So Esdras qataq so laỹepi nvita ye Jerusalén
1Qaq huetoigui da lo'onataxanaxac so Artajerjes, maye nta'a ye Persia, nache nvita ye Jerusalén so shiỹaxaua le'enaxat Esdras, qaq somaye nache llalec so Serarías, maye nataqa'en chegoxoguet so ntaxaỹaxanaxanec Aarón, Azarías, qataq so Hilcías, 2Salún, Sadoc, Ajitob, 3Amarías, Azarías, Merayot, 4Zeraías, Uzi, Buqui, 5Abisúa, Finés, Eleazar, qataq so la'auaxanec ntaxaỹaxanaxanec le'enaxat Aarón. 6Qaq so Esdras, somaye neraxanaxanec qataq ỹataqta ỹaỹate'n naua lleco, na lqataxacpi Ñim Nataxala' maye Natamnaxala' so Israel le'ecpi, maye ỹanem co'ollaxa so Moisés. Qaq so nta'a Artajerjes ỹanem somaye 'enauac som iỹaxanaique, cha'aye Ñim Nataxala' ỹataqta hueta'aguet co'ollaxa somaye. 7Qaq so Esdras co'ollaq ñe'eguelaxa ye Jerusalén, nache huo'o so lỹatec Israel le'ecpi. Qaq somayepi huo'o so ntaxaỹaxanaxanecpi, qataq leviitapi, nataqa'en so no'onaxanaxanecpi, qataq so lasom lo'opi, qataq so ilotague' aso atamnaxaqui. Qaq se'eso lviraxac nache huetoigui co'ollaq ivi' soua siete vi'iye da nta'a so Artajerjes. 8Qaq 'era da 'eetec so Esdras co'ollaq nvita ye Jerusalén, da huetoiguilo soua cinco ca'agoxoiqa so vi'i siete da lo'onataxanaxac da nta'a so Artajerjes. 9Qaq somaye qataq so laỹepi, co'ollaq nnoxonec chegoqchiguiña ye Babilonia, nache huetoigui so la'auaxanec na'a'q so hua'auchiguiñi ca'agoxoic, nache nvita ye Jerusalén, so la'auaxanec na'a'q soua cinco ca'agoxoiqa, cha'aye da lqouagaxanaqtaic, qataq ltaunaxanaxac Ñim Lo'onatac 'Enauacna, nache hueta'aguet somaye. 10Qaq so Esdras, ye ỹataqta lquiyaqteỹaxac da napaxaguena nam lqataxacpi Ñim Nataxala', qataq da ỹataqta ipactelec da ỹapaxaguenec so Israel le'ecpi nam qalapaxañi lataxacpi qataq nam namaxasoxonaxacpi.
Aso lere so nta'a Artajerjes maye ỹamaxa so Esdras
11Qaq ana lere so nta'a Artajerjes maye ỹanem so Esdras, maye ntaxaỹaxanaxanec qataq napaxaguenataxanaq maye ỹataqta napaxaguena co'ollaxa na namaxasoxonaxacpi qataq na nqataxacpi maye Ñim Nataxala' ỹanem co'ollaxa so Israel le'ecpi. Qaq asa'aso nere da huetalec, 'eeta':
12«Aỹem Artajerjes, maye lta'a na nta'alpi, aỹem sanem da ỹa'aqtac na Esdras, maye ntaxaỹaxanaxanec qataq napaxaguenataxanaq, maye ỹaỹate'n naua lleco na lqataxacpi Ñim Lo'onatac 'Enauacna maye ilotague' na piguem: 13Qaq aỹem san da ỹa'aqtac, da 'enauac na Israel le'ecpi maye netaigui ne'ena 'alhua maye selotague', da huo'o ca nshetaique da 'am ca'ategue da taỹa ye Jerusalén, nache camaye ishet da jec, nataqa'en na ntaxaỹaxanaxanecpi qataq na leviitapi. 14Cha'aye aỹem maye aỹem nta'a, qataq naua siete chegoqtracot na nqataxacpi, 'am samaxasoq da yaqto' 'anmit da lataxac na netaña ye Jerusalén qataq ye Judá, da ỹoqta 'eesa da qaipacchiguilo naua lqataxaco Ñim 'Anatamnaxala' maye 'auauattoote'. 15Qataq 'auache ana qarachetaqtaxanaqte oro qataq na lcat plata, maye aỹem qataq na itauapi sanaxam Ñim Natamnaxala' ca Israel le'ecpi maye netaña ye Jerusalén. 16Nataqa'en 'auache ana plata qataq oro maye 'auachegoxotaigui 'enauac na netaigui na 'alhua Babilonia, qataq ỹaleeguet 'anqa'en na lachetaqtaxanaxatpi na nalamaxat nhuo' le'ecpi, nataqa'en na ntaxaỹaxanaxanecpi da ỹaneua'a aca atamnaxaqui maye lalamaqte Ñim Lo'onatac 'Enauacna maye naña ye Jerusalén. 17Qaq ana'ana anom plata, nache lasheue 'anqa'en da 'ausheenaxanaique ca huaca llalec, qagueta lhuaraic, qagueta llalec, qataq huaqta'aguet 'anqa'en aca nachetaqtaxanaqte maye ala na trigo, qataq ca lataxa da qaỹachalec aca nca'atoxonaxalate maye lalamaqte Ñim Nataxala' maye huaña aca atamnaxaqui maye lalamaqte Ñim Qanatamnaxala'ai maye naña ye Jerusalén. 18Qaq aca no'onañi, aca anom plata qataq ca oro, nache 'am qataq ca 'artauapi nache maiche qo'oicñiitac ca qauataxañiiteuga ca ỹataqta ỹaỹamaxareeta Ñim Qanatamnaxala'ai. 19Qalaxaye que'eca nogoxoshetpi maye 'am qoỹanem 'auachaigui qome aca atamnaxaqui maye lalamaqte Ñim Atamnaxala' maye naña ye Jerusalén.
