1Qaq Ñim Nataxala' qaltaq aỹem 'enapega, 'eeta': «'Am shiỹaxaua, 'auacona nagui ca ỹeelonec maye ỹataqta ỹaxaraic, 'eeta'am ca petegaxat da llaxa, nache 'anamarec na 'arqaic qataq ana 'arqa' laue. Ime nache 'auacona aca naloqnaxanaxaqui, nache 'aucolaxatapigui ca 'araue, tres 'anqa'en caua 'aqtal. 2Qaq qom ime da qailoquiaxaatac ye huaqta'a't nỹecpi, nache 'auavigaxat aca 'oonole que'ecaua tres 'aqtal cam 'araue, vichiguingui 'anqa'en na laiñi ye huaqta'a't nỹecpi, qaq da ime nache qaltaq 'auacona ca ỹeelonec, nache 'auchiigui aca lỹa que'ecaua tres 'aqtal, nache 'auconnaxaasop na loiguepi ye huaqta'a't nỹecpi, qaq aca no'onañi nache 'auasaxasheguem da yaqto' ỹache na la'at. Qaq Aỹem secanapec qome na shiỹaxauapi ne'ena huaqta'a't nỹecpi, ñasoqta'a ca ỹainec. 3Qataq 'auaconalo caua sa 'amaqtache que'eca 'araue, nache 'acoñeraua'alo naua laỹel aca 'arpoto. 4Qaq ime qome, nache qaltaq 'auaconalo caua saq 'amaqtache caamaye, nache 'auasaxanguilo ca norec da yaqto' ỹavi'c. Qaq nache chegoqchiguiña qome que'eca norec da nquictauec da talec na nhuo' Israel le'ecpi.
7Qaq ỹoqo'oye, Aỹem Nataxala', sheeta': Qami' ỹataqta sa qaualaqai co'ollaxa, sa qoñiỹa'am na nhuo' le'ecpi maye qarhuoreuaipi, qataq saishet da qoquiigue na ỹamaxasoxonaxacpi, qataq saishet da qaualaqaiguet na nqataxacpi maye lalamaxat na nhuo' le'ecpi maye qami' coleesopa. 8Qaq ỹoqo'oye Aỹem Nataxala', sheeta': Aỹem nataqa'en 'am sataỹa'aguet, 'am Jerusalén, sacoolec da ñemit na 'arasouaxashetpi, ỹauaachigui ñaqa'en na ỹotta'a't shiỹaxauapi. 9Qaq souaxat nam ỹataqta qauem 'auo'otpi nache so'ot nam sa ỹauano' da so'ot co'ollaxa, qataq saishet da she'eguelaxalec da so'ot qome. 10Qaq nam shiỹaxauapi maye 'am netaigui, huo'o qome ca nta'alpi da chec ca llalaqpi, qataq huo'o ca ñalaqpi da chec ca lta'alpi. Aỹem sacoolec qome da so'ot ca 'anhuaxanaguec, qaq ca lca'alaxaicpi qome qalaq selagaxaalec ana 'alhua. 11Aỹem Nataxala', maiche ñañan da san da ỹa'aqtac: Qaq cha'aye qami' qanshepaxanaqchichi añi qui'itta ỹalamaqte atamnaxaqui souaxat da qaỹa'añiỹaigui na nqolacpi maye nshepaxan, qataq nam qauem maye qauo'oche, qaq nataqa'en Aỹem qami' sa sechoxonnai'salo da qami' selaxachiguilo, nache saishet da qami' sechoxoreeta'ape. 12'Oonolec naua tres lpa'axaco na nhuo' le'ecpi maye 'am netaigui, ca ilem qome ca napiina, qataq ca nqouaxa, qaq ca lỹa caua tres lpa'axaco qalaq huaugalo naua loiguiye da ỹalauat ca 'ampa'aguenaxauapi, qaq ca lỹa caua tres lpa'axaco maye no'onañi qalaq selagaxaalec qome 'enauac ana 'alhua. Qaq Aỹem sauota'a qome ca ỹainec da secanapec namayepi. 13Qaq huaña qome nache ñashetcheguem da ỹayeloxo, qaq qom nmisheguem damaye, nache samaguiñi. Qaq qom nmisheguem da ỹayeloxo souaxat namayepi, nache namayepi ỹaỹaten qome da Aỹem Nataxala', maiche ỹa'aqtac co'ollaxa damaye. 14'Am Jerusalén, Aỹem 'am so'otec qome da 'am lapoosheguem, nache 'am so'otec da qaica ca 'ara'amaqchec da qonetangui na nhuo' le'ecpi maye 'am coleesop, yaqto' ca 'am nlectot qome qalaq 'am imeteetac. 15Qaq qom sacoolec da so'ogoxona da ỹalemataic qataq ỹayeloxo da 'am sataỹa'aguet da 'am ñemit, qataq sauo'o ca lta'araic 'anhuaxanaguec, nache 'enauac qome na shiỹaxauapi da 'am isheueetac qataq 'am denoỹa, qaq huaña nache na nhuo' le'ecpi maye 'am coleesop huo'o qome da lta'araic lcolanaxa. Qaq 'era da ỹa'aqtac Aỹem Nataxala'. 16Aỹem so'ot qome da qami' taleguete ca lta'araic nqouaxa, 'eeta'am aca chaqai checnapi maye dalaataxan. Aja', Aỹem so'ot qome da anac ca qami' ilaxachiguilo, ca nqouaxa, qataq da lvic ca qanallec. 17Aja', Aỹem so'ot qome da qami' taleguete ca nqouaxa, napiina qataq nleuaxa, qataq ca shiguiỹacpi maye qauemaicpi nache qaica naqa'en ca no'onañi ca qaỹa'alquipi, qataq da qoñeeta so'ot qome da qalota ca ileuaigui ca alaataxac. Qaq 'era da ỹa'aqtac Aỹem Nataxala'.»
