1Qaq ime nache sela'a na pa'asheguem som 'eco' 'eeta'am na lapoxot maye nalotcheguema naua lqaigo soua huo'oi naua laua't, da huo'o so netalec 'eeta'am aca so'onaxaqui maye chegaqaigui na coma' zafiro. 2Nache Ñim Nataxala' 'enapega so ỹale maye ỹaatrañi soua alogo maye chegaqaigui na lino, 'eeta': «'Aiguilo qome naua lasaxanna añi naigona, maye hueto'oto na mpa'aguiñi daua huo'oi naua laua't, ime nache 'auaconalo caua saq 'amaqta'q aye poqopi maye 'ettaigui maye huetangui na laiñi daua huo'oi naua laua't, nache 'aulagaxaalec na huaqta'a't nỹecpi.» Qaq aỹem sauaachigui da 'eetec so ỹale da taiguilo soomaye. 3Qaq nache huetoigui da se'esoua huo'oi naua laua't pa'atra'ague da taguiñi aso atamnaxaqui, qaq huo'o so lo'oc na piguem da nlaxalec naqa'en so qasoxoc pa'aỹauo. 4Huaña nache da llo'oxoyec Ñim Nataxala', ca'ai na pa'asheguem soua huo'oi naua laua't, nache jec taỹa so ñegueuo aso atamnaxaqui, nache so lo'oc na piguem nlaxagui naqa'en aso atamnaxaqui, qaq da lqashelgaxa da llo'oxoyec Ñim Nataxala' icoỹarelec so qasoxoc. 5Qaq soua huo'oi naua laua't, qalaq ivirauga so qasoxoc pa'aỹauec da l-lamaxa naua laua't. Qaq 'eeta'am da nacheñi Ñim Lo'onatac 'Enauacna maye Qaica ca Ỹaqalanapec da detaqtac. 6Huaña nache Ñim Nataxala' 'enapega so ỹale maye ỹaatrañi soua alogo maye chegaqaigui na lino, da ỹacona so norec maye huetaiguilo soua lasaxannal maye huetangui na laiñi soua huo'oi naua laua't. Nache se'eso ỹale jec nache huaqte' aso 'oonole soua saxannal. 7Qaq huaña nache so 'oonolec soua huo'oi naua laua't ỹaconeua so norec, nache so ime da ỹaconeua'a so norec nache ỹachaigui na lhuaq som ỹaatrañi soua alogo maye chegaqaigui na lino, nache somaye ỹaconeguet so norec nache pa'auec. 8Qaq na pa'aguiñi naua laua't, soua huo'oi naua laua't, qalaq yo'oqta so nhuaq maye 'eeta'am na lhuaq na shiỹaxaua. 9Qaq aỹem samata'a nache sela'a da ñi 'oonolec soua huo'oi naua laua't huaqta'ai'salo soua cuatro saxannal, qaq da lataxac se'esoua saxannal qalaq 'eeta'am na coma' crisólito. 10Qaq se'esoua cuatro saxannal qalaq 'eeta'a't da lataxa'c, qaq añi 'oonole soomaye qalaq 'eeta'am da netaigui aso lỹa. 11Qaq soua huo'oi naua laua't da je'c da taregue ca 'oonolec naua cuatro laỹel, nache saiuen da ncolliiyiñi, nacherata da nache tatra'ague dam dataigue som qaica'attaueegue. 12Qaq 'enauac da lo'ocỹaxa'c, naua l-laxaye, naua lhuaxaye, qataq naua laua't da nlaqchiguilo ana la'aitepi, qaq nache 'eeta'ama nataqa'en soua cuatro saxannal. 13Qaq aỹem ishet da sa'aqchigui da se'esoua saxannal le'enaxa't da «naigona». 14Qaq ñi 'oonolec se'esoua huo'oi naua laua't, qalaq cuatro naua lashego, so hua'auchiguiñi qalaq 'eeta'am na lashec na huaca lhuaraic, qaq so ca'atalec qalaq 'eeta'am na lashec na shiỹaxaua, qaq so lỹa qalaq 'eeta'am na lashec na llon, qaq so pa'atec qalaq 'eeta'am na lashec na vi'ic. 15Qaq se'esoua huo'oi naua laua't, nachesoua soua selota'alo co'ollaq huaña ye loigue so tala Quebar.
Qaq se'esoua huo'oi naua laua't je'c, 16nache soomaye naxa da je'c, nache nataqa'en soua saxannal je'c, qaq naxa da ỹauachiguilo naua laua't da yaqto' naỹoyeshegue'm nache soua saxannal saishet da iỹotre'c soomaye. 17Qaq naxa da vi'iigueta nache nataqa'en soua saxannal da vi'iigueta, qaq naxa da naỹoxooyeshegue'm nache nataqa'en soua saxannal da naỹoxooyeshegue'm, cha'aye soua saxannal nache na'atta'agueta da lca'alaqa' soomaye. 18Qaq huaña nache da llo'oxoyec Ñim Nataxala' ca'ai na pa'asheguem aso atamnaxaqui, nache jec da nalec na pa'asheguem soua huo'oi naua laua't. 19Qaq soomaye ỹauachiguilo soua laua't nache huaỹoi', qaq nataqa'en soua saxannal je'c huetreua'alo naua laỹel soomaye, nache neraña so lasom añi atamnaxaqui maye lalamaqte Ñim Nataxala' maye pa'aigue da nala' lliguisheguem. Qaq da llo'oxoyec Ñim Natamnaxala' na Israel le'ecpi huetaleguete soomaye. 20Qaq se'esoua huo'oi naua laua't nachesoua soua huo'o da lca'alaqa' maye sela'alo co'ollaq huaña ye loigue so tala Quebar huetro'ot Ñim Natamnaxala' na Israel le'ecpi. Qaq huaña nache ñetooneque da 'eeteque soomaye. 21Qaq ñi 'oonolec soomaye qalaq cuatro naua lashego, qataq cuatro naua laua't, qaq na mpa'aguiñi naua laua't qalaq yo'oqta so 'eeta'am na lhuaq na shiỹaxaua. 22Qaq naua lashego soomaye, qalaq 'eeta'ama naua lashego soua huo'o da lca'alaqa' maye sela'alo co'ollaq huaña ye loigue so tala Quebar. Qaq ñi 'oonolec soomaye qalaq ỹalemaqtec da je'c.
