1Nache so José qapal-lec so lta'a, nache nỹeetac, qataq napigoxoi'. 2Ime, nache ỹamaq so natannaxanaqpi maye lamaxashecpi da icoyigui da lo'ocỹaxac so lta'a Israel, da yaqto' saishet da nlaguiñi, qaq 'era da qoỹeetec somaye. 3Qaq ivi' soua cuarenta na'axa'te da qaicottapigui da lo'ocỹaxac, cha'aye nachesoua soua na'axa'te maye ivi't da qaỹo'ot de'era.
Nache so Egipto le'ecpi ivi' soua setenta na'axa'te co'ollaxa da ỹo'ottac da lasouaxac souaxat so Israel. 4Qaq co'ollaq ivildec soua na'axa'te maye nasouaxaqui', nache so José nqo'oneua'a da detaxaỹapegue' som netañapi ye lma' lta'araic so faraón da 'enapega, 'eeta':
«Qom ỹoqta 'eesa da aỹem qauauochec, qaq no'on da aỹem qarqouaquic da qoñiỹapega ñi faraón, 5cha'aye co'ollaq yaqta'a da ileu ye ita'a, nache aỹem 'enapega da san da ỹa'aqtac, da yaqto' sepacchigui da selayiña aca nhuachiqui maye sogote da ỹaqataxanai' co'ollaxa maye naña ye 'alhua Canaán. Qaq nagui qami' seỹaxanoto da ishet da aỹem qanqouaquic da ashec da selayiñi ye ita'a. Qaq qom ime, qaq ñe'eguelaq.»
6Nache so faraón 'enapeco':
«'Aue, qojec, 'aulayiñi ca 'arta'a, 'aupactelec da lquiquiaxac co'ollaq 'am dequiguiỹo'ot.»
7Nache so José jec da ilayiñi so lta'a, nache nnaicapegue' 'enauac so ltauapi maye huo'o naq 'enec maye hueta'a so lma' lta'araic so faraón qataq 'enauac ye 'alhua Egipto. 8Qataq nataqa'en nnaicapegue' so maiche lalamaxat llalaqpi so Jacob qataq so José qataq soua lqaỹa't. Qaq ndotec co'ollaxa so ñaqpiolec qataq so 'atetpi da qano'onaxatalec ye 'alhua Gosén. 9Nataqa'en so shiỹaxauapi maye huota'a aso nnaigonapi qataq so huota'a so lalo caipi, nnaictague' co'ollaxa so José. Qaq ỹataqta saqalota so shiỹaxauapi. 10Qaq somayepi co'ollaq ivita ye no'onaxa maye lalamaxat so Atad maye pa'aigue da nala' lliguisheguem ye tala Jordán, qaq huaña yemaye nache qaỹo'ot so lta'araic nasouaxac qataq noinaxac. Qaq huaña yemaye, nache so José ỹo'ot so lasouaxac, ivittrec soua siete na'axa'te souaxat so lta'a.
11Nache nam cananeopi maye netalec yi'iye 'alhua co'ollaq ila'a de'era qaỹo'ot nasouaxac, nache 'enapeco': Na Egipto le'ecpi huo'o da lasouaxac ỹataqta daquicota.
Ỹoqo'oye qaỹamata'ac yi'iye 'alhua da le'enaxat Egipto le'ecpi laquicoqo'. Yemaye pa'aigue da nala' lliguisheguem ye Jordán.
12Qaq soua llalqa so Jacob ỹataqta ipactelec co'ollaxa 'enauac nam lquiquiaxacpi so lta'a. 13Ime, nache somayepi ira'a ye 'alhua Canaán, nache ilayiñi ỹachaigui ñi auac maye naigui ye 'alhuolec ye Macpela, yem desheenaxana co'ollaxa so Abraham, ỹachegoxoto'ot so Efrón som hitiita da ỹauotaique lma' na maiche lalamaxat lqatacpi. Yi'iye 'alhua qataq ñi auac pa'aỹa'ague da nala' lliguisheguem ye lma' so Mamre. 14Qaq so José co'ollaq imat da ilayiñi so lta'a, nache ỹe'eguelaxa ye Egipto, nnaictagueto soua lqaỹa't qataq 'enauac som ca'ateguepi co'ollaxa somaye.
