So Moisés ltaxaỹaxanaxanec so Aarón
1Nache Ñim Nataxala', 'enapego' so Moisés, 'eeta':
«Qaq 'am qome, nache 'eeta'am da 'eco' nache aỹem qom 'autaxaỹapegue' ñi faraón, qaq so 'arqaỹa Aarón, nache 'artaxaỹaxanaxanec. 2Nache 'am 'aua'axatem so Aarón 'enauac nam 'am samaxalec. Ime, nache somaye 'enapega ñi faraón, da ỹasheeta da ca'ai naqa'en ne'ena 'alhua na Israel le'ecpi. 3Qalaxaye aỹem, sanem da ỹataqta qaramchigui añi lquiyaqte ñi faraón, qataq so'ot na qalota na'anecpi qataq nam ỹo'ot da na'aalaxa na Egipto. 4Qaq ñi faraón saishet qome da qami' ỹoqocha'alo, qalaxaye aỹem sachaxana qome da ỹa'añaxac na Egipto, qataq serolec da lta'araic iuaxanaxanaxac, nache ñeqateeguesop namaye nam ñalleppi, qataq nam ỹalamaxatpi maye llalaqpi so Israel. 5Qaq qom mashe ime da sachaxana da ỹa'añaxac na Egipto, qataq qom mashe ñeqateeguesop namaye na Israel le'ecpi, huaña, nache na Egipto le'ecpi ỹaỹaten da aỹem maye Nachaỹem Nataxala'.»
6Nache so Moisés qataq so Aarón ỹo'o't 'enauac nam ỹamaxaleguete Ñim Nataxala'. 7Qaq so Moisés mashe ivi' soua ochenta vi'iye da nachaalataxac, qaq so Aarón mashe ivi' soua ochenta y tres vi'iye da nachaalataxac, co'ollaq detaxairapegue' so faraón.
Aso lashelte so Aarón
8Nache Ñim Nataxala', 'enapega so Moisés qataq so Aarón, 'eeta':
9«Ñi faraón qom iỹaxanaique da qaỹo'ot ca na'anec maye ỹo'ot da na'aalaxa, nache 'am qonapega qome da Aarón da ỹacona aca lashelte. Ime, qaq ỹasaxauec, ỹauaachigui naqa'en ñi faraón, yaqto' nañigui na na'araxanaq.»
10Nache so Moisés qataq Aarón je'c da nqo'ooreua'a so faraón. Ime, nache ỹo'o't 'enauac dam ỹamaxaleguete Ñim Nataxala'. Nache so Aarón, ỹasaxauec aso lashelte, ỹauaachigui naqa'en so faraón qataq so ltauapi. Nache asa'aso nashelte nañigui na na'araxanaq. 11Nache so faraón damaxasoxoneuga so ỹaanaxanaxaicpi qataq som 'oiquiaxaipi. Nache somayepi nataqa'en do'onataxana da lo'oiquiaxac da ỹe'enaxa't soomaye: 12qaq ñi 'oonolec somayepi nache ỹasaxauec aso lashelte, nache aso nasheltepi nañigui na na'araxanaq. Qalaxaye aso lashelte so Aarón nache chec 'enauac aso lasheltepi se'eso ỹaanaxanaxaicpi qataq so 'oiquiaxaipi. 13Qalaxaye ñaqaiyeta so faraón ñaq queta da ỹataqta qaramchigui, nache saishet da iqocha'alo soomaye, qaq ỹataqta ipacchigui da la'aqtac Ñim Nataxala'.
Qaiuaxanaxana so ntago'q
14Ime, nache Ñim Nataxala' 'enapega so Moisés, 'eeta':
«Ñi faraón ỹataqta qaramchigui, qataq saishet da ỹashen da jec na Israel le'ecpi. 15Qalaxaye qonte' nte'etom, nache qojec qome, yaqto' ñimaye qom naxaama ye tala nache 'anauane'. Qataq nache 'auata'aguet qome, qoueto'ot na loigue so tala, qaq nache 'auachetac qome aca 'arashelte maye nañigui co'ollaxa na na'araxanaq. 16Qaq nache huaña yemaye qome, da qonapega, qoneta': ‹Ñim Nataxala' maye Natamnaxala' na hebreopi, Ñimaye aỹem namaq da 'am shenapega da 'aua'aqta'a na lalamaxatpi Ñimaye da taỹa ye toolec 'alhua da natamnot. Qalaxaye ñaq 'eetalec nagui da saishet da 'aualaq› 17Qaq ỹoqo'oye Ñim Nataxala' da la'aqtac, 'eeta': Nagui nache chegoqchiguiña de'era so'ot, da yaqto' 'am 'auaỹateeta da aỹem maye Nachaỹem Nataxala'. Qaq ỹoqo'oye ana'ana nashelte maye ñasoqta'a, seuaxaangui qome na 'etaxat na tala, yaqto' na 'etaxat nañigui ntago'q. 18Qataq nache ileu na nỹaqpi maye huetangui na tala, nache na tala ỹataqta qauem qome na laita, nache na Egipto le'ecpi ivira'a qome da ỹataqta deqaiga da nỹomgui na 'etaxat maye le'ec namaye.»
19Qataq Ñim Nataxala', nataqa'en 'enapego' so Moisés, 'eeta':
«Qonapega qome ñi Aarón da ỹacona aca lashelte. Ime, qaq ỹachaxaasheguem na lhuaq, naloqteetelec naqa'en na tala, qataq na la'auaxacpi, qataq na qa'aimpi, qataq ana laỹe' na laquip na Egipto le'ecpi, qataq 'enauac anam huetangui na 'etaxat, da yaqto' nañigui na ntago'q. ¡Yaqto' huo'o qome na ntago'q ivira'a nataqa'en na huetagui ana naco'oñapi maye 'epaq qataq coma'!»
20Nache so Moisés qataq so Aarón ỹo'o't 'enauac nam ỹamaxaleguete Ñim Nataxala'. So Aarón ỹachaxaasheguem aso lashelte, nache iuaxangui so 'etaxat so tala, ỹauaachigui naqa'en so faraón qataq so ltauapi. Nache 'enauac so 'etaxat so tala nañigui na ntago'q. 21Nache ileu so nỹaqpi maye huetangui so tala, nache se'eso tala ỹataqta nchega na laita, qaq ỹoqo'oye so Egipto le'ecpi saishet da nỹomgui na le'ec somaye. ¡Qaq nache 'enauac ye Egipto huo'o na ntago'q!
22Qalaxaye na 'oiquiaxaipi ye Egipto nataqa'en do'onataxana da lo'oiquiaxac, ỹe'enaxa't soomaye. Qaq ỹoqo'oye so faraón ñaq 'eetalec da qaramchigui añi lquiyaqte. Qataq saishet da ỹoqocha'a de'era, qaq ipacchigui da 'enapec co'ollaxa Ñim Nataxala'. 23Nache so faraón ỹe'eguelaxaua'a so lma' lta'araic, qataq saishet da huo'o ca ỹanaigui de'era. 24Nache 'enauac so Egipto le'ecpi ỹo'ot ana lshere, ỹano'oto naua loiguiye so tala, da yaqto' nqatsheguem na no'on 'etaxat, cha'aye na 'etaxat so tala saishet da qanỹomigui.
25Qaq co'ollaq inoxoorec soua siete na'axa'te da Ñim Nataxala' na'axat na 'etaxat so tala.
