Ezequiel 32

₁So la'auaxanec na'a'q, so ca'agoxoic doce, so vi'i doce, nache Ñim Nataxala' aỹem 'enapega, 'eeta'. ₂«'Auo'on de'era no'onec maye lataxaua da huo'o ca ileu, da 'auo'onaxaalec ñi faraón ñim nta'a ye Egipto, qoneta':

₃Qaq 'era da la'aqtac Ñim Nataxala': Na'aictaxa da 'aualectaigui na qalota shiỹaxauapi, qalaxaye 'am sasaxalec qome ca ỹaleguec, qaq nacheca ca 'am serolec da 'am ỹoxonec. ₄'Am sauogonna'ata qome na lqaxaỹaxa, nache 'am sachetaiya' qoueta'aguet na 'alhua. Qataq so'ot qome da 'enauac na maỹopi 'am petalec, qataq na shiguiỹacpi maye huauec ỹataqta ỹaỹemec qome na 'arapat. ₅Qaq nam 'arapat maye nchega nlaqtelec qome ñaqa'en ana qasoxonaxapi qataq na ca'ameguepi. ₆Qataq sauota'a na 'artago'q da dapapta ñaqa'en na 'alhua, nache ivirasheguema ana qasoxonaxapi, qataq nlaxachigui naqa'en 'enauac na la'auaxacpi na talapi. ₇Qom 'am selaxachigui, nache so'ot da napalñi na piguem, qataq 'om ana huaqaañipi, qataq añi nala' so'ot da ỹapolec na lo'oc na piguem, qataq ñi ca'agoxoic saishet qome da ỹe'eguelaxa da 'eroigui. ₈Qaq souaxat 'am nache salamat qome 'enauac ana 'ettaiguipi maye hueto'ot na piguem, qataq ñelaxattelec qome na 'ana'alhua na napalaxa. Qaq 'era da ỹa'aqtac Aỹem Nataxala'.

₉Qaq de'era 'anlaqtaguec qom la'axaỹaxac nam hueta'a na 'alhuapi maye saishet da 'auauana, nache so'ot da daquico na qalota nhuo' le'ecpi. ₁₀Qaq souaxat 'am nache so'ot qome da lcolanaxa na qalota shiỹaxauapi, na lta'alpi qalaq 'enauac qome da nlaxagui da lcolanaxa qom ñaviguisheguem na ỹainec, da sataỹa'aguet namayepi. Qaq qom qouañi nache namayepi iviloxol souaxat da lcolanaxa da deqat da nachaalataxac. ₁₁Ñim Nataxala', 'eeta': Ca lainec ñi nta'a ye Babilonia 'am talec qome. ₁₂So'ot qome da na qalota 'arhuo' le'ecpi, huañi da que'emaxam ca lainec cam ỹataqta qaica ca iren alaataxaicpi. Qaq huaña nache ỹa'axaneguet da la'amaqchec ye Egipto, qataq nmatchiguiñi na qalota lauo' le'ecpi. ₁₃Qaq selaxachigui qome 'enauac na 'ana'atetpi maye nỹomtapigui na 'aralamaxat 'etaxat, nache na shiỹaxauapi, qataq na shiguiỹacpi, saishet qome da qaltaq imalaxattac souaxat da petapiguingui. ₁₄Qaq huaña nache so'ot da qui'itta na 'etaxat, nache qaica ca naxattac na talapi da ỹa'auatec 'eeta'am na aceite. Qaq 'era da ỹa'aqtac Aỹem Nataxala'. ₁₅Qaq ye Egipto qom she'eguelaxata da toolec, qataq qom qui'iteelec qaica ca netalec yi'iye 'alhua, nache huaña qome da ỹaỹaten da Aỹem nachaỹem Nataxala'.

₁₆Qaq 'era da no'onec da qaỹo'onaxaalec ca leuaxaic, qaq nachera da ishet da ỹo'on na ỹotta'a't 'alpi, qom nỹeelec ye Egipto, qataq na qalota shiỹaxauapi maye hueta'a yemaye. Qaq 'era da ỹa'aqtac Aỹem Nataxala'.»

₁₇So na'a'q quince, so ca'agoxoic doce so vi'i doce, nache Ñim Nataxala' aỹem 'enapega, 'eeta': ₁₈«'Am shiỹaxaua 'auauaxaiguet qome na 'alpi maye chegaqa'a na ỹotta'at shiỹaxauapi, da 'auo'on da no'onec da huo'o na ileu, da 'auo'onaxaalec ye qalota nhuo' le'ecpi ye Egipto, qataq na lataxala'pi, qoneta':

