1Qaq huaña nache so Isaac, iỹaxaneuga so Jacob nache ỹanem da lchoxonnataxanaxa, qataq ỹanem de'era lqataxac maye, 'eeta':
«Saishet qome da 'auaroneguet aca 'alo maye lma' ne'ena 'alhua Canaán. 2Qojec qome, 'anqo'ona ye Padán Aram yem lma' ca 'arapi' Betuel, qaq huaña qome yemaye nache 'auaroneguet aca 'oonole llale ca 'antesoqo' Labán. 3Qaq Ñim Lo'onatac 'Enauacna maye Qaica ca Ỹaqalanapec, 'am ỹasaxalec qome ca lchoxonnataxanaxa, qataq 'am ỹanem cam qalota maye 'am chegoxoguetpi, yaqto' nache 'am chegoqchigui qome ca qalota ỹotta'a't shiỹaxauapi. 4Qataq 'am ỹanem qome, qataq nataqa'en ca 'am chegoxoguetpi da lchoxonnataxanaxa maye ỹachaxanapeguem co'ollaxa so Abraham, da yaqto' lalamaxat ne'ena 'alhua maye souaqta'a nagui, da 'eeta'am da sachegoxosoqauec, cha'aye Ñimaye ỹachaxanapeguem co'ollaxa so Abraham.»
5Qaq 'era da 'eetec so Isaac, da ỹamaxa co'ollaxa so Jacob ye Padán Aram, yem lma' so Labán som llalec so Betuel, som arameo maye lqaỹa aso Rebeca asom late'e so Jacob qataq so Esaú.
Huaron so Esaú
6Qaq so Esaú ỹaỹaten co'ollaxa da so Isaac ỹasaxalec da lchoxonnataxanaxa so Jacob qataq ỹamaxague da Padán Aram da yaqto' laronqa'. Qataq nataqa'en ỹaỹaten da so lta'a co'ollaq ỹasaxalec da lchoxonnataxanaxa so Jacob, nache 'enapega da saishet da huaroneguet aca 'oonole 'alo maye lma' ye Canaán, 7qataq da so Jacob jec taỹa ye Padán Aram, da ipacchigui naqa'en da la'aqtac so lta'a qataq aso late'e. 8Qaq huaña, nache so Esaú ỹaỹaten da so lta'a ỹataqta sa ỹaỹamaxaren so 'alpi maye lma' ye Canaán. 9Qaq ỹoqo'oye jec da nqo'ona so Ismael som llalec so Abraham, nache huaroneguet aso llale somaye, asom le'enaxat Majalat, maye lqaỹa so Nebayot. Qaq na'aictaxa da mashe huo'oi soua lhua't, maye lma' ye Canaán.
Ñim Lo'onatac 'Enauacna nachaxana so Jacob huaña ye Betel
10Qaq so Jacob jec co'ollaxa chegoqchiguiña ye Berseba, nache quetegue so nqa'aic maye taỹa'a ye Jarán. 11Qaq co'ollaq huo'o so ivita 'alhua, nache hua'a somaye da lo'ochaqa' se'eso pe, cha'aye aso nala' mashe inoxooñi. Nache ỹacona da na'axaalec so 'oonolec som coma'pi maye hueta'a yemaye, nache nnaañi da do'oche. 12Qaq huaña yemaye, nache huo'o so lchoxonaxac, dechoxootega da ilota'a so napiaxala', na'attalec ana 'alhua, nache iviro'ot na piguem, qaq som lamaxashecpi Ñim Lo'onatac 'Enauacna, naguinguicnaxa somaye qataq ỹe'eguelaxasheguem. 13Qaq nataqa'en ilota'a co'ollaxa da Ñim Nataxala' nachattañi, hueta'a som pa'asheguem se'eso napiaxala', nache 'eetega somaye, 'eeta':
«Aỹem nachaỹem Nataxala', maye Natamnaxala' so 'arapi' Abraham, qataq ñi 'arta'a Isaac. Qaq 'am qataq ca 'am chegoxoguetpi, sanem qome ne'ena 'alhua maye 'annaatalec nagui. 14Camayepi ỹataqta qalota qome, ivitta'a da 'eeta'am na lsoche na 'alhua, qataq nquictauec qome nache ivira'ague da pa'aigue da sheu', qataq da taguiñi, qataq da nala' lliguisheguem, qataq da nala' lliguiñi, qaq 'enauac qome ca nhuo' le'ecpi ana 'alhua, huo'o qome da nchoxonnataguec chegoqchigui 'am, qataq ca 'am chegoxoguetpi. 15Qaq Aỹem 'am soota'aguet, qaq maicheye cam 'aigue qalaq 'am ñepaxattalec qome, qataq 'am ñe'eguelaxata qome ne'ena 'alhua. Saishet qome da 'am salat, choche ivitta'a da sepacchigui da so'ot 'enauac nam 'am sachaxanapecotpi.»
16Qaq so Jacob, co'ollaq nlouec, nache deuennataxan, nache 'enapeco': «Ỹoqta 'eesa da Ñim Nataxala' hueta'a ne'ena 'alhua, qaq aỹem sa saỹaten co'ollaxa.»
17Qaq huaña, nache ỹataqta qalota da lcolanaxa, nache 'enapeco': Ne'ena 'alhua ỹataqta saqaishetapec. ¡Namaye nachena na lma' Ñim Lo'onatac 'Enauacna, qataq nachena na lasom na piguem!
18Qaq so lỹa na'a'q, nache so Jacob ñisheguem co'ollaq ña nte'etom, nache ỹacona so coma' maye na'axaatalec co'ollaxa so pe, nache nachaalataxaañi, ime nache icorelec somaye so aceite. 19Qaq se'eso 'alhua, huo'o co'ollaxa so huaqta'a't nỹecpi maye le'enaxat Luz, qalaxaye so Jacob naralaxat da le'enaxat, nache ỹanagui Betel.
20Qaq nache huaña yemaye da so Jacob, ỹan so la'aqtac maye, 'eeta':
«Da Ñim Lo'onatac 'Enauacna aỹem nnaictague', qataq aỹem ntela'a de'era ỹecỹaxac maye so'ottac, qataq da aỹem ỹanem ca anoq, qataq ca ỹogoxot, 21qataq da aỹem no'oita, qataq qaica camachaqca da ñachaalataxac qom ñe'eguelaxa ye lma' ñi ita'a, qaq huaña, nache Ñim Nataxala', nacheñi qome Ñim Ñatamnaxala'. 22Qaq ne'ena coma' maye ñachaalataxañi, nachena qome na lma' Ñim Lo'onatac 'Enauacna. Qaq 'Am Atamnaxala', nache 'eetai' qome da 'am saata'am, aca ñediezmo maye chegaqaigui 'enauac cam aỹem 'aỹa'anem.»
