Hebreos 12

₁¡'Enauac se'eso shiỹaxauapi nagui qomi' datataua'alo da qomi' ỹachaxaategalo da lpi'iỹaxac! Qaq ỹoqo'oye naua vi'iye maye souaqtaiguilo iuen da saxanaxañi da so'otaqtac ca qarasouaxashet, nataqa'en ño'onaxataqchigui 'enauac nam saishet da qomi' ỹalemaxa't, nache semataqo'ot Ñim Lo'onatac 'Enauacna da qanaquitaxac. Cha'aye de'era achaalataxac 'eeta'am ca qomitaxac, qaq da ñe'etaxaloxo qalaq 'eeta'am da lpattapiguilo naua qarchel da saishet da qomi' ỹashenema da ñeqalgoxosoq.

₂Qaq ỹataqta seloqchigui So Jesús, cha'aye nacheso so chegoqo'ot da qanaquitaxac, qataq nacheso som ỹo'ot da nquictasheguem da qarpi'iỹaxac. So Jesús ỹataqta na'añaxateguet da ne'enaguec co'ollaq qaiuaxaneguet so npe'enaxaqui, cha'aye ỹaỹaten da inoxonaqchetec da lta'araic nque'eenaxac, nache ỹaconeguet da lta'araic lamaicỹaxac. Qaq nagui Ñimaye mashe nso'ootañi, netaua'a na aloic añi nso'onaxaqui Ñim Lo'onatac 'Enauacna.

₃Qaq ỹoqo'oye qami' qauennataxañiilec da lataxac So Jesús. Qalota so shiỹaxauapi 'etaxaloxoicpi nquiỹa qataq ỹauo'o da nque'eenaxac, qalaxaye Somaye nache queta. Qaq ỹoqo'oye qami' saishet da qanañañi qataq saishet da qaica ca qara'añaxaqui, ₄cha'aye de'era qanloquiaxaqui da qauataita'aguet da ñe'etaxaloxo, damaye saishet da qami' iviraxata'alo da qaullivi da qoñiỹa'am Somaye.

₅Qalaxaye qami' 'eeta'am da qaucoviỹa'ai da lqataxac Ñim Lo'onatac 'Enauacna maye ỹami' na llalaqpi maye nanettalec ana nere, 'eeta':

₇Qaq nagui qoviitaigui da qanque'eenaxaqui, cha'aye souaxat da qami' ỹauoteque Ñim Lo'onatac 'Enauacna qataq qami' nlaxaatregue'c 'eeta'am ca yo'oqchigui llalec. Cha'aye qaica ca yo'oqchigui nta'a da saishet da sa nlaxanec ca llalec. ₈Qataq Ñim Lo'onatac 'Enauacna da huo'otaq sa qami' ỹapaxague'n da 'eeta'am naqa'en da 'eetec da nlaxanec 'enauac na laỹepi llalaqpi, nache saishet qone' da ỹoqta 'eesa da qami' llalqa Ñimaye. ₉Co'ollaq ñaq qomi' nogotolqa, nache soua yo'oqchiguilo qarta'al qomi' ỹapaxagueeta'ape, qaq qomi' nache huo'o naq 'ene'c ñaqa'ena'q soomaye. Qalaq ta'ainectoxo' da saq ỹactec da salaxasoxoguet Ñim Lo'onatac 'Enauacna maye Qarta'a maye neta'ague da piguem, cha'aye da nache shenaqtec de'era, nache huo'o ca qarca'alaxa chochaq tatec.

₁₀Co'ollaq ñaq qomi' nogotolqa, nache soua yo'oqchiguilo qarta'al qomi' ỹapaxagueeta'ape, cha'aye ỹaỹaten damaye da qomi' ỹaỹamaxaayiñi. Qalaxaye Ñim Lo'onatac 'Enauacna qomi' ỹapaxagueneque dam ỹoqta 'eesa da qomi' ỹaỹamaxaayiñi, cha'aye nshetaique da qomi' qui'itte', da shenaqta'am Ñimaye. ₁₁'Eesa da qaica ca qanlaxanaguec da saỹamaxannaqteguet da ivita da qomi' qanlaxa'n, cha'aye huo'o da lqui'ic. Qalaxaye da saỹaanaqteguet ca qanapaxaguenataguec maye qomi' ỹanema Ñim Lo'onatac 'Enauacna, nache huo'o da qarlagaxayec qataq so'otaq ca ỹaỹamaqchiguiñi.