₂₀Namayepi huañi qome, nache l-llañe' som ileuaigui co'ollaxa so alaataxac, cha'aye qairolec so ỹeelonec, nache l-llañe' 'enauac so nalleppi. ₂₁Qaq so nataxala'pi maye ỹataqta 'añaxaicpi co'ollaxa, ỹaconeguet qome na Egipto le'ecpi qataq na ltauapi, qom huaña ye hueta'a da lo'onataxanaxac da nleuaxa, nache 'eeta': ¡Mashe nviyiñi namayepi! ¡Huetaiya', lauatañi' nam ỹaqa'a da la'amqaanataxanaxac, maye ileuaigui co'ollaxa so alaataxac! ₂₂Qaq 'iye ye Asiria, qataq 'enauac ye nalleppi, coleesop añi nhuachiqui yemayepi. Qaq 'enauac yemayepi ileuaigui co'ollaxa so alaataxac. ₂₃Yemayepi qailayingui añi ỹataqta qaỹoqtegue nshere. So nalleppi qalaq ỹo'ot co'ollaxa da lcolanaxa som ñaq nca'altauecpi, qalaxaye huañi nache ileuaigui so alaataxac, qaq nagui qalaq coleesop añi nhuachiqui ye Asiria.

₂₄Qaq 'iye ye Elam, qataq 'enauac ye nalleppi coleesop añi nhuachiqui yemayepi. Qaq 'enauac yemayepi da ileuaigui co'ollaxa so alaataxac, yem ỹaqa'a da la'amqaanataxanaxac huañi nache taigui ana 'alhua. Yemayepi ỹo'ot co'ollaxa da lcolanaxa na ñaq nca'altauecpi, qalaxaye nagui qaica ca la'amaqchec ỹalectaigui nam mashe huetangui ana huachiquipi. ₂₅Ye Elam, huetaiya' ỹalectaigui 'enauac ye nalleppi maye mashe ileu, qataq ỹalectaigui nam ỹaqa'a da la'amqaanataxanaxac maye ileuaigui co'ollaxa so alaataxac, qaq nagui qalaq coleesop añi nhuachiqui. Yemayepi ỹo'ot co'ollaxa da lcolanaxa na ñaq nca'altauecpi, qalaxaye nagui qalaq qaica ca la'amaqchec ỹalectaigui na mashe huetangui ana nhuachiqui. Qaq nache hueta'a yemaye da ỹalectaigui ye shiỹaxauapi maye qaỹalauat co'ollaxa.

₂₆Qaq 'iye ye Mesec, qataq ye Tubal, qataq 'enauac ye nalleppi coleesop añi nhuachiqui yemayepi, qaq 'enauac yemayepi ỹaqa'a da la'amqaanataxanaxac maye ileuaigui co'ollaxa so alaataxac, yemayepi ỹo'ot co'ollaxa da lcolanaxa nam ñaq nca'altauecpi. ₂₇Yemayepi saishet da ỹalectaigui yem hua'au na'añaxanecpi, maye lỹachiguiñi' co'ollaxa na lo'ogoxonaxatpi co'ollaq taña ye hueta'a da lo'onataxanaxac da nleuaxa, qataq na'axaatalec na lainecpi qataq napotaña ana lpaqtaxanaqtepi, co'ollaq ime da ỹo'ot da lcolanaxa nam ñaq nca'altauecpi.

₂₈Qaq 'am Egipto, 'iye ye qoueta'a qome, da 'aualectaigui na ỹaqa'a da la'amqaanataxanaxac, 'am dolachigui qom 'am qailareñi da 'aualectaigui yem ileuaigui co'ollaxa so alaataxac.

₂₉Qaq 'iye ye Edom, qataq ye lta'alpi qataq ye lataxala'pi. Qaq na'aictaxa da ỹataqta 'añaxaicpi co'ollaxa, qalaxaye nagui ỹalectaigui yem ileuaigui co'ollaxa so alaataxac, qailattañi ỹalectaigui ye ỹaqa'a da la'amqaanataxanaxac maye mashe huetangui ana nhuachiquipi.

₃₀Yemaye nache hueta'a 'enauac yem nataxala'pi maye lma' co'ollaxa da sheu', qataq 'enauac yem lma' co'ollaxa ye Sidón. Yem ỹataqta 'añaxaicpi, qataq ỹo'ot co'ollaxa da ncolanaxa, qalaxaye nagui qalaq taña yem hueta'a yem ileuaigui co'ollaxa so alaataxac, qaq ỹachichiguiñi da ne'enaguec. Yemayepi ỹaqa'a da la'amqaanataxanaxac, qalaq qailattañi nache qaica ca la'amaqchec da ỹalectaigui yem ileuaigui co'ollaxa so alaataxac, yem mashe huetangui ana nhuachiquipi. ₃₁Qaq ñim faraón qataq na nalleppi qom ilalec yemayepi, nache machiguiñi, cha'aye 'enauac so nalleppi ileuaigui so alaataxac. Qaq 'era da ỹa'aqtac Aỹem Nataxala'. ₃₂Qaq na'aictaxa da ñi faraón qataq na nalleppi da ỹo'ot co'ollaxa da lcolanaxa na ñaq nca'altauecpi, qalaxaye nataqa'en ñimaye qataq na nalleppi da huetaiya' qome ỹalectaigui yem ỹaqa'a da la'amqaanataxanaxac maye ileuaigui co'ollaxa so alaataxac. Qaq 'era da ỹa'aqtac Aỹem Nataxala'.»