So lainec Ñim Nataxala'
1Ñim Nataxala' aỹem 'enapega, 'eeta': 2«'Am Ezequiel, 'auamata'a qome ye Jerusalén, nache 'aua'axata'a qome dam taỹa'a yem atamnaqa'pi yemaye, qataq dam taỹa'a ye 'alhua ye Israel, 3nache qonapega, qoneta': Da la'aqtac Ñim Nataxala', 'eeta': Aỹem ñechoxot da 'am sataỹa'aguet. Aỹem ñeqatsheguem qome na ỹainec, nache salauat na no'on da lataxac, qataq na qauem da lataxac. 4Aja', ñeqatsheguem qome na ỹainec, nache salauat 'enauac no'on da lataxac qataq na qauem da lataxac, chegoqchiguiña ye sheu' nache ivitta'a da taguiñi. 5Qaq huaña qome nache 'enauac na shiỹaxauapi ana 'alhua ỹaỹaten da Aỹem, nachaỹem Nataxala' ñeqatsheguem na ỹainec, nache saishet da qaltaq she'eguelaxaañi. 6Qaq 'am shiỹaxaua, 'ana'axannec qome da 'annoinaxac, souaxat da lqui'ic añi 'arquiyaqte, 'anỹen qome 'am ỹauaachigui 'anqa'en 'enauac na nhuo' le'ecpi. 7Qaq qom 'am qainat da ta'ainco' da 'anỹeetac, nache 'aua'axat dam na'axaỹaxac maye mashe yaqta'a da yo'oq, nache 'enauac qome na shiỹaxauapi ana 'alhua qaica ca la'añaxac, qataq ñaxanguilo naua lhuaxaye, nache qaica qome ca huo'o da 'enec qanqa'en, nache 'enauac qome na shiỹaxauapi cholaxa'n naua l-llecte souaxat da lcolanaxa. Qaq mashe ivita ye laloqo', qaq damaye yo'oq qome. Qaq 'era da ỹa'aqtac Aỹem Nataxala'.»
8Ñim Nataxala' qaltaq aỹem 'enapega, 'eeta': 9«'Am shiỹaxaua, 'auachegoxotchigui da ỹe'enaxat da 'aua'aqtaxan, nache 'aua'axat da Aỹem Nataxala' 'am samaxalec de'era maye 'eeta':
¡Ca ỹeelonec, ca ỹeelonec! Camaye mashe qaiqueuocta,
qataq mashe qaiỹo.
10Qaiqueuocta da yaqto' qaỹalaataxana,
qataq qaiqashelgaxatta da yaqto' qashelectapiguiñi,
11Qaiqashelgaxatta da yaqto' ishet da huo'o ca nasoqchigui.
Ca ỹeelonec mashe ỹaxaraic qataq qashelec qanqa'en,
da yaqto' qoỹanem ca laataxanaxaic da nasoqchigui.
12Qaq 'am shiỹaxaua, ¡'aua'alaq qome
qataq 'anỹen souaxat da 'anqui'ic,
cha'aye ca ỹeelonec taỹa'a da ỹalauat na ỹalamaxat nhuo' le'ecpi,
qataq 'enauac na nta'alpi ye Israel!
Namayepi taỹa'a da qaỹalauat, lỹangui' na ỹalamaxat nhuo' le'ecpi,
qaq ỹoqo'oye 'anhuaxaata'a qome ana 'artogue souaxat da 'anqui'ic.
13Qaq 'era da ỹa'aqtac Aỹem Nataxala'.
14'Am shiỹaxaua, 'auachegoxotchigui qome da ỹe'enaxat da 'autaqa,
nache, qonapega ca ỹeelonec da deque'emaqtaxan,
ỹe'eguelaqtalec qome da deque'emaqtaxan.
Cha'aye que'eca ỹeelonec camaye dalaataxan,
cam huo'o da lchec ỹeelonec maye nalaataxanaxat,
maye ỹareetalec 'enauac na shiỹaxauapi maye hueta'alo naua pa'aiguelo.
15Qaq camaye ỹataqta nlaxatchigui naqa'en da lcolanaxa namayepi,
qataq ỹataqta qalota qome ca lalaatacpi.
'Enauac na lma'pi namayepi, sanaña ca ỹeelonec maye laataxanaxaic.
Cam ỹeelonec maye qaiqashelgaqchet
da yaqto' chegaqaigui ca nqashelgaxa,
qataq ỹaxaraic da yaqto' dalaataxan.
16¡'Aualauat na pa'aigue na 'oic
qataq na pa'aigue da 'ane'emaq,
qataq 'enauac nam hueta'a na pa'aiguelo!
17Qaq nataqa'en Aỹem seuaxaata'a't qome naua ihuaxaye
choche ivitta'a da vi'iiguet da ỹayeloxo.
Qaq 'era da ỹa'aqtac Aỹem Nataxala'.»