₁₂Qaq na'aictaxa 'enauac de'era, qomi' saishet da saxanaxauec da qarpi'iỹaxac Ñim Lo'onatac 'Enauacna. Cha'aye da achaalataxac da 'eeta'am ca qomitaxac, nache naua qarhuaxayilli' qataq naua qarllectelli' da mashe qaica ca la'añaxa'c, qaq no'on qome da qana'añaxacheeta. ₁₃Qanqalgoqoi qome, qoquiitegue so nqa'aic maye ỹataqta ỹashectec qataq nalochiguiñi, yaqto' ca napia' maye ñi'iỹauo, qalaq ishet da no'oita, qataq saishet da ỹe'eguelaxa da vi'ita'a't.

₁₄No'on da ỹataqta qanpogoxoiñiỹapegue' da qaulaquiitapiguiñi, qataq qaualaqaiguet Ñim Lo'onatac 'Enauacna, cha'aye da saishet da nache qoñiitec de'era, nache saishet da ivira da ỹataqta qauloito'ot Ñimaye. ₁₅Saishet da qauashiñi da huo'o ca ca'ai da lauotaxanaqtaic Ñim Lo'onatac 'Enauacna. Nataqa'en saishet da qauashiñim da huo'o ca ỹo'ot ca sa ỹaỹamaxañi da qoñiita, cha'aye damaye qami' na'axa't; ¡'eeta'am aca huoue chemaxarai maye deshenataxan! ₁₆Qataq saishet da huo'o ca 'oonolec da qoñiita da nquishestac, huo'otaq da ỹo'otan Ñim Lo'onatac 'Enauacna. De'era 'eeta'am da ỹo'ot co'ollaxa so Esaú da imen da qaiqataxaatapigui' da talec, cha'aye na'auaxanec ñalec nmeneguet naqa'en so nhuoshec maye qaỹachetagui so nquia'axaqui. ₁₇Qaq somaye co'ollaq huotaique da so lta'a da ỹaalec cam iqataxaatapigui' da talec, cha'aye na'auaxanec ñalec, nache so lta'a saishet da ỹami'. Qaq ỹoqo'oye so Esaú ỹataqta lta'araic da nnoinaxac, qalaxaye mashe qaica ca lỹa lataxac.

₁₈Qami' saishet co'ollaxa da qanquiquiiua'a añi saqaỹoqotcheguemec 'alhua maye le'enaxat Sinaí, añim ishet da qaila'a qataq qaipoteua'a maye huetalec nataqa'en so norec maye 'ettaigui, qataq so napalaxa qataq so la'at lta'araic. ₁₉Nataqa'en saishet da qaua'aqaỹa na l-lamaxa ana nasheere qataq da lavilỹaxac Ñim Lo'onatac 'Enauacna co'ollaq ỹan so lamaxasoxonaxacpi. Qaq som hua'aqchigui se'eso nvilỹaxac maye chemaxalec añi qaỹoqotcheguemec 'alhua maye le'enaxat Sinaí, somayepi nachoxoreetac co'ollaxa, da yaqto' saishet da queta da detaqtac Ñimaye, ₂₀cha'aye somayepi saishet da ỹañoxot da ỹalaxaguet so namaxasoxonaxacpi maye qaỹamaxalec: «Iuen da qairota'a na coma' huo'otaq aca taquiaxai da qaỹalauat ca camachaqca shiỹaxaua huo'otaq shiguiỹac da choche peua'a na laỹe aña'añi qaỹoqotcheguemec 'alhua.» ₂₁Qaq ỹataqta huo'o da lchec se'eso ilota'a somayepi maye netalec aso qaỹoqotcheguemec 'alhua, qaq ivira'a so Moisés 'enaco' da la'aqtac: «Ỹataqta aỹem iviloxolaqchet da icolanaxa.»

