Da na'aqtaguec da lle'etaxaloxo na Israel le'ecpi
1Qaq so na'a'q diez so ca'agoxoic cinco som vi'i siete, nache huo'oi soua nqueroxonqa maye nataxala'ate ye Israel, ana'c da huotaique da na'aqtaxane' Ñim Nataxala', nache nso'ooyiñi aỹem datatro'ot. 2Nache Ñim Nataxala', aỹem 'enapega, 'eeta': 3«'Am shiỹaxaua, qonapegalo ne'enaua nqueroxonqa maye lataxala'ate na Israel le'ecpi, qoneta': 'Era da la'aqtac Ñim Nataxala': ¿Qami' qauanaqui da Aỹem qaunache? Qaq Aỹem Nataxala' ñañan da san da ỹa'aqtac, da saishet da qami' ña'aqtaxaneto. 4Qaq 'am shiỹaxaua, maiche qouapegueto da 'anmi't naamaye, nache 'auaỹaanaxaneque nam ỹataqta qaiqaiga maye ỹo'ot co'ollaxa so lta'alpi. 5Qataq qonapega, qoneta': 'Era da la'aqtac Ñim Nataxala': Co'ollaq lleca'aua'a na Israel, nache sanem so ỹa'aqtac som chegoxoguetpi namayepi, qataq ñachaxana somayepi co'ollaq huaña ye Egipto. Nache sachaxaasheguem na ihuaq nache san so ỹa'aqtac sheeta': Aỹem nachaỹem Natamnaxala' maye Qanatamnaxala'ai. 6Qaq se'eso na'a'q nache huetoigui co'ollaxa da ñañan da ñeqateeguesop somayepi ye Egipto, nache sauega yem 'alhua maye imitaqteguishec, yem 'alhua maye huaña da saqoue na huaca lche' qataq na dapic lli'i 'eeta'am na 'etaxat, ¡yem 'alhua maye napacalec da lyac na laỹepi 'alhuapi! 7Nache 'enauac co'ollaxa saishet da huo'o ca seỹotauga da samaxalec da ỹaxanec nam nqaigaxat natamnaxala'pi, qataq da na nqolacpi ye Egipto saishet da ishepaxanaqchet da lataxac namayepi, cha'aye Aỹem Nataxala' nachaỹem Natamnaxala'.
8Qalaxaye somayepi Aỹem dataỹa'aguet co'ollaxa, nache saishet da Aỹem na'axaỹaxana, saishet da ỹaxanec na nqaigaxat natamnaxala'pi, qataq saishet da ca'ai na nqolacpi maye lalamaxat ye Egipto. Qaq Aỹem iuennataxac co'ollaxa da sematalec da ỹayeloxo somayepi, qataq da sauo'o ca nhuaxanaguec da huaña ye Egipto, choche ivitta'a da samachiguiñi da nmisheguem da ỹayeloxo. 9Qalaxaye souaxat da la'amaqchec da ỹe'enaxat, qataq yaqto' saishet da qauem da na'aqtaguec namayepi da ỹalectaigui na ỹotta'a't shiỹaxauapi, cha'aye nache ỹalecta'aguet co'ollaxa ne'ena ỹotta'a't shiỹaxauapi co'ollaq ñachaxana namayepi, qataq co'ollaq sachaxanapeguem da ñeqateeguesop ye Egipto. 10Qaq Aỹem nache ñeqateeguesop co'ollaxa ye Egipto nache sauega ye toolec 'alhua; 11qaq huaña yemaye nache sachaxana na iqataxacpi qataq na ỹamaxasoxonaxacpi, maye ỹanem da lca'alaxa cam ỹo'ot namayepi. 12Qataq nataqa'en sanem co'ollaxa da ỹauatton ye na'a'q mataxaqui da yaqto' la'anaxat da qanaỹamaxataxac somayepi qataq Aỹem, qataq yaqto' ỹaỹateeta da nachaỹem da seỹotauga co'ollaxa da yaqto' ỹalamaxat. 13Qalaxaye namayepi Aỹem dataỹa'aguet co'ollaq huaña ye toolec 'alhua, nache sa ỹalaxaguet na iqataxacpi, qataq saỹaconeguet nam ỹamaxasoxonaxacpi maye sanem co'ollaxa, da yaqto' da ipaqueelec namayepi nache huo'o da lca'alaxa, qataq ishepaxanaqchet co'ollaxa ye na'a'q mataxaqui maye ỹalamaxat. Qaq huaña co'ollaxa nache huo'o da iuennataxac da sematalec namayepi da ỹayeloxo, qataq da ñematchiguiñi da huaña ye toolec 'alhua, 14qalaxaye souaxat da la'amaqchec da ỹe'enaxat, nache saishet da so'ot damaye, qataq yaqto' saishet da saiyacnapec da ỹe'enaxat nam ỹotta'a't shiỹaxauapi maye ỹauaachigui co'ollaq ñeqateeguesop ye Egipto namayepi.
