da yaqto' saishet da lhuotta da ỹasheetec ye Israel le'ecpi. 22Nache 'am qome qonapega ñi faraón, qoneta': Ñim Nataxala' da la'aqtac 'eeta': ‹So Israel nacheso so la'auaxanec ỹalec›. 23Qaq ỹoqo'oye mashe sogote da 'am sheetega da 'aua'aqta'a da jec na ỹalec da yaqto' aỹem nqo'ona da aỹem natamnot, qalaxaye ye 'am saishet da 'auashenec, qaq nagui aỹem salauat ñi la'auaxanec 'aỹa'alec».
24Qaq co'ollaq ñaq queta so Moisés da taỹa'a ye Egipto, nache mashe ivita yem 'alhua maye huotaique da nmataqa' so pe, nache Ñim Nataxala' nqanaxatteguet somaye da ỹauotaique ỹalauat. 25Huaña, nache aso Séfora ỹacona so npelegaxanaxat coma' laỹe, nache icheguec na lqaic lo'oc ñi logoxoshet so llalec. Ime, nache ỹachaiguilo naua lchel so Moisés, nache asomaye 'enapeco':
«Nagui ỹataqta 'itchiguiñi da 'am ihua, chegoqchigui ne'ena ntago'q».
26Nache Ñim Nataxala' co'ollaq ỹauaachigui da ỹo'ot aso Séfora, nache hua'aqta'a da jec so Moisés, cha'aye asomaye mashe 'enapec da ỹataqta 'itchiguiñi da lhua so Moisés, chegoqchigui so ntago'q souaxat so na'anaxat na lo'oc so llalec.
27Qaq Ñim Nataxala' sogote da 'enapega so Aarón, 'eeta':
«'Anqo'ona qome ye toolec 'alhua da 'auqata'aguet na Moisés».
Nache so Aarón jec, qaq nache natena'aguet so Moisés co'ollaq hualec añi qasoxonaxa maye lalamaqte Ñim Lo'onatac 'Enauacna. Huaña nache nquine' qataq napigoxoi' somaye. 28Qataq so Moisés nache huaña da da'aqtaxaatapeguem so Aarón 'enauac nam ỹamaxalec Ñim Nataxala' da ỹa'axat, qataq na na'anecpi maye ỹo'ot da na'aalaxa maye qaỹamaxalec somaye da ỹo'ot. 29Ime, nache soomaye je'c da laỹona't 'enauac so lqueroxonecpi so Israel le'ecpi. 30Nache so Aarón ỹa'axat 'enauac na la'aqtacpi Ñim Nataxala' maye ỹami' so Moisés, nataqa'en ỹo'ot na na'anecpi maye ỹo'ot da na'aalaxa, ỹauaachigui naqa'en so shiỹaxauapi.
31Huaña, nache so shiỹaxauapi ỹataqta ỹa'amaqten de'era na'aqtaxanaxac, cha'aye ỹaỹaten da Ñim Nataxala' maiche huapegue' somayepi, qataq da sogote da ỹaỹateeta da nque'eenaxac, huaña nache ỹa'alyiñi naua l-llecte da natamnot Ñimaye.
