So faraón qanaloqneguet aca cedro
1So la'auaxanec na'a'q so ca'agoxoic tres, so vi'i once, nache Ñim Nataxala', aỹem 'enapega, 'eeta': 2«Qonapega qome ñi faraón ñim nta'a ye Egipto, qataq 'enauac na ilotague' shiỹaxauapi, qoneta':
¿Negue't ca ishet da qanaloqneguet da 'ara'amaqchec?
3'Am qoneta'am ana ciprés
huo'otaq ana cedro maye naña ye Líbano,
maye no'on ana lcouepi maye ipelteetalec ye aviaq
qataq ỹataqta logorai nache iviro'ot na lo'oc na piguem.
4Na auot qataq na 'etaxat maye huetalec na 'alhua,
itauan co'ollaxa da nquictasheguem da lañaxataxac,
qataq coleesop co'ollaxa na talapi yem netaña asomaye
qaq na la'auaxacpi qalaq icottalec ana qo'oipaqpi maye hueta'a yi'iye 'alhua.
5Qaq souaxat da ỹataqta qalota na 'etaxat ye hueta'a,
nache nquictasheguem napacalec ana laỹepi qo'oipaqpi yi'iye aviaq,
qataq nquiguec ana lcouepi, nache ivira'a da ỹataqta qalochiguiñi.
6Qaq na ỹotta'a't maỹopi qalaq ỹanaigui na lpata'c ana lcouepi,
qataq na ỹotta'a't shiguiỹacpi maye huauec, nache hueto'ot da deco'o.
Qaq na lpaqal qalaq ishet da hueto'ot na qalota ỹotta'a't shiỹaxauapi.
7Asa'aso qo'oipaq ỹataqta 'onaxai qataq late'erai,
ana lcouepi qalaq ỹataqta logoraipi,
cha'aye na lpa'a'pi na'attaigui na qalota 'etaxat.
8Qaq ỹataqta aca cedro yem lanaxanaqa' Ñim Lo'onatac 'Enauacna
da ishet da qanaloqneguet asomaye,
qaca aca pino da ishet da 'eeta'am ana lcouepi asomaye,
qataq qaca aca castaño da ỹaguec ana laue da qanaloqneguet asomaye,
qataq qaca aca qo'oipaq ye lanaxanaqa' Ñim Lo'onatac 'Enauacna da 'eeta'am da lyac asomaye.
9Aỹem maye so'ot co'ollaxa da lyac qataq qalota ñaqa'en ana lcouepi,
qaq ana laỹepi qo'oipaqpi ye Edén, maye lanaxanaqa'
Ñim Lo'onatac 'Enauacna, qopitta'a co'ollaxa asomaye.
10Qaq ỹoqo'oye, da la'aqtac Ñim Nataxala', 'eeta': Aso qo'oipaq ivira'a co'ollaxa da ỹataqta logorai, nache so lsheenec iviro'ot na lo'oc na piguem, qaq souaxat da ỹataqta logorai, nache ỹataqta nlaxagui da ño'oxonnaxac. 11Qaq ỹoqo'oye Aỹem sheca'ai, nache saneguet qome da la'añaxac cam chegaqauec nataxala', nache camaye ỹo'ot qome ca nhuaxanaguec ipacchigui naqa'en nam qauem maye ỹo'otpi co'ollaxa. 12Cam chegaqauecpi maye ỹataqta qauemaicpi ichec qome, nache ỹalat ana lcouepi, nache huetalec qome ana qasoxonaxapi, ca'ameguepi, qataq na qa'aimpi yi'iye 'alhua, qaq 'enauac na shiỹaxauapi maye hueto'ot co'ollaxa na lpaqal asomaye, datauec qome nache ỹalat. 13Qaq na ỹotta'a't maỹopi anac qome da naigui aso qo'oipaq maye hua'axañi, qataq na ỹotta'a't shiguiỹacpi maye huauec, nnaalec qome ana lcouepi maye huetaiya'. 14Qaq huaña nache qaca aca qo'oipaq da nquictasheguem da lañaxataxac, na'aictaxa da hueto'ot na loigue ca 'etaxat qataq na'aictaxa da qaicottalec, qalaxaye saishet da ishet da iviro'ot na lsheenec na lo'oc na piguem. Cha'aye 'enauac da taỹa'a da ileu, nache taña na ỹataqta pa'aguiñi na 'alhua, da yaqto' ỹalecta'aguet na mashe huetangui ana huachiqui.
15Aỹem Nataxala', shenapec: Asa'aso qo'oipaq qom taña yem hueta'a na leuaxaicpi, nache so'ot qome da deqaqa aso qaỹoqchiguingui auaxai souaxat da laquicoxo, qataq sha'axaneguet na talapi qataq na la'auaxacpi na 'etaxat, qaq souaxat asomaye, nache so'ot da añi qasoxonaxa Líbano nlaxagui da laquicoxo, qataq deqaqa 'enauac ana qo'oipaqpi maye huetalec na no'onaxa. 16Qaq qom so'ot da taña yem hueta'a na leuaxaicpi da yaqto' ỹalecta'aguet ñaqa'en nam mashe ileupi, nache da l-lamaxa qom huañi, cholaxan naqa'en 'enauac na ỹotta'a't shiỹaxauapi. Qaq qom hueta'a yem pa'aguiñi na 'alhua, nache nomteguet da la'añaxac ana qo'oipaqpi maye huaña ye Edén, qataq anam ỹataqta 'onaxai qataq qaicottalec qo'oipaqpi maye huetalec añi qasoxonaxa Líbano. 17Nache nataqa'en l-llañe' qome da taña ca hueta'a na leuaxaicpi da yaqto' ỹalecta'aguet som ileuaigui co'ollaxa so alaataxac. Qaq som hueto'ot co'ollaxa na lpaqal asomaye qalaq nlagaxattac qome taỹa na ỹotta'a't shiỹaxauapi. 18Qaca co'ollaxa aca qo'oipaq ye Edén da ishet da qanaloqneguet da lyacỹaxac qataq da lalogaxa asomaye, qalaxaye nataqa'en l-llañe' qome ana laỹepi qo'oipaqpi maye naña ye Edén da taña na pa'aguiñi ana 'alhua, da yaqto' ỹalecta'aguet nam ỹaqa'a da la'amqaanataxanaxac, qataq som shiỹaxauapi maye ileuaigui co'ollaxa so alaataxac.
Qaq asa'aso qo'oipaq, nacheñi ñi faraón qataq 'enauac na shiỹaxauapi maye ilotague'. Qaq 'era da ỹa'aqtac Aỹem Nataxala'.»
