Soua pa'atrec la'aqtaqa so Jacob
1So Jacob iỹaxaneugalo co'ollaxa soua llalqa, nache 'enapegalo, 'eeta':
«Ñaq aỹem qanquiquiiua'a, yaqto' qami' sa'axatema da qoviỹaigui cam ñaq natauo:
2Qanquiquiiuo da qana'axaỹaxañi qami', Jacob llalqa,
ñaq qana'axaỹaxañiỹa na qarta'ai Israel.
3'Am Rubén, maye nache'am ỹe ỹalec,
'am ỹa'añaxac, qataq nache'am la'auaxanec ỹa'añaqteguishec,
'am la'auaxanec da ño'oxoyec, qataq 'am la'auaxanec da na'añaxac.
4Qalaxaye nagui saishet da 'am la'auaxanec,
cha'aye 'am qoneta'am ca la'auaxac maye saishet da qanpaxateguet:
cha'aye 'aue'enai' co'ollaxa so imala'
co'ollaq 'arauañi' aso ihua lỹa.
5Qaq da Simeón qataq da Leví daamaye nqaỹa't,
qaq naua lo'ogoxonaqa'ate qalaq ỹataqta lo'onataxanaqa'ate da loquiaxac.
6¡Ỹataqta sa saỹamaxaren da ñachattaua'a
ca huaña ca laỹonaxac!
Cha'aye co'ollaq dalematai', nache ỹalaua't so shiỹaxauapi,
qataq souaxat da ỹapacauec da no'oopashaxa'c,
nache ỹacagaxa't naua lapia'ate so huaca lhuaraicpi.
7¡Qauem, aja', ỹoqta 'eesa da qauem
de'era nnogoxonaxa'c maye saishet da qanpaxat!
¡Aỹem selagaxatoiguilo qome daamaye,
'enauac na nhuo' Israel le'ecpi!
8Qaq 'am Judá, na 'arqaỹañecpi 'am llo'oxonnatac qome.
Ca 'anpa'aguenaxauapi, qalaq choche 'auaconot qome na lana'q,
qaq nam 'aralamaxat 'arqaỹañecpi 'am ỹa'aroto qome naua l-llecte.
9¡'Am Judá, 'am ỹalcolec!
'Am qoneta'am ca llon llalec
da ivita da ỹaxaañi da chec ca loxonec,
ime, nache nlaxan, qataq nnaañi,
'eeta'am ca llon lta'araic.
¿Negue'tom ca ishet da sa ỹalemaxat?
10Qaica qome ca ishet da deuotaxanec da lamaxasoxonaxac da Judá
qataq da lamaxasoxonaxat npon maye nasoqta'a,
choche ivitta'a da nvi' cam lalamaxat de'era pon,
cam ỹataqta ỹalaxaguet qome na nhuo' le'ecpi.
11Cam icoñera'aguet qome ca lalo 'ashenolec aca uva lcheyec,
cam deỹoxona qome na lataxa da iỹo 'enauac ca logoxot,
¡deỹoxona nam lli'i ana uvas!
12Naua la'ai'te qalaq naueraleguete, napacalec da lo'oxoỹaxac na lataxa,
qaq naua lhue qalaq lapagaxail, napacalec da lo'oxoỹaxac na huaca lche'.
13Qaq da Zabulón qalaq neto'ot qome na loigue aso auaxai,
cam huaña qome ca llegueta ana notaxaquipi maye quiguingui na 'etaxat.
Qaq ca loga't ca lma' qalaq ivira'a qome ye Sidón.
14Qaq da Isacar qalaq 'eeta'am qome ca shiguiỹac notaxala'
maye nmataqa' ca lquia'aqa'.
15Co'ollaq ila'a so 'alhua da ỹataqta 'onaxaic
qataq ỹaỹamaqchiguiñi da mataqa',
nache ica'amaxachigui na l-laq da ỹache so lla'ac,
nache qaica ca la'aqtac da nañaneguet da nlatac.
16Qaq da Dan qalaq ilo'ogue qome na maiche lalamaxat lauo' le'ecpi,
'eeta'am na laỹe llalaqpi na Israel.
17Da Dan qalaq 'eeta'am qome ca na'araxanaq
maye hueto'ot na loigue ca nqa'aic,
da ishet da inaiguilo naua nqonacamo ca caaỹo,
nache ỹanataqchiiñi cam netalec.
