Qailalec so lapaxañi lataxac so nta'a Ciro
1Qaq huaña nache so nta'a Darío, damaxasoxoolec da qanmit 'enauac aso nerepi maye huetaña ye Babilonia, aso nanettalec co'ollaxa so Ciro, qaq asa'aso nere huetalec de'era namaxasoxonaxac da qaltaq qaỹe'eguelaxalec da qano'oxoosheguem aso atamnaxaqui. 2Qaq so nma' lta'araic maye naña ye Acmeta, maye huaigui ye 'alhua Media, nache huaña co'ollaq qailalec aso nere maye huetalec so na'aqtac, 'eeta':
3«Qaq so la'auaxanec vi'i da nta'a so Ciro, nache somaye ỹan de'era lamaxasoxonaxac, 'eeta':
‹Ñaq qano'oxoosheguem aca atamnaxaqui acam lalamaqte Ñim Lo'onatac 'Enauacna, maye naña ye Jerusalén da yaqto' qaỹavigaxat aca nachetaqtaxanaqte. Qaq aca'aca atamnaxaqui ivi' qome ye veintisiete metros ye lshequitcheguema, qataq veintisiete metros ye lcategue. 4Qataq tres qanqoỹen caua qaỹauaxaỹana't coma' lta'al da qalapaxayiñi, qataq 'oonolec ca dalaxaicolec ca no'on qo'oipaq da qalapaxauo. Qaq 'enauac aca ivi' lasheue ca lo'oxonaxatpi, nache qaisheetenaxana qome aca nsheetenaqte ca nta'a. 5Qaq ca nogoxoshetpi oro, qataq lcat plata maye ỹacona co'ollaxa so nta'a Nabucodonosor, ỹachegoxotaigui aso atamnaxaqui maye naña ye Jerusalén, da yaqto' iro'ogue da Babilonia, camayepi iuen da qaỹe'eguelaxata ye Jerusalén, nache qoỹanaigui aca atamnaxaqui maye lalamaqte Ñim Lo'onatac 'Enauacna, qataq qaỹe'eguelaxatchiguiña ca maiche lma'.›»
So nta'a Darío ỹaỹamaxareeta da qano'oxoosheguem aso atamnaxaqui
6Qaq huaña nache so nta'a Darío, ỹanem da la'aqtac so Tatenay maye ilotague' so 'alhua maye pa'aỹa'ague da avit so tala Éufrates, qataq so Setar Bosnay, qataq so ltauapi maye ilotague' se'eso 'alhua nache, 'eeta':
«Qoquiỹa'ai qome na Jerusalén, 7qauauaqaita'a ca nta'a, qataq ca ỹa'axaiquipi maye lataxala'pi na judiopi, da maiche huapegue' da qaltaq no'oxootapiguisheguem aca atamnaxaqui maye lalamaqte Ñim Lo'onatac 'Enauacna, da ipagaqchiichiguiña ca toguishec lma'. 8Qaq nataqa'en qami' samaxaleguete da qautauañi ca lataxala'pi na judiopi, da qano'oxoosheguem aca atamnaxaqui. Qataq qaushichiiñi da ỹoltaq qano'oxoosheguem acamaye, qausheetenaxañiỹa aca nsheetenaqte ca nta'a maye ỹacootapeeguet da ilotague' ye 'alhua, maye pa'aỹa'ague da avit so tala Éufrates, yaqto' saishet da vi'iiguet da no'onataxanaxac. 9Qataq 'enauaque caua na'axa'te, da saishet da huo'o ca qanapacalec na'a'q da qoỹanem camayepi ca iuen, huaca llalec, qagueta lhuaraic, huo'otaq qagueta llalec da ỹauo'o lachetaqtaxanaxat da ỹavigaxat da ỹanot Ñim Lo'onatac 'Enauacna maye neto'ot na piguem, nataqa'en ca ala na trigo, toue, lataxa, qataq ca aceite. 10Cha'aye sauotaique da camayepi qom ỹavigaxat ca lachetaqtaxanaxat nache ỹataqta ỹaỹamaxareeta Ñim Lo'onatac 'Enauacna maye neto'ot na piguem, qataq da nqouagaxaueelec da ñachaalataxac qataq na ỹalaqpi.
11Qaq nataqa'en samaxasoxoolec da huo'o ca camachaqca shiỹaxaua da saỹalaxaguet de'era ỹamaxasoxonaxac, nache qanqat ca maiche l-llecnaxanaxat, nache qaira'a camaye da qaỹalauat, qaq ca lma' camaye nache ỹataqta qailaxachigui. 12¡Qaq Ñim Lo'onatac 'Enauacna maye lca'aua'a co'ollaxa ye Jerusalén da lma' naqa'en da le'enaxat Ñimaye, ilaxachigui qome ca camachaqca nta'a, huo'otaq ca ỹotta'a't shiỹaxauapi da ỹauotaique naralaxat de'era ỹamaxasoxonaxac, huo'otaq da nlaxaañi aca atamnaxaqui maye lalamaqte Ñim Lo'onatac 'Enauacna! Aỹem Darío, 'era da ỹamaxasoxonaxac, qaq damaye qaỹa'axatec qome, qataq ỹataqta qaipacchiguilo da qaỹo'o't naua shena'ape.»