20Qataq da huo'o ca camachaqca lỹa qaiueetaique da lalamaxat qanqa'en aca atamnaxaqui maye lalamaqte Ñim Atamnaxala', nache 'ausheetenaxana qome aca naỹamaqta anom maye huetaigui ca nma' lta'araic. 21Qaq aỹem nta'a Artajerjes, samaxalec 'enauac na netaña ye 'alhua maye pa'aỹa'ague da avit so tala Éufrates maye ilotague' aca anom, da saỹaỹaloxon da ỹami' da huo'o aca iỹaxanaique, nam ntaxaỹaxanaxanec qataq napaxaguenataxanaq Esdras, maye ỹaỹate'n naua lleco naua lqataxaco Ñim Lo'onatac 'Enauacna maye ilotague' na piguem. 22Qataq qoỹanem qome ca tres mil trescientos kilos ca lcat plata, qataq diez mil kilos ca trigo, qataq dos mil doscientos litros ca lataxa qataq dos mil doscientos litros ca aceite, qataq maiche ca tachiguiña qanqa'en ca toue.
23Qaq 'enauac na damaxasoxoolec Ñim Lo'onatac 'Enauacna da qoỹaneua'a aca atamnaxaqui, nache sa qaỹaỹaloxon qome da qoỹaneuo, yaqto' saishet da huo'o ca talec nhuaxanaguec na ỹalaqpi qataq 'enauac ne'ena selotague'pi. 24Nataqa'en samaxasoxoolec da 'enauac na ntaxaỹaxanaxanecpi, leviitapi, no'onaxanaxanecpi, lasom lo'opi, qataq ca ilotague' aca atamnaxaqui maye lalamaqte Ñim Lo'onatac 'Enauacna, saishet qome da desheetenaxaatac qanqa'en.
25Qaq 'am Esdras, maye Ñim Lo'onatac 'Enauacna 'am ỹanem 'enauac da naỹaanec, 'auauo'o qome ca 'aỹa'aneuopi da nmit qataq ỹaỹamaxaañi ca nasouaxashet, qataq ca nta'alpi, nam mashe ỹaỹaten da llec na nqataxacpi da yaqto' ilo'ogue 'enauac ye netalec ye 'alhua maye pa'aỹa'ague da avit so tala Éufrates, cha'aye nacheca cam ỹapaxaguen qome na judiopi maye ñaq saxanaxa da ỹaỹaten na lqataxacpi Ñim 'Anatamnaxala'. 26Qaq da huo'o ca sa ỹalaxaguet na lqataxacpi Ñim Lo'onatac 'Enauacna, qataq na ỹamaxasoxonaxacpi nache saqaỹaỹaloxon da qanmit, qataq qaỹauo'o ca nhuaxanaguec, qaỹo'orauec, huo'otaq da ỹauo'o qanqa'en aca lsheetenaxanaqte, qaicoñe', huo'otaq qaỹalauat camaye.»
Da natamnaxac so Esdras
27Qaq da natamnaxac so Esdras, 'eeta': «Ỹataqta qaỹo'oxoren qome Ñim Nataxala', maye Natamnaxala' so hua'au qarta'alpi, cha'aye Ñimaye ỹanem da no'on lquiyaqteỹaxac ñi nta'a, da ỹe'eguelaxatem da lyacỹaxac añi atamnaxaqui maye lalamaqte Ñim Nataxala', maye naña ye Jerusalén. 28Qaq souaxat da lauotaxanaqtaic Ñim Lo'onatac 'Enauacna maye qaica ca loga't, Ñimaye ỹo'otec qome ñi nta'a qataq na chegoqtacot na nqataxacpi qataq 'enauac na ltauapi maye ỹataqta 'amaqtaqaicpi da huo'o naqa'en da lqouagaxanaqtaic da sheeta. Qataq Ñim Lo'onatac 'Enauacna ỹataqta aỹem hueta'aguet, ỹoqo'oye huo'o da ỹa'añaxac da sataxana't 'enauac na lataxala'pi na Israel le'ecpi, da yaqto' nasauaxat da aỹem nca'ategue da ñe'eguelaxasaxa na Jerusalén.»
