Qaỹa'axata'a dam talec qome añi qasoxonaxa Seír
1Ñim Nataxala' qaltaq aỹem 'enapega, nache 'eeta': 2'Am Ezequiel, 'auamata'a qome añi qasoxonaxa Seír, nache 'aua'axata'a dam taỹa'a añimaye, 3nache qoneta':
Da la'aqtac Ñim Nataxala', 'eeta':
Aỹem ñechoxot da 'am ñepa'aguenaxaua 'am qasoxonaxa Seír,
qaq sauo'o qome ca 'anhuaxanaguec, nache 'am toolec qataq 'anlachiguiñi ñaqa'en.
4Aỹem selaxachigui qome na 'aralamaxat huaqta'a't nỹecpi,
nache 'avi'eguelaxa da 'am toolec.
Qaq huaña qome nache 'auaỹaten da Aỹem nachaỹem Nataxala'.
5'Am chochaq tatec co'ollaxa da 'ampa'aguenaxaua na Israel le'ecpi, qataq 'auloquiaxaatac co'ollaxa namayepi, co'ollaq talec so pa'atec nhuaxanaguec souaxat na lasouaxashet. 6Qalaxaye Aỹem Nataxala' maiche ñañan da san da ỹa'aqtac, da 'am saneguet qome ca nleuaxa, nache que'eca nleuaxa 'am icaateguiñi' qome. Cha'aye 'arasouaxashet da huo'o da nleuaxa, nache de'era nleuaxa 'am icaateguiñi' qome. 7'Am qasoxonaxa Seír, 'am she'eguelaxata qome da 'am toolec qataq 'am nlachiguiñi, nache saishet da huo'o ca sashenem da 'am ỹa'axasoxoolec. 8Qataq so'ot qome da ana 'am hueta'a qaỹoqotcheguemec 'alhuapi, qataq ana lcomaraxalatepi, qataq na ca'ameguepi, qataq na talapi, nlaqchigui qome na leuaxaicpi maye ileuaigui ca alaataxac. 9'Am she'eguelaxata da chochaq tatec da 'am toolec, nache qaica ca ishet da netaigui na 'aralamaxat huaqta'a't nỹecpi. Qaq huaña nache qauaỹachiñi da Aỹem nachaỹem Nataxala'.
10'Am qonapec co'ollaxa: Na 'alhua ye Israel qataq naua dos nta'al yeemaye ỹalamaqa'ate qome, aỹem nachaỹem da ỹalamaqa'ate qome. Qaq na'aictaxa da Aỹem Nataxala' soota'a co'ollaxa yemaye. 11Qalaxaye Aỹem Nataxala', maiche ñañan da san da ỹa'aqtac, qaq dam 'arayeloxo qataq da 'arquiỹaxa maye 'auo'otec co'ollaxa na Israel le'ecpi, nachera da 'am so'otec qome. Qom sauo'o ca 'anhuaxanaguec, nache namayepi qome ỹe'eguelaxa da Aỹem ỹauatton. 12Qaq huaña nache 'auaỹaten da Aỹem Nataxala', sa'aqtega co'ollaxa 'enauac na 'arsheunaxanaxacpi maye 'auasaxalec aye qasoxonaxapi ye Israel. 'Am qonapec co'ollaxa: ¡Yemaye toolec, qaq nagui ishet da sacheguenaq! 13'Am 'auauachigui co'ollaxa na 'ap da Aỹem 'aunogoqchettac, qataq sa 'auena'a ca 'ara'aqtac da Aỹem 'auataỹa'aguet. Qaq Aỹem 'am sa'aqchigui co'ollaxa. 14Qaq ỹoqo'oye Aỹem Nataxala', sheeta': 'Enauac ana 'alhua, machiguiñi qom 'am selaxachigui. 15'Am 'auamachiguiñi co'ollaq qailaxachigui ye 'alhua maye lalamaxat na Israel le'ecpi, qalaxaye nache qoneta'am qome da 'am toolec 'am qasoxonaxa Seír, maye qonetaigui ye 'alhua Edom. Qaq huaña qome, nache namayepi ỹe'eguelaxa da Aỹem ỹauatton da Aỹem Nataxala'.
