So Ezequiel qaỹachaxana nam qaỹo'ottacpi ye Jerusalén
1Qaq so na'a'q cinco som ca'agoxoic seis som vi'i seis, nache aỹem ñeso'ootañi sooto'ot so ima', satata'aguet so nqueroxonecpi maye nataxala'pi ye Judá. Nache nque'elaxatta da Ñim Nataxala' aỹem ỹashel-lec, 2qaq sela'a so 'eeta'am na shiỹaxaua. Qaq somaye chegoqchiguiña na lasot nache nviraña na pa'aguiñi so 'eeta'am na norec, qataq chegoqchiguiña na lasot nache tasheguema na pa'asheguem so 'eeta'am na lcat bronce da lqashelgaxa. 3Qaq se'eso shiỹaxaua ỹachaxanec so lhuaq nache ỹaconoigui na ỹaue. Qaq huaña nache so la'añaxac Ñim Lo'onatac 'Enauacna, naỹoxoosheguem naqa'en aỹem, qaq huaña nache huo'o so ỹauanaqchec chegoqo'ot Ñim Lo'onatac 'Enauacna nache aỹem ỹauega ye Jerusalén, nache aỹem ỹanaña ñi lasom maye pa'auo, qataq datata'ague da sheu', yem huaqta'a't nỹecpi maye netaña som nqolac maye ỹo'ot da dalemata Ñim Nataxala'. 4Qaq yemaye nache hueta'a da llo'oxoyec Ñim Natamnaxala' na Israel le'ecpi, maye 'eeta'am so ỹauanaqchec co'ollaq huaña ye nalochiguiñi 'alhua. 5Qaq huaña nache Ñim Nataxala' aỹem 'enapega, 'eeta': «'Auamata'ague da sheu'.»
Nache aỹem samata'ague da sheu', nache se'eso ñegueuo maye huaqta'ai' so lasom maye taỹaua'a aso nca'atoxonaxalate, sela'a da netaña som nqolac maye ỹo'ot da layeloxo Ñim Nataxala'. 6Qaq ime nache qaltaq aỹem 'enapega, 'eeta': «¿Peta'a 'aula'a nam qaiqaiga ỹo'ottac na Israel le'ecpi, nam ỹo'ot da qaỹoqta ñaqa'en añi ỹalamaqte qui'itta atamnaxaqui? Qalaxaye nataqa'en 'aula'a qome na laỹepi maye ỹataqta ỹactec da qauem.»
7Qaq ime qaltaq aỹem ỹauega so ñegueuo ye qasoxoc. Nache sela'a so mpaqtaxanaxat da huo'o so lauac. 8Nache aỹem 'enapega, 'eeta': «'Anquigaxatec qome ñi lauac so mpaqtaxanaxat.» Nache aỹem ñequigaxatec so lauac so mpaqtaxanaxat, nache huo'o so ỹegueuo. 9Nache Ñim Lo'onatac 'Enauacna aỹem 'enapega, 'eeta': «'Apa'auo qome yaqto' 'aumeten nam ỹataqta qaiqaiga maye qaỹo'ottac yemaye.» 10Qaq aỹem sepa'auo, nache sela'a da 'enauac so mpaqtaxanaxat da qoỹettalec so ne'enaqtacpi maye lqui'ipi na hualectapigui' qataq na laỹepi shiguiỹacpi maye nshepaxan qataq nam ỹotta'a't lqolacpi na nhuo' Israel le'ecpi. 11Qaq so Setenta nqueroxonecpi, maye lataxala' na Israel le'ecpi datato'ot se'eso ne'enaqtacpi, qaq somayepi nache ỹalectaigui so Jazanías som llalec so Safán da ỹo'oreettac se'eso nqolacpi. Qaq ñi 'oonolec somayepi nasoqta'a so laỹe' na nchenaxanaxat, qaq nache chegoqtapiguingui da naỹoxoosheguem so sansattec lmala'q na nchenaxanaxat.
12Ime, nache aỹem 'enapega, 'eeta': «¿'Aulota'a peta'a nam ỹoxottañi da ỹo'ottac nam nqueroxonecpi maye lataxala'pi na Israel le'ecpi, da ñi 'oonolec namayepi huo'o na maiche lma'piolec naqa'en na lqolacpi? Namayepi ipettega da sa sela'a, qataq da mashe sheca'ai ne'ena 'alhua.» 13Qataq nataqa'en Ñimaye, 'eeta': «'Am ñaq tata'a da 'aula'a qome nam ỹactec da qauem maye ỹo'ottac namayepi.» 14Qaq huaña nache aỹem ỹauega ñi lasom maye datata'ague da sheu' maye ñegueuo añi atamnaxaqui maye lalamaqte Ñim Nataxala'. Qaq nache hueta'alo soua 'alo nso'ootrañi, nỹeeto'oto so atamnaxala' Tamuz. 15Nache aỹem 'enapega, 'eeta': «¿Peta'a 'aula'a de'era? Qalaxaye ñaq tata'a da 'aula'a qome nam ỹactec da qauem maye ỹo'ottac namayepi.» 16Qaq ime nache qaltaq aỹem ỹauegueua'a so pa'aỹauo nqasoxoc añi atamnaxaqui maye lalamaqte Ñim Nataxala', nache netangui na laiñi so ñegueuo aso atamnaxaqui qataq aso nca'atoxonaxalate so veinticinco ỹalleppi, somayepi qosheta'ague da pa'aỹa'ague aso atamnaxaqui, qaq datata'ague da nala' lliguisheguem ỹa'attrañi naua l-llecte nache iviraxata'aguet na latap na 'alhua da natameetacot aso nala'. 17Qaq huaña nache Ñim Nataxala' aỹem 'enapega, 'eeta': «¿Peta'a 'aulota'a de'era? Na nhuo' le'ecpi na Judá, 'eeta'am da saq 'amaqtaq naqa'en nam ỹo'otpi maye ỹataqta qaiqaiga da huaña ne'ena, qataq nataqa'en nlaxalec naqa'en ne'ena 'alhua da loquiaxac. Nache nacalec lỹa da ỹo'ot da ỹayeloxo, qataq Aỹem iviro'ot na laita na lapiina. 18Qalaxaye Aỹem so'onataxana qome da ỹayeloxo, nache saishet da sechoxoreetac qome namayepi. Qaq huaña nache na'aictaxa da ỹa'alaqtagui da Aỹem iỹaxaatacot, qalaxaye saishet qome da sa'axaỹa.»