15Qaq nataqa'en nache huaña co'ollaxa yem toolec 'alhua da sanem so ỹa'aqtac namayepi, da saishet da huenoxoneua'a ñaqa'en yem 'alhua maye sanem co'ollaxa, yem 'alhua maye qaica ca 'ena'am da lyac, qataq huaña da saqoue na huaca lche', qataq na dapic lli'i, 16cha'aye saỹaconeguet co'ollaxa na ỹamaxasoxonaxacpi, qataq saishet da ỹalaxaguet na iqataxacpi, qataq ishepaxanaqchet ye na'a'q mataxaqui maye ỹalamaxat, cha'aye da lquiyaqteỹaxac ca'attague' nam lqolacpi. 17Qalaxaye, huo'o co'ollaxa da ichoxonnataxanaxa namayepi, nache saishet da selaxachigui qataq da ñematchiguiñi co'ollaq huaña yem toolec 'alhua. 18Qaq nacherata co'ollaxa da shenapega som llalaqpi da saishet da ỹo'ot nam ỹamaxalecpi so lta'alpi, qataq nam lapaxaguenataxanaxacpi somayepi, qataq saishet da nshepaxanaqchet da lataxac somayepi souaxat na nqolacpi. 19Qataq shenapega co'ollaxa somayepi, sheeta': Aỹem nachaỹem Nataxala', maye Aỹem Qanatamnaxala'ai. Qoquiitelec qome na iqataxacpi, qataq na llapaxañi lataxacpi, 20qataq huo'o na 'enec qanqa'eñi ye na'a'q mataxaqui maye ỹalamaxat, da yaqto' la'anaxat da qanaỹamaxataxac, qami' qataq Aỹem, qaq huaña nache qauaỹacheñi da Aỹem nachaỹem Nataxala', maye Aỹem Qanatamnaxala'ai.
21Qalaxaye nataqa'en som llalaqpi somayepi Aỹem saỹalaxaguet co'ollaxa. Saishet da ỹalaxaguet na iqataxacpi, qataq saishet da ipaguelec, qataq saishet da ỹo'ot na ỹamaxasoxonaxacpi, maye ỹo'ot da lca'alaxa cam ỹo'ot namayepi, qataq ishepaxanaqchet ye na'a'q mataxaqui maye ỹalamaxat. Qaq huaña nache huo'o da iuennataxac da sematalec da ỹayeloxo somayepi, qataq da ñematchiguiñi da huaña ye toolec 'alhua, da yaqto' vi'iiguet da ỹayeloxo, 22qalaxaye sha'axaneguet co'ollaxa damaye, souaxat dam la'amaqchec da ỹe'enaxat, yaqto' saishet da saiyacnapec da ỹe'enaxat nam ỹotta'a't shiỹaxauapi, maye ỹauaachigui co'ollaq ñeqateeguesop ye Egipto namayepi. 23Qaq huaña co'ollaxa yem toolec 'alhua da sanem so ỹa'aqtac, da selagaxatapec somayepi da yaqto' taỹa nam ỹotta'a't shiỹaxauapi ana 'alhua, 24cha'aye saishet da ipaguelec nam ỹamaxasoxonaxacpi, qataq saỹaconeguet nam iqataxacpi, qataq ishepaxanaqchet ye na'a'q mataxaqui maye ỹalamaxat, nacherata da quetague' na lqolacpi so lta'alpi. 25Qaq ivira'a da sanem da quegue nam nqataxacpi maye saishet da no'on, qataq nam namaxasoxonaxacpi maye saishet da ỹachegoxotaigui ca lca'alaxa. 26Qataq sa'aqta'a da nshepaxan da lataxac, souaxat da ỹaatacot ana lachetaqtaxanaqtepi na nqolacpi, qataq ỹaneuo na ỹepi llalaqpi da lachetaqtaxanaxat qaỹavigaxatta. Qaq damaye so'ot da yaqto' namayepi nlaxagui da lcolanaxa, qataq yaqto', Aỹem ỹauatton da nachaỹem Nataxala'.