₂₂Qami' qalaxaye mashe qanquiquiiua'a añi saqaỹoqotcheguemec 'alhua maye le'enaxat da Sión, añim netalec ye nỹecpi maye lalamaxat Ñim Lo'onatac 'Enauacna maye nache 'eetai' da nca'altauec. Yi'iye nỹecpi nacheye ye Jerusalén maye neta'ague da piguem, yem hueta'a nam ỹataqta qalota namaxashec piguem le'ecpi da ỹo'oxoreetac Ñim Lo'onatac 'Enauacna, ₂₃qaq nache hueta'a nataqa'en 'enauac nam ỹamata'ac da lalamaxat llalaqpi qataq nam ỹami' da ishet da hueta'a yemaye. Qami' mashe qanquiquiiua'a Ñim Lo'onatac 'Enauacna ñim nmit qome 'enauacna. Nataqa'en mashe qanquiquiiua'a da saqcha'a lca'alaxa so no'on shiỹaxauapi maye Ñim Lo'onatac 'Enauacna naloqchiichiguiñi naqa'en da lataxac. ₂₄Qami' mashe qanquiquiiua'a So Jesús, qataq qantooñita'ac da chegoqchigui Somaye da Ñim Lo'onatac 'Enauacna naralaxat da naỹamaxataxac da naỹamaxatto qami'. Qana'achec da chegoqchiguilo soua ltago'q So Jesús maye huecolde'c co'ollaq qaỹalauat da qaỹapalaxa't naua qarasouaxashe'ete maye chegaqaiguilo da qaye'etaxaloxo. Qaq ỹoqo'oye So Jesús napacalec da la'amaqchec so Abel, cha'aye soua ltago'q so Abel saishet da ỹa'n ca nchoxonnataxanaxa, nachaqrata da iỹaxaatraique ca lvi'.

_25-26Qaq ỹoqo'oye maxatchaxa da qoñiita, saishet da huo'o ca sa iqocha'a Ñim Lo'onatac 'Enauacna da qami' detaxaỹoto. Saishet da sa qauacoñiiguet, cha'aye som hua'au Israel le'ecpi maye sa iqocha'a co'ollaxa Ñimaye qalaq saishet da ỹet so lta'araic nhuaxanaguec. Se'eso na'a'q co'ollaq Ñim Lo'onatac 'Enauacna detaqtacot somayepi, qalaq so lvilỹaxac ỹacholaxan ana 'alhua. Qaq qomi' da sa saconaxaguet Ñim Lo'onatac 'Enauacna maye qomi' iỹaxanalo so lvilỹaxac maye chegoqtot na piguem, nache nataqa'en saishet da qomi' ỹe't ca lta'araic qanhuaxanaguec. Cha'aye nagui da la'aqtac Ñimaye 'eeta': «Qaltaq she'eguelaxalec da sacholaxan ana 'alhua, qalaxaye saishet da ndotec anamaye nataqa'en na piguem.» ₂₇Ñimaye da 'enapec: «Aỹem qaltaq she'eguelaxalec,» nache saỹatenaq da Ñimaye nqat qome 'enauac na maiche lo'onatacpi nam ishet da qanqochenaxat, da yaqto' nache ỹaataña nam saishet da ishet da qanqochenaxat. ₂₈Sanqot da qana'achec Ñim Lo'onatac 'Enauacna, cha'aye da lo'onataxanaxac Ñimaye maye qomi' ỹanema saishet da ishet da qanqochenaxat. Qaq ỹoqo'oye iuen da sho'oxorenaq Ñimaye chegoqchigui da lta'araic lsoxoyec qataq da ño'oxonnataguec maye ỹaỹamaxareeta da qoỹami'. ₂₉Cha'aye Ñim Lo'onatac 'Enauacna, Ñimaye 'eeta'am ca norec maye ỹataqta cochepchiguiñi naqa'en ca ỹavigaxat.