So Moisés qataq so Aarón detaxairapegue' so faraón
1Qaq co'ollaq ime de'era, nache so Moisés qataq so Aarón, nqo'ooreua'a da detaxairapegue' so faraón, nache 'ena'apo':
«Ñim Nataxala' maye Natamnaxala' na Israel le'ecpi, da la'aqtac 'eeta': ‹'Aua'aqta'a qome na ỹalamaxatpi da taỹa ye toolec 'alhua, da yaqto' ỹo'ot ca llo'oxonnataxanaxac da aỹem ỹo'oxoren.›»
2Qalaxaye so faraón 'enapeco':
«¿Negue't que'eca ‹Nataxala'›, da yaqto' aỹem salaxaguet qataq sa'aqta'a da jec na Israel le'ecpi? Aỹem saishet da sauatton que'eca Nataxala', qataq saishet da sashen da jec na Israel le'ecpi.»
3Nache soomaye 'ena'apo':
«Ñim Lo'onatac 'Enauacna maye Natamnaxala' na hebreopi, anac da qomi' itaua'n. Qaq ỹoqo'oye qomi' ñeqo'onaxa ye toolec 'alhua, qaq yemaye ivi' caua tres na'axa'te da qarqueuoxoc, qaq da sevitaxa nache savigaxataq aca qarachetaqtaxanaqte da sanqot Ñimaye, cha'aye da sa so'otaq damaye, nache saiueno'o' da qomi' iuaxaneque na nalolaxasat da qomi' ỹalaua't, huo'otaq souaqaigui ca alaataxac.»
4Qalaxaye so nta'a maye ilotague' na netaña ye Egipto 'enapeco':
«'Am Moisés qataq Aarón, ¿ta'ainco' qami' ye ỹaxaañi qanqa'eñi da lo'onataxanaxac na shiỹaxauapi? ¡Qavi'iguelqaiuec qome, qoquiỹot da qaro'onataxanaxaqui!»
5Nataqa'en 'enapeco' so faraón:
«Nagui ye ỹataqta nlaqtelec ne'ena 'alhua na Israel le'ecpi, qalaq ¿ta'ainco' ye qauauoitaique da ỹaxaañi da lo'onataxanaxac namayepi?»
6Qaq nacheso se'eso na'a'q da so faraón ỹanem da la'aqtac som nalleppi maye ipataxalec da ilo'ogue som lataxala'pi na 'onataxanaxaicpi, 'eeta':
7«Nagui nache saishet qome da qoquiito'ot da qaỹa'añeeta'am na 'auaqpi na Israel llalaqpi da ỹo'ot na losoc, saishet da qaue'enaxachiichigui da 'eeta'am nagui da qaỹa'añeeta'am nacherata da ¡qauauaqaita'a da yaqto' imapegue' da maiche ilaique na 'auaqpi. 8Qalaxaye qoñiỹapega qome namayepi da ipacchigui ye lcata na lo'onatac losoc. ¡Qataq saishet da nquiguiñi da huo'otaq choche 'oonolec losoc ca saxanaqca! Cha'aye namayepi choche hualaicpi, ỹoqo'oye ỹa'alaqtai', 'eeta': ‹Qolaq, so'otaq aca qarachetaqtaxanaqte da savigaxataq, ime qaq sanaqot Ñim Qanatamnaxala'›. 9Ỹataqta sa qaualaỹa'ac da qauo'onataxanaxañi ne'ena shiỹaxauapi. Qataq nache 'eetai' da do'onataxaatac qanqa'eñi, yaqto' saishet da ỹalaxaguet ca choche natenataxanaxac.»
10Nache so alleppi maye qaipataxalec da ilo'ogue so lataxala'pi so nlatacpi, anac da 'enapega so shiỹaxauapi, 'eeta':
«Ñi faraón ỹan da la'aqtac da nagui saishet da qami' sanaxama na 'auaqpi. 11Nagui nache maiche qauloỹaique na 'auaqpi maicheye ca qauachegoxocheỹa'ague. Qalaxaye saishet qome da nquiguiñi ye lcata na qaro'onataqui losoc.»
