So Jacob taỹa ye Egipto
1Qaq huaña, nache so Israel jec, ỹache 'enauac som huo'o logoxoshetpi. Qaq co'ollaq ivita ye Berseba, nache ỹauo'o aso ỹavigaxat lachetaqtaxanaqte da ỹanot Ñim Natamnaxala' so lta'a Isaac. 2Qaq se'eso pe, nache Ñim Lo'onatac 'Enauacna detaxaỹapegue' so Israel, huaigui naqa'en so lo'ochaxa, da iỹaxana da le'enaxat, 'eeta' ¡Jacob! Nache somaye ỹasat, 'eeta':
«Aja', aỹem soota'a ne'ena.»
3Nache Ñim Lo'onatac 'Enauacna 'enapeco':
«Aỹem Nachaỹem Ỹo'onatac 'Enauacna maye Natamnaxala' so 'arta'a. Saishet qome da 'añi'i da 'anqo'ona ye Egipto, cha'aye huaña qome yemaye, nache so'ot da ca 'am chegoxoguetpi ỹataqta qalota qome. 4Qataq 'am ñenaictague' qom 'anqo'ona ye Egipto, qataq nachaỹem qome ñeqateeguesop yemaye cam 'am chegoxoguetpi. Qataq da lỹa 'eeta': qom 'aleu, nache ñi José huetaua'a qome na 'araỹe.»
5Qaq co'ollaq ime de'era, nache so Jacob ca'ai ye Berseba. Nache soua llalqa so Israel, inotaxanaxaangui so lta'a qataq so llalaqpi qataq aso lhuapi soua naigonal maye ỹama'q co'ollaxa so faraón da ỹauotaique lachaxaqui' somaye. 6Nache so Jacob qataq 'enauac so lalamaxatpi nqo'ona ye Egipto, nache ỹo'orelec aso lalo huacapi qataq aso qaguetapi qataq 'enauac som ishet da ỹachegoxotaña co'ollaxa ye 'alhua Canaán. 7Qataq 'enauac so llalaqpi qataq aso llalpi, qataq so laualpi ỹalleppi qataq 'alpi, da lỹatec somaye.
8Qaq 'ena nam le'enaxatpi so Israel llalaqpi maye taỹa co'ollaxa ye Egipto, qaq damaye 'eeta': So Jacob qataq som chegoxoguetpi:
So Rubén maye la'auaxanec llalec so Jacob. 9Qaq soua llalqa so Rubén: Janoc, Falú, Jesrón qataq so Carmi.
10Qaq soua llalqa so Simeón: Jemuel, Jamín, Oad, Jaquín, Sojar qataq Saúl som llalec aso 'alo maye lma' ye Canaán.
11Qaq soua llalqa so Leví: Gersón, Coat qataq so Merari.
12Qaq soua llalqa so Judá: Er, Onán, Selá, Fares qataq so Seraj. Qalaxaye so Er qataq Onán, ileu' co'ollaxa hueraña ye 'alhua Canaán. Qaq soua llalqa so Fares: Jesrón qataq so Jamul.
13Qaq soua llalqa so Isacar: Tola, Fuvá, Job qataq so Simerón.
14Qaq soua llalqa so Zabulón: Sered, Elón qataq so Yajelel.
15Qaq 'eso som llalaqpi aso Lea co'ollaq deco'oiguet so Jacob co'ollaq huetra'a ye Padán Aram, qataq nataqa'en aso llale Dina. Qaq da ima'a't 'enauac se'eso llalaqpi ỹalleppi qataq 'alpi, nache ivi' treinta y tres shiỹaxauapi.
16Qaq soua llalqa so Gad: Sefón, Jaguí, Ezbón, Suni, Eri, Arodi qataq so Areli. 17Qaq soua llalqa so Aser: Imna, Isúa, Isví, Beria qataq aso lqaỹa't soomaye, le'enaxat Seraj. Qaq soua llalqa so Beria: Jéber qataq so Malquiel. 18Qaq 'eso som llalaqpi aso Zilpa co'ollaq deco'oiguet so Jacob. Aso Zilpa nachaso aso lamaxashe so Labán maye ỹanem co'ollaxa aso llale Lea da ỹauo'o lamaxashe. Qaq da ima'a't somayepi, nache ivi' dieciséis shiỹaxauapi.