27‹Qaq 'am, shiỹaxaua, qonapega qome na Israel le'ecpi, qoneta': 'Era da la'aqtac Ñim Nataxala', 'eeta': Nataqa'en som qarta'ailpi Aỹem inogoqchet co'ollaxa, qataq aỹem saỹalaxaguet. 28Co'ollaq inoxoneua'a ñaqa'en yem 'alhua maye sachaxanapeguem co'ollaxa da sanem, nache naxa da choche ila'a ana lcomaraxalatepi, ana qo'oipaq maye qalochiguiñi ana lcouepi, nache huaña naxa da ỹauo'o ana lachetaqtaxanaqtepi maye qaỹavigaxatta, qataq ana laỹepi lachetaqtaxanaqtepi maye ỹataqta Aỹem inogoqchet, qataq ỹauo'o na lchenaxanaxat maye ama na laita, qataq icorec na lachetaqtaxanaxat lataxa. 29Qaq Aỹem senat co'ollaxa, sheeta': ¿ta'ainco' ye qa'aisheguemec naxa yi'iye qaỹoqotcheguemec atamnaqa' da qavio'oxoyeñi nam nqolacpi? Qaq nache chegoqchiguiña co'ollaxa se'eso na'a'q, nache ivitta'a nagui, da yi'iye atamnaqa' qaỹamata'ac da le'enaxat, natamnaqa' nam ỹaqa'a da la'amqaanataxanaxac. 30Qaq qonapega qome na nhuo' Israel le'ecpi, qoneta': Da la'aqtac Ñim Nataxala', 'eeta': ¿Ta'ainco' qami' da qauoitaique da nshepaxan qanqa'eñi da qarataxaqui, da qoñeeta'am som hua'au qarta'ailpi? ¿Ta'ainco' da Aỹem sa qaualaqaiguet, nache qavio'oxoyiñiitac nam nqolacpi maye nqaigaxat? 31Da qaỹa'añiitegueuo ana qarachetaqtaxanaqche, qataq da qaỹa'añi na qaỹa'alquipi da qaỹavigaxat, nache damaye ỹa'axat da qami' ña qoquiito'ot da nshepaxan da qarataxaqui, ¿qaq peta'a nachera da qaupicheetega da lataxac qami' Israel le'ecpi, da qauanaqui da Aỹem qaunache? Aỹem nataxala', maiche ñañan da san da ỹa'aqtac, da saishet qome da qami' ña'aqtaxaneto. 32Cha'aye mashe taigui ye qarhuennataqai, da qauauoitaique da qoñeeta'am na laỹepi ỹotta'a't shiỹaxauapi ana 'alhua, maye ỹo'oxoreetac na 'epaq qataq na coma', qalaxaye saishet qome da 'eetec de'era. 33Cha'aye Aỹem Nataxala', maye Qanatamnaxala'ai, maiche ñañan da san da ỹa'aqtac, da qami' selo'oguelo qome sauota'a da ỹa'añaxac, qataq sachaxanec na ihuaq, qataq ñashetcheguem da inogoxonaxac, 34nache qami' ñeqateeguesopa nam nhuo' le'ecpi, qataq nam 'alhuapi, maye qoviita'a da qanlagaxacheetac, nache qami' llaỹona't sauota'a da lta'araic ỹa'añaxac, qataq ñashetcheguem da inogoxonaxac. 35Da qami' sauegalo yem toolec 'alhua maye qaỹoqtaique na nhuo' le'ecpi, qaq huaña qome yemaye nache qami' sataigueta da qami' ñimi't. 36Qami' ñimi't qome 'eeta'am da 'eetec co'ollaq ñimit so qarta'ailpi, co'ollaq huaña ye toolec 'alhua ye Egipto. Qaq 'era da ỹa'aqtac Aỹem Nataxala'.
