Da nhuaxanaguec na Israel le'ecpi souaxat nam saq 'en atamnaxala'pi
1e'Auashiiyigui qome aca nasheere,
cha'aye mashe anacta na vi'ic da naỹa
na lma' Ñim Nataxala',
souaxat da sa qaipaguelec
da ñaỹamaxataxac,
qataq qaỹataỹa'agueta naua
ỹamaxasoxonaxaco.
2Qaq nagui, namayepi
ỹa'alaqtai' da aỹem iỹaxaatacot, 'eeta':
«Qomi', 'am sauattonaq da 'Am
Natamnaxala' na Israel le'ecpi.»
3Qalaxaye na Israel le'ecpi
saishet da ỹaconeguet da no'on,
ỹoqo'oye na npa'aguenaxauapi
icanapec qome namayepi.
4Qataq namayepi ỹauo'o co'ollaxa na lta'alpi,
qalaxaye saishet da aỹem ipacapegue',
qataq ỹauo'o na lataxala'pi
maye saishet da sauatton.
Qataq ỹo'ot nam natamnaxala'pi
ỹachegoxotaigui na lalamaxat plata qataq na oro,
nache ỹo'ot da maiche nlaguiñi namayepi.
5Qaq qami' maye qarmaye na Samaria,
aỹem ỹataqta seqaiga ñim ne'enaqtac huaca llalec,
maye qanatamñeetacot.
Nache aỹem ỹataqta 'eroigui
da ỹalemataic da qami' salemataỹalo.
¿Chaq laguio' da qaviyiỹa da qami' qui'itte'?
6Cha'aye ñi'iñi huaca llalec ñimaye
lalamaxat na Israel le'ecpi,
ñimaye le'enaqtac som ỹaỹaten
da le'enaqtaxanaxac,
qaq ñimaye saishet da nacheñi
Ñim Lo'onatac 'Enauacna.
Qaq ỹoqo'oye ñi'iñi huaca llalec,
maye netaña ye Samaria,
ñimaye dolagui qome.
7Qaq cha'aye namayepi ỹaañi co'ollaxa na la'at,
nache lqateguishec qome ca la'at lta'araic,
nache ca lanaxanaqa' qaica ca ñaxaalec,
qataq qaica ca lqateguishec
trigo maye chegaqaigui na 'ayiiña,
qaq da huo'o ca lqateguishec,
nache chec qome nam chegaqauecpi.
8¡Huaña qome, nache 'eco' qanallec na Israel le'ecpi!
Nache na ỹotta'a't shiỹaxauapi da ilota'a namayepi,
qalaq 'eeta'am naqa'en ca nogoxoshet
maye qaica ca naigui,
9cha'aye namayepi tasheguema ye Asiria,
'eeta'am na 'ashena no'onaxa le'ec maye huegaqaic.
Qaq na Efraín qalaq desheenaxata'a
ana quisheguetaxaipi.
10Qaq na'aictaxa da ỹanem na nme
nam ỹotta'a't shiỹaxauapi,
qalaxaye nache 'ena'am selagaxattac qome namayepi,
nache huo'oi qome caua na'axa'te
da nque'etaxangui da lque'eenataxanaxac
na nta'alpi qataq nam nataxala'pi.
11Cha'aye na Efraín, qalota ana
no'oxoosheguem nca'atoxonaxalatepi,
maye ỹo'ot da huo'o naqa'en nam
lasouaxashetpi namayepi.
12Qaq cha'aye na'aictaxa da
qalota nam sereñi ỹapaxaguenataxanaxacpi da sanem,
qalaxaye ỹataqta qaica ca naigui naqa'en namayepi.
13Qaq namayepi nqopita da aỹem
ỹanot ana lachetaqtaxanaqtepi,
nache namayepi chec na lapat nam nachetaqtaxanaxat,
qalaxaye Aỹem Nataxala' sa
saỹamaxaren da ỹo'ot namayepi.
Qaq Aỹem seuennate qome nam qauem maye ỹo'otpi,
nache sauo'o ca nhuaxanaguec
souaxat na lasouaxashetpi,
qataq she'eguelaxata qome ye Egipto.
14Qaq nam Israel le'ecpi,
no'oxoosheguem na lma' lta'araicpi,
qalaxaye icoua'ai Ñim Lo'onatac da nachaalataxac.
Qataq na Judá le'ecpi, qalota na
no'oxoosheguem huaqta'a't nỹecpi
maye huo'o na lpaqtaxatpi,
qalaxaye aỹem, ñamaxa qome ca norec
da yaqto' ỹavic ñaqa'en na lma' lta'araicpi.