Soua pa'atrec na'axa'te da nachaalataxac so José
15Qaq so Jacob co'ollaq mashe ileu, nache soua lqaỹa't so José deuennataxaata'ape, 'eeta': Nagui ñi José yo'oqta da qomi' nquiỹalo nache ipalaique lvi' souaxat da qauem maye so'otaxac co'ollaxa.
16Nache soomaye ỹamaxareua'a so José da la'aqtac, 'eeta':
«So 'arta'a, co'ollaq yaqta'a da ileu, nache qomi' 'enapegalo 17da 'am sa'aqtaxanaxam da la'aqtac maye 'eeta': Aỹem 'arqouaguec qome, 'am seỹaxanot da 'auchoxoren da sa ỹaỹamaxañi maye 'am ỹo'otec naua 'arqaỹa't, cha'aye naamaye ỹataqta qauem da 'am ỹo'otec. Qaq ỹoqo'oye nagui 'am ñachoxonnaqot da qomi' 'auchoxore'n cha'aye qomi' lamaxa'she Ñim Natamnaxala' so 'arta'a.»
Qaq soua namaxa'she co'ollaq ña ỹa'axattrac de'era na'aqtac, nache so José nỹeetac. 18Qaq huaña nache nvildeuo soua lqaỹa't nache ỹa'aldoto naua l-llecte somaye, iviraxata'agueta naua lata'api na 'alhua, nache 'ena'apo':
«Nagui souaqta'a ne'ena. Qaq 'auauo'oi qomi' 'arlataqa.»
19Qalaxaye so José 'enapeco':
«Saishet qome da qayi'i. Cha'aye aỹem saishet da sa'aualec ca lo'onataxanaxac Ñim Lo'onatac 'Enauacna. 20Qami', aỹem qauo'ochec co'ollaxa so qauem, qalaxaye Ñim Lo'onatac 'Enauacna nmeneguet naqa'en se'eso qauem dam no'on, da yaqto' so'ot dam seloqta'a nagui da yaqto' ñeca'alaxatec da nachaalataxac na qalota shiỹaxauapi. 21Qaq ỹoqo'oye saishet qome da qayi'i cha'aye aỹem qami' sanema qome ca qo'oqoi qataq na qaỹa'alquipi.»
Qaq 'era da 'eetec so José da machiyiñi naqa'en soua lqaỹa't, cha'aye co'ollaq detaqtacoto nache ỹataqta huesotte' naua la'aqtaqa.
Da l-leuaxa so José
22Qaq so José qataq so llalaqpi so lta'a nache netaña co'ollaxa ye Egipto. So José ivi' soua ciento diez vi'iye da nachaalataxac, 23nache iviralec da ỹauaachigui so llalaqpi so laualpi so Efraín. Nataqa'en ivira'a da ỹaconeguet da ỹalecnoigui so lalamaxat llalaqpi som llalaqpi so laual Maquir, som llalec so Manasés.
24Qaq huo'o so na'a'q, nache so José 'enapegalo soua lqaỹa't, 'eeta':
«Mashe sa qaỹapeque ye laloqo' da seleu, qalaxaye Ñim Lo'onatac 'Enauacna anac qome da qami' itaua'n nache qami' nqateeguesopa ne'ena 'alhua, da yaqto' qami' ỹauegalo ye 'alhua maye ỹachaxanapeguem co'ollaxa so Abraham, Isaac qataq so Jacob.»
25Ime, nache so José 'enapega so llalaqpi so Israel da ỹan da la'aqtac, da yaqto' ipactelec, nache 'enapega, 'eeta':
«Ỹoqta 'eesa qome da anac Ñim Lo'onatac 'Enauacna da qami' itaua'n. Qaq qom ipacchigui damaye nache qami' qauache' qome naua ipi'ineqa.»
26Qaq so José mashe ivi' soua ciento diez vi'iye da nachaalataxac co'ollaq ileu huaña ye Egipto. Ime, nache qaicoyigui da lo'ocỹaxac so lata' da yaqto' saishet da nlaguiñi da lo'ocỹaxac. Ime, nache qaỹachagui aso laỹe' na saqca.