Co'ollaq mashe qaimat aso atamnaxaqui
13Huaña nache so Tatenay, maye ilotague' so 'alhua maye pa'aỹa'ague da avit so tala Éufrates, qataq so Setar, Bosnay qataq so ltauapi somaye, ỹataqta ipacchiguilo naua lamaxasoxonaxaco so nta'a Darío. 14Qaq 'era da 'eetec so lataxala'pi so judiopi, da ishet da qaltaq cot da qano'oxoosheguem qataq da qaimatta aso atamnaxaqui. Nache ỹataqta ipacchiguilo naua la'aqtaxanaxaco soua na'aqtaxanaxanaqa Hageo, qataq so Zacarías maye chegoxoguet so Iddo. Qaq 'era da 'eetec da ipacchigui da lamaxasoxonaxac Ñim Natamnaxala' so Israel le'ecpi, qataq da ipacchiguilo naua lleco maye lapaxayiñi co'ollaxa soua Ciro, Darío qataq so Artajerjes, maye nta'al ye Persia. 15Qaq nache huetoigui so na'a'q tres so ca'agoxoic maye le'enaxat Adar, da qaimat da qano'oxootapiguisheguem aso atamnaxaqui, qataq huetoigui so vi'i seis da nta'a so Darío.
16Huaña nache so Israel le'ecpi, qataq so ntaxaỹaxanaxanecpi qataq so leviitapi, qataq 'enauac so noxonecpi maye ñe'eguelaq co'ollaxa chegaqa'a ye Babilonia, ime nache qaỹo'ot so lta'araic tonaxac cha'aye qoỹaneuo aso atamnaxaqui maye lalamaqte Ñim Lo'onatac 'Enauacna. 17Qaq huaña nache qoỹanot Ñim Lo'onatac 'Enauacna, so cien huaca llalaqpi da qaỹauo'o nachetaqtaxanaxat qaỹavigaxatta, qataq doscientos so qagueta lhuaraic, qataq cuatrocientos so qagueta llalaqpi, qataq doce soua quetaq, nache qanaloqchiichigui ye lcata so nalamaxat nhuo' le'ecpi maye chegoxoguetpi so Israel, da yaqto' qaỹapalaxat 'enauac na lasouaxashetpi somayepi. 18Ime, nache qaipacchiguilo naua ñiyigui'she na'aqtaqa maye nanettaleguete aso lere so Moisés, qataq qanaloqchiiyiñi soua laloqo'ote da do'onataxan so ntaxaỹaxanaxanecpi, qataq so leviitapi da ilo'ogue da ño'oxonnataxanaxac da qaỹo'oxoren Ñim Lo'onatac 'Enauacna da huaña ye Jerusalén.
So Israel le'ecpi ỹo'ot so lta'araic lquia'axac
19Qaq so noxonecpi maye ñe'eguelaq co'ollaxa chegaqa'a ye Babilonia, ỹo'ot so lquia'axac lta'araic maye huaigui so Lapascua, huetoigui so na'a'q catorce so la'auaxanec ca'agoxoic. 20Nache so ntaxaỹaxanaxanecpi qataq so leviitapi, 'enauac da ỹataqta nqui'itaxatta. Huaña, nache ỹaneuo so lachetaqtaxanaxat qagueta llalec maye huaigui so Lapascua, souaxat da somayepi qaỹauega co'ollaxa ye ỹaqa'a 'alhua cha'aye noxonecpi, qataq souaxat som ltauapi maye ntaxaỹaxanaxanecpi. 21Nache 'enauac se'eso Israel le'ecpi som ñe'eguelaq co'ollaxa chegaqa'a ye Babilonia, somayepi ỹalegueua'a so nquia'axac lta'araic maye qaỹo'ot, qataq 'enauac so nache 'eetai' da netaña yemaye, qataq so ỹaxanec na qauem lataxacpi so lauoreuapi. Yaqto' ishet da 'enauac somayepi ỹo'oxoren Ñim Nataxala' maye Natamnaxala' so Israel le'ecpi. 22Qaq ivittrec soua siete na'axa'te da qaỹo'ottac se'eso nquia'axac lta'araic, da qanallectac aso nauole 'ayiiña maye qaica ca lalegue ỹasheeraxachigui. Cha'aye Ñim Nataxala' ỹe'eguelaxatem da ntonaxac 'enauac somayepi. Qataq souaxat da so nta'a ye Persia, itauan qataq da ỹasheetem somayepi da ỹe'eguelaxalec da no'oxoosheguem aso atamnaxaqui maye lalamaqte Ñim Natamnaxala' so Israel le'ecpi.
