Qoỹanot Ñim Nataxala' so npe'l
1Ñim Nataxala' 'enapega so Moisés, 'eeta':
2«Ca la'auaxanec na'a'q, ca la'auaxanec ca'agoxoic, nache 'aua'ara't qome ca npe'l, maye huaña da Aỹem qanauane'. 3Nache 'aỹa'anaigui qome añi Arca maye laỹe' naua ñaỹamaxataxaco, qataq 'aua'ara't ca lapoxonaxat. 4Nataqa'en 'aupa'axaneuo qome ca lmala' aca nauole, qataq 'aupa'axaneuo aca ncoỹaraxanaxaqui nache 'aue'eraxatoigui. 5Nataqa'en 'aupa'axaneuo aca lca'atoxolate ca nchenaxanaxat, nache 'aỹa'anaña ca datatta añi laỹe' na iqataxacpi. Ime, qaq 'auaviguisheguem ca lapoxonaxat ca ñegueuo ca npe'l. 6Qataq aca nca'atoxonaxalate da qaỹavigaxat ca nachetaqtaxanaxat, nache 'aỹa'anaña ca naloteuga ca ñegueuo ca npe'l. 7Qaq ca nỹoxonaxaqui, nache ñichiguinguilo 'anqa'en ca npe'l, qataq aca nca'atoxonaxalate. Ime, nache 'anlaxattchigui camaye ca 'etaxat. 8Ime, nache 'aua'ara't ca lpaqtaxat caua laỹel que'eca qasoxoc, qataq ca lapoxot ca ñegueuo.
9Qaq da ime, nache 'auacona ca ncoraxanaxat, nache 'aucorelec que'eca npe'l, qataq 'enauac cam pa'ataigui camaye. Nache ỹataqta 'auqui'itaxatta 'enauac cam no'onataxanaxatpi, qaq que'eca npe'l ỹataqta sa qaishetapec. 10Nataqa'en 'aucorelec ca ncoraxanaxat aca nca'atoxonaxalate da qaỹavigaxat ca nachetaqtaxanaxat, qataq 'enauac cam no'onataxatpi, nache ỹataqta 'auqui'itaxatta. Qaq acamaye nache ỹataqta sa qaishetapec. 11Nataqa'en 'aucorelec que'eca ncoraxanaxat ca nỹoxonaxaqui, qataq na pa'aguiñi camaye, nache camaye ỹataqta 'auqui'itaxatta.
12Qaq da ime, nache 'auauegueuo ñi Aarón, qataq ñeua llalqa da 'auauegueua'a ca ñegueuo que'eca npe'l. Ime, nache 'auamaxaleguete da nache'l, 13qaq ñi Aarón nache 'auamaxalec da ỹaayiñi caua alogo da ntaxaỹaxanaxanec. Ime, nache 'aucorelec ca ncoraxanaxat yaqto' 'anagui da lo'onataxanaxac da itaxaỹaxanaxanec. 14Qaq da ime, nache qaltaq 'anaueguereuo ñeua llalqa, nache ỹaayiñi 'anqa'en caua alogo maye lo'onataxanaxaqui'. 15Nache 'aucoreleguete nataqa'en ca ncoraxanaxat, nache qoneteguema 'anqa'en ñi Aarón, da yaqto' itaxaỹaxanaxanqa. Qaq de'era 'eetec da qaicoreleguete ñiimaye, nachera da chochaq tatec llecỹaxac qome cam chegoxoguetpi.»
16Nache so Moisés ipacchigui da ỹo'ot 'enauac dam ỹamaxalec Ñim Nataxala'. 17Qaq ivi' co'ollaxa soua dos vi'iye da qanayeca'ai ye Egipto, nache so la'auaxanec na'a'q so la'auaxanec ca'agoxoic, nache huetoigui da qanauaxaỹaxaasheguem so npe'l. 18Nache so Moisés ỹa'ara't so npe'l, ỹa'auaxaañi ỹo'ot so lo'oxonaxala', qataq ỹa'ayiñi aso lauoqtepi. Ime, nache lapaxauo so 'epaqpi, qataq ỹaarasheguem soua la'axasoxola'ate so l-llecnaxanaxatpi. 19Ime, nache ỹaueguelec so lapo' so npe'l, maye huaña da qanauane' Ñim Nataxala'. Qataq npa'axanasheguem so lỹa lapoxot na pa'asheguem somaye, nache ỹataqta ipacchigui da ỹamaxalec co'ollaxa Ñim Nataxala'.