18Ñim Nataxala', qaltaq aỹem 'enapega nache, 'eeta': 19'Am Ezequiel, 'avi'inaxa't qome caua dos nqa'aico, da yaqto' queteguelo qome ñi nta'a ye Babilonia da nasoqta'a ca lainec. Que'ecaua dos nqa'aico iuen da nallegoqtreua'a qome ne'ena 'alhua, nache ye chegoqchiguiña ñi 'oonolec que'ecaua nqa'aico, nache 'auauo'o ca la'anaxat maye ỹa'axat negue't cam taỹa'a huaqta'a't nỹecpi. 20Qaq iuen da 'auachaxan qome ca nqa'aic maye taỹa'a yem Rabá maye lma' na amoniitapi, qataq ye Jerusalén, yem huaqta'a't nỹecpi maye qampaxattaua'a ye Judá. 21Qaq ñi nta'a ye Babilonia qom ivita ye chegoqchiguiñalo se'esoua dos nqa'aico, nache vi'iiguet qome, nache nnate' nam ilaviigui ca lỹa, qataq ichegoq ana lchecnapi, qataq nnate' nam lqolacpi, qataq imeten na l-lamec na shiguiỹacpi. 22Qaq aca 'oonole checna maye huetaigui na lhuaq aloiguishec, ỹachaxan qome so nqa'aic maye taỹa'a ye Jerusalén, qaq huaña nache ỹaỹaten da iuen da iloquiaxan yemaye, ỹauota'a na lo'ogoxonaxatpi da deloqui, qataq damaxasoxon da qaỹo'ot ca nalaataxanaxac, qataq ỹa'alaqtagui da nalat, qataq qailaxachigui na lasompi, qataq ỹo'ot na lliguisheguempi, qaq nache imauec da coleesop yemaye. 23Qalaxaye na shiỹaxauapi ye Jerusalén, 'eeta'am qome naqa'en da choche natenataxanaxac de'era na'aqtaxanaxac, cha'aye souaxat dam naỹamaxate' co'ollaxa ñi nta'a ye Babilonia. Qalaxaye de'era ỹoqta 'eesa da souaxat na lasouaxashet namayepi, nache qaỹa'axata'a da nanoxonaguec. 24Qaq ỹoqo'oye Aỹem Nataxala', sheeta': «Nam qauempi qataq da qaralaataxanaxaqui damaye mashe qaila'a nam qarasouaxashechi maye qauo'ocheetac mashe ya'aqlec. Qaq ỹoqo'oye qami' noxonqa qome. 25Qaq 'am nta'a na Israel maye 'am laataxanaxaic, mashe 'am nayeeta'a ye laloqo' ca pa'atec 'anhuaxanaguec. 26Qaq Aỹem Nataxala', shenapec: Qanqat qome na 'arqaic laxataxat, qataq qaiuotaxanec ana 'anaro'o, qaq 'enauac qome da dalaxaic da lataxac. Nam qaica ca la'amaqchec qalaq huo'o qome da la'amaqchec, qaq nam huo'o da la'amaqchec qalaq qaica qome ca la'amaqchec. 27Qaq 'enauac qome da nlachiguiñi ne'ena huaqta'a't nỹecpi, nache 'enauac imeuo qome. Qaq de'era yo'oq qom ivita ca laloqo' da anac cam sepataxalec da ỹo'ot cam nalochiguiñi lataxac.
Da nhuaxanaguec na Amón le'ecpi
28'Am shiỹaxaua, 'auachegoxotchigui da ỹe'enaxat da 'aua'aqtaxanem da ỹa'aqtac na Amón le'ecpi maye isheueetac naxa na Israel le'ecpi, da ca ỹeelonec mashe qanqateeguesop ca laỹe': mashe lhuotta da qaỹalaataxana, qataq qashelecteguiñi da yaqto' chegaqaigui ca nqashelgaxa, nache ilaxachigui nam huo'o. 29Qaq nam lauanaqchecpi qalaq saq'en qataq naua la'aqtaxanaxaco qalaq choche ashepegaxanaxaco. Ca ỹeelonec qalaq ipelecot qome na lqosot nam qauemaicpi laataxanaxaicpi. Mashe saqaỹapeque ca laloqo' cam pa'atec nhuaxanaguec. 30¡'Am ỹeelonec 'avi'eguelaxangui qome ca 'araỹe'! ¡Cha'aye yem 'alhua maye 'arañoqo' co'ollaxa, yem huaña co'ollaq 'am qanqassheguem, nache huaña qome da 'am ñemit! 31Aỹem 'am sematalec qome da ỹayeloxo, 'eeta'am ca chaqaic norec, qataq 'am saneguet da lhuaqỹaxac na shiỹaxauapi maye qauemaicpi, qataq sanqalat da huo'o na ilaxachigui. 32Nache 'am ỹavicta qome qataq 'am dolachigui, na 'artago'q qalaq laguelec qome 'enauac ne'ena 'alhua, qaq nache qaica qome ca 'am iuennatega. Qaq 'era da ỹa'aqtac Aỹem Nataxala'.»