12Nache so Israel le'ecpi nlagaxaalec 'enauac ye 'alhua Egipto, da nmittaique na lvi na nañiguishec da ỹauotaique da do'onataxana, 'eeta'am naqa'en na 'auaqpi. 13Nache so alleppi maye qaipataxalec somayepi, ỹataqta iỹalaqchet somaye da ipagaqteetapigui, yem lcata ye ivittac ye na'a'q co'ollaq ñaq qoỹaata'am na 'auaqpi. 14Nataqa'en ỹataqta iuaxaatalec som lataxala'pi som nlatacpi maye ipataxalec so faraón da ilo'ogue naqa'en so nlatacpi. Nache 'eetega, 'eeta':
«¿Ta'ainco' ye shecait, qataq nagui da saishet da naloguiñi na qaỹa'añeeuo na qaro'onataqui losoc, qaq saishet da 'ena'am so hua'auchiguiñi?»
15Nache so lataxala'pi so nlatacpi Israel le'ecpi, jec da nqo'oneua'a so faraón da 'enapega, 'eeta':
«¿Ta'ainco' ye nache qonetec de'era na 'al-latacpi? 16Nagui mashe saishet da qomi' qoỹanema na 'auaqpi, qalaq qomi' qaiỹalaqche't da so'otaq na losoc, qataq qomi' qaiuaxaataleguete. ¡Qaq damaye maiche lasouaxashet na 'analleppi!»
17Qalaxaye so faraón 'enapeco':
«¡Qami' ye choche qami' hualaicpi! Ỹoqo'oye qoñiỹapec da qara'aqtaqui: ‹Qolaq, so'otaq aca qarachetaqtaxanaqte savigaxataq, ime qaq sanaqot Ñim Nataxala'›. 18¡Qauesomiỹa, qauo'onataxañi! Nagui saishet da qami' qoỹanema ca 'auaqpi, qalaxaye ipacchigui qome ye lcata naxa na qaro'onataqui losoc.»
19Nache so lataxala'pi so nlatacpi Israel le'ecpi ỹataqta huo'o da lhuogoxo co'ollaq qoỹenapega da saishet da nquiguiñi ye lcata na lo'onatac losoc ye na'a'q. 20Qaq co'ollaq ime da mashe qaitaqtague' so faraón, nache nnoxonec somayepi nache qanatena'agueta so Moisés qataq so Aarón maye deuataxaata'ape, 21nache qoỹenapegalo', qoỹeeta':
«Ñim Nataxala' ỹalletagui da qauo'ocheetac, qaq ỹoqo'oye ỹauo'o qome ca qanhuaxanaguiiqui, cha'aye nache qami' da qarasouaqtaxanaxaqui da ỹataqta qomi' sa ỹama'n ñi faraón qataq na nalleppi, qataq 'eeta'am da qaupataqaigui na lhuaq lauel ca no'ogoxonaxat da yaqto' qomi' ỹalaua't.»
Da nqouagaxaunaxac so Moisés
22Nache so Moisés 'eetego' Ñim Nataxala' co'ollaq nqouagaxaueetac, 'eeta':
«'Am Ỹataxala', ¿ta'ainco' ye sa 'auyacnapec ne'ena nhuo' le'ecpi? ¿Che ta'ainco' da aỹem 'anamaq co'ollaxa? 23Qataq nache chegoqta'a se'eso na'a'q da sa'axatem da 'are'enaxat ñi faraón, nache ñimaye ỹataqta nquigaxatec da sa iyacnapec ne'ena nhuo' le'ecpi maye 'aralamaxat, qalaq ¡ta'ainco' ye saishet da 'anca'alaxatec!»