19Qaq soua llalqa aso Raquel asom lhua so Jacob: José qataq so Benjamín. 20Qaq co'ollaq huaña ye 'alhua Egipto, nache so José ñiguiyiñi soua dos llalqa Manasés qataq so Efraín maye late'e' aso Asenat, asom llale so Potifera som ltaxaỹaxanaxanec so shiỹaxauapi maye lma' ye On. 21Qaq soua llalqa so Benjamín: Bela, Bequer, Asbel, Gera, Namán, Ehí, Ros, Mupín, Jupín qataq so Ard. 22Qaq 'eso som llalaqpi aso Raquel co'ollaq deco'oiguet so Jacob. Qaq da ima'a't, nache ivi' catorce shiỹaxauapi.
23Qaq so llalec so Dan: le'enaxat da Jusín. 24Qaq soua llalqa so Neftalí: Yajesel, Guni, Yézer qataq so Silén. 25Qaq 'esoua soua llalqa aso Bilá co'ollaq deco'oiguet so Jacob. Aso Bilá nachaso aso lamaxashe so Labán maye ỹanem co'ollaxa aso llale Raquel da ỹauo'o lamaxashe. Qaq da ima'a't soomaye, nache ivi' siete shiỹaxau'.
26Qaq 'enauac som chegoxoguetpi so Jacob som lỹateuo co'ollaq ivira ye Egipto, da ima'a't nache ivi' sesenta y seis, qaq sa qanaloqneuo aso lhuapi so llalaqpi. 27Qaq so José qalaq dos soua llalqa maye lañoqo't co'ollaxa ye Egipto. Qaq da ima'a't som llalaqpi so Jacob, som ivireua'a co'ollaxa ye Egipto qalaq ivi' setenta shiỹaxauapi.
28Qaq somayepi co'ollaq ivita ye 'alhua Gosén, nache so Jacob ỹa'auaxan so Judá da yaqto' 'enapega so José da hueqata'aguet somaye, da huaña ye 'alhua Gosén. 29Qaq huaña nache so José damaxasoxoolec da qaỹaỹamaxaañi aso nnaigona, da yaqto' jec da huaqata'aguet so lta'a. Qaq co'ollaq ivireguet so lta'a, nache nqapale', nache nỹeetac. Qaq ỹataqta qaỹoqtec so nnoinaxac co'ollaq nqapalta'ai' so lta'a. 30Qaq huaña nache so Israel 'enapega so José, 'eeta':
«¡Hua', nagui da mashe 'am seloto'ot, qataq saỹaten da ñaq 'anca'altauec, nache ishet qome da seleu!»
31Nache so José 'enapegalo soua lqaỹa't, qataq som lauo' le'ecpi so lta'a, 'eeta':
«Aỹem nagui ñeqo'ona ñi faraón, da sauo'o ca la'axaỹaxac. Qaq sa'aqtaxanem qome da naua ỹaqaỹa't, qataq na lauo' le'ecpi ñi ita'a maye netaña co'ollaxa ye 'alhua Canaán, namayepi aỹem naỹa da yaqto' aỹem lauoreua, 32qataq nnaictague' ana lalo qaguetapi, qataq ana lalo huacapi, qataq 'enauac nam huo'o logoxoshetpi, cha'aye da lo'onataxanaxac namayepi, ilotague' ana qaguetapi qataq ana huacapi. 33Qaq qom qami' nỹaxaneugalo ñi faraón, nache da qami' ina't negue't cam qaro'onataxanaxaqui, 34nache qami' qaua'aqtaxañim qome qoñiita: qomi' dam sachegoxosoqta'ague qalaq nache 'eetai' da seloqtague' ana qaguetapi, shenaqta'am so hua'au qarta'alpi. Qaq qoñeetec qome de'era, yaqto' ishet da qoñiỹalec na 'alhua Gosén, cha'aye na Egipto le'ecpi deqaiga da lauoreua nam ilotague' ana qaguetapi.»