20Qaq co'ollaq ime, nache so Moisés ỹaconalo soua coma'ye maye nanettaleguete soua nqataxaco, nache ỹachanguilo aso laỹe'. Ime, nache ỹa'aldeuo soua lachoxola'ate, qataq ỹauo'o so lapoxot asomaye. 21Ime, nache iroua'a so pa'auo so npe'l, qataq ỹaviguisheguem so lapoxot, da yaqto' ỹapoua'a aso arca maye laỹe' soua nqataxaco, huaña nache ipacchigui da la'aqtac Ñim Nataxala'.
22Nataqa'en ipa'axaneuo so lmala' aso nauole ỹanaigui so npe'l, qataq pa'aigue naqa'en da sheu', qalaxaye pa'ataueegue da laỹe so napoxonaxat. 23Ime, nache ỹachalec somaye aso nauolepi, ỹauaachigui naqa'en Ñim Nataxala', qaq ipacchigui da lamaxasoxonaxac Ñim Nataxala'.
24Qataq ipa'axaneuo aso ima'a't ncoỹaraxanaxaquipi maye siete soua lhua'q, naloqteeteguet naqa'en so lmala' aso nauole, qataq pa'aỹa'ague da taguiñi so lauel so npe'l. 25Ime, qaq ỹegueua'a aso ima'a't ncoỹaraxanaxaquipi, ỹauaachigui naqa'en Ñim Nataxala', qaq nache ipacchigui da lamaxasoxonaxac Ñimaye.
26So Moisés nataqa'en ipa'axaneuo aso nca'atoxonaxalate maye lcat oro, ipa'axanoigui so npe'l naloteua'a naqa'en so napoxonaxat. 27Qataq ỹavigaxat so nchenaxanaxat maye ama da laitaỹaxac, qaq ipacchigui da lamaxasoxonaxac Ñim Nataxala'.
28Ime, nache so Moisés ỹaviguisheguem so lapoxot so ñegueuo so npe'l. 29Qaq aso nca'atoxonaxalate da qaỹavigaxat na nachetaqtaxanaxat, ỹanaña so naloteuga so ñegueuo so npe'l. Ime, nache ỹachalec da ỹavigaxat so lachetaqtaxanaxat shiguiỹacpi, qataq so lsoche na trigo. Qaq nache ipacchigui da lamaxasoxonaxac Ñim Nataxala'.
30Qaq so nỹoxonaxaqui, nache ỹaachiguinguilo na laiñi so npe'l qataq aso nca'atoxonaxalate, nache iỹoxogui so 'etaxat da yaqto' nỹoxonaxat. 31Qaq nacheso se'eso nỹoxonaxaqui so ỹachegoxottapiguingui na 'etaxat so Moisés, qataq so Aarón qataq soua llalqa so Aarón da iỹoi' naua lhuaq, qataq naua lchel. 32Qaq soomaye nache ỹataqta nỹote' naxa da ivita da pa'aroigui so npe'l, qataq naxa da tareua'a aso nca'atoxonaxalate. Qaq nache ipacchiguilo da lamaxasoxonaxac Ñim Nataxala' maye ỹamaxalec co'ollaxa so Moisés.
33Qaq co'ollaq ime, nache so Moisés ỹauo'o so lpaqtaxat so nqasoxoc se'eso npe'l, qataq aso nca'atoxonaxalate, qataq ỹaviguisheguem so lapoxot so ñegueuo se'eso nqasoxoc so npe'l.
So lo'oc ipelteetalec so npe'l
Qaq co'ollaq imat so Moisés da ỹa'ara't so npe'l, 34nache so lo'oc imattalec se'eso npe'l, qataq da llo'oxoyec Ñim Nataxala' ỹataqta imattalec somaye. 35Nache so Moisés saishet da pa'aigui se'eso npe'l maye huaña naxa da qanauane' Ñim Nataxala', cha'aye so lo'oc ỹataqta imattalec somaye, qataq da llo'oxoyec Ñim Nataxala' ỹataqta imattalec so npe'l. 36Qaq naxa da ivita da naỹoxoosheguem se'eso lo'oc da ca'ai so npe'l, nache so Israel le'ecpi ca'aisalo soua lanataqa'ate da qaltaq cot da llecỹaxac. 37Qaq naxa da qaica ca ldaxac se'eso lo'oc, nache nataqa'en somayepi saishet da ca'aisalo soua nmataqa'ate, qaq nacherata da iuata'a da naỹoxoosheguem da jec se'eso lo'oc. 38Qaq choche iviraxattrauec soua vi'iye co'ollaq queta so Israel le'ecpi, da se'eso lo'oc maye huetaigui Ñim Nataxala', somaye nache 'eetai' da ipelteetalec se'eso npe'l ye na'a'q, qaq ye pe qalaq 'ettaigui somaye. Qaq 'enauac somayepi da ilota'a.