37Aỹem qami' ñimi't qome, 'eeta'am da 'eetec ca qagueta lo'o da naloqten aca lalopi qaguetapi, nache so'ot da qaupaquiitelec dam ñaỹamaxataxac. 38Nache qami' ñeqateeguesopa qome na saỹalaq, qataq nam 'oopaicpi, qataq qami' ñeqateeguesopa yem 'alhua maye qoñiitaña nagui, qalaxaye namayepi saishet qome da inoxoneua'a ye na'alhua na Israel le'ecpi. Qaq huaña qome nache qauaỹacheñi da Aỹem maye Aỹem Nataxala'. 39Qami' nhuo' Israel le'ecpi, da la'aqtac Ñim Nataxala', 'eeta': Qoquiito'ot qome da qavio'oxoyeñeetac na qarqolaquipi. Qalaxaye qom ime, nache qami' Aỹem qaualaqaiguet qome, nache saishet da qaltaq nshepaxan qanqa'eñi da qui'itta ỹe'enaxat da qauo'ocheetac ana qarachetaqtaxanaqchepi da qavio'oxoyeñeetac na nqolacpi. 40Qaq 'enauac qome na Israel le'ecpi da Aỹem ỹo'oxoren qom huaña añim qui'itta ñeqasoxonaxa, añim qaỹoqotcheguema qasoxonaxa ye Israel, maye netaigui ye ña'alhua. Qaq 'era da ỹa'aqtac Aỹem Nataxala'. Qaq huaña qome yemaye nache qami' saconegueta, qataq huaña yemaye da qami' shenapegalo da aỹem qaỹa'añiỹot aca qarachetaqtaxanaqchepi, qataq da aỹem qandoiua'a aca la'auaxana ala ca qa'añiguishequi, qataq 'enauac cam qauỹochiỹauga da aỹem qaỹa'añiỹot.›
41Qom qami' llaỹona't da qami' sachegoxotchiguiñalo nam 'alhuapi, qataq nam ỹotta'a't shiỹaxauapi maye qoñiitaña nagui da qami' laga't, qataq qom sachaxan da qui'itta ỹataxac qom qami' soota'agueta, ỹauaachigui ñaqa'en 'enauac nam nhuo' le'ecpi, nache huaña qome da saconeguet aca qarachetaqtaxanaqche maye ama da laitaỹaxac. 42Qataq qom qami' senoxonaqcheteua'alo ye Israel, yem 'alhua maye sachaxanapeguem co'ollaxa so hua'au qarta'ailpi, qaq huaña qome nache qauaỹacheñi da Aỹem nachaỹem Nataxala'. 43Qaq huaña qome yemaye, nache qauennache 'enauac nam qauem qauo'oche maye ishepaxanaqchet da qarataxaqui, nache maiche qauqaiquiỹa qome dam qarataqui souaxat nam qalota qauem maye qauo'oche co'ollaxa. 44Qami' nhuo' Israel le'ecpi qom so'onataxan da qami' setaua'n, qaq saishet da chegoqchigui ñaqa'en dam qauem qarataqui qataq dam qauem maye qauo'ocheetac, maye nacherata da so'ot damaye souaxat da la'amaqchec da ỹe'enaxat, qaq huaña qome nache qauaỹacheñi da Aỹem nachaỹem Nataxala'. Qaq 'era da ỹa'aqtac Aỹem Nataxala'.»
Da nhuaxanaguec yem 'alhua maye pa'aigue da taguiñi
45Ñim Nataxala', aỹem 'enapega, nache 'eeta': 46«'Am Ezequiel, ña 'auamata'ague da taguiñi, nache 'auatategue qome damaye da 'aua'aqtaxan, da 'aua'axat da 'eetec qome ye aviaq maye huaña ye 'alhua maye pa'aigue da taguiñi, 47nache qonapega, qoneta': Da la'aqtac Ñim Nataxala', 'eeta': Aỹem sauo'o qome ca norec da 'am shegueua'a, nache camaye nmatchiguiñi qome da ỹavigaxat ana qo'oipaqpi maye 'am netalec ana ñaq darala qataq ana deqaqta, qaq que'eca norec qom 'eroigui nache saishet da 'om, nache ỹavigaxat 'enauac ana qo'oipaqpi maye pa'aigue da taguiñi qataq da sheu'. 48Qaq 'enauac qome na shiỹaxauapi ana 'alhua, da ỹaỹaten da Aỹem Nataxala', nachaỹem da shegueua'a, qaq que'eca norec saishet qome da 'om.»
49Nache aỹem Ezequiel sasat, sheeta': «¡Aicoue 'Am Nataxala', 'enauac na shiỹaxauapi aỹem na'aqtaxaatapigui da nam sa'axattacpi qaica ca ỹaỹaaneguet!»