18¡'Am ỹataxala', seuatta'aguet da aỹem 'anca'alaxatec!
19Qaq 'am Gad qalaq 'am iloquiaxan qome ca alleppi,
qalaxaye qom ime, nache 'am 'aucanapec qome camayepi.
20Qaq da Aser qalaq chochaq huañi qome na aloq,
nache ỹan ca no'on nallec, maye 'eeta'am na aloq na nta'alpi.
21Qaq da Neftalí qalaq 'eeta'am aca ñi'imshe maye ỹataqta huesochiguiñi,
qataq ỹataqta 'onaxaiqa naua llalqa.
22Qaq da José, qalaq 'eeta'am aca nañiguishe maye neto'ot na loigue ca 'etaxat,
maye ỹataqta qalota ana ala,
qataq ana lcoue nqapeguelec ca npaqtaxanaxat.
23Na checnec lo'opi qalaq ỹataqta nquiỹa qome, nache ỹaỹiitalec aca lchecnapi,
qataq nache 'eetai' qome da sa ỹalemaxat,
24qalaxaye da José ỹataqta qaramteguelo naua lhua'q,
qataq ỹataqta nllichiguiñi ca lchecnec,
¡sanot da ña'achec Ñim Natamnaxala' na Jacob, Ñim Qaica ca Ỹaqalanapec!
¡Sanot da ña'achec Ñim ilotague' qataq mpaxattalec na Israel!
25¡Sanot da ña'achec Ñim Natamnaxala' na 'arta'a,
Ñim 'am itauan qome,
Ñim Qaica ca Ỹaqalanapec, maye 'am ỹaalec qome da lchoxonnataxanaxa!
¡Ñim 'am ỹanem qome da 'achecỹaxac maye chegoqo'ot na qaỹoqotcheguemec piguem!
¡dam 'achecỹaxac maye chegaqangui aso qaỹoqchiguingui auaxai!
¡dam 'achecỹaxac da nco'oxoc qataq da qaillepec aca nate'e!
26Na 'arta'a ỹactec da 'am ỹanem 'achecỹaxac,
napacalec da 'achecỹaxac maye aỹem ỹanem co'ollaxa soua ita'al.
Napacalec ca loga't ana qasoxonaxapi maye chochaq tatec,
de'era 'achecỹaxac huetalec qome na lqaic da José,
maye qalca'ateua'a chegoqtoigui na lqaỹañecpi.
27Qaq da Benjamín, qalaq 'eeta'am ca qa'alaq maye chaqaic,
maye ye nte'eta qalaq no'otta'ai' da chec ca loxonec,
qaq da avit, nache ỹanec ca lli'iỹoxot.»
28Qaq 'esoua soua doce llalqa so Israel, qaq 'era da la'aqtac so lta'a co'ollaq ỹanem ñi 'oonolec soomaye da lchoxonnataxanaxa.
Da l-leuaxa so Jacob
29Qaq huo'o so na'a'q, nache so Jacob ỹanem da la'aqtac so llalaqpi, 'eeta':
«Aỹem mashe saqaỹaloq da seleu. Qaq no'on da aỹem qaulayiỹoigui qome ñi auac maye naigui ye na'alhua so Efrón som hitiita yaqto' salectaigui yem hua'au ita'alpi, 30yem 'alhua Canaán, damaye 'eeta'; ñim auac maye naña ye Macpela, maye datatta ye Mamre, yem desheenaxana co'ollaxa so Abraham, lỹaueegue' ye na'alhua so Efrón, da ỹauotaique lma' na maiche lalamaxat lauo' le'ecpi. 31Yemaye nache qailareña co'ollaxa so Abraham qataq aso lhua Sara, Isaac qataq aso lhua Rebeca. Qaq yemaye nataqa'en selayiña co'ollaxa aso Lea. 32Yi'iye 'alhua qataq ñim auac maye naña yemaye, qaisheenaxana co'ollaxa, qaỹachegoxoto'ot so hitiitapi.
33Qaq so Jacob co'ollaq imat da ỹanem de'era lqataxac soua llalqa, nache qaltaq ỹe'eguelaxañi da nnaañi. Huaña, nache ileu. Qaq 'era da 'eetec co'ollaxa da ỹalegoigui so hua'au lta'alpi.»
