Isaías 1

₂'Am piguem qataq 'am 'alhua, ña qana'axaỹaxañiỹa

da la'aqtac Ñim Nataxala' maye, 'eeta':

«Aỹem saqchet co'ollaxa so ỹalaqpi,

nache seviraxata'a da ỹepi ñaqa'en,

qalaxaye somayepi aỹem dataỹa'aguet co'ollaxa.

₃Ca nauegaxanaxala' huaca ỹauatton ca na'aco',

qataq ca 'ashena ỹauatton ca

lquia'axanataxanaqa' ca na'aco',

qalaxaye na Israel le'ecpi

nam nhuo' le'ecpi maye ỹalamaxatpi,

saishet da aỹem ỹauatton qataq qaica ca lauattonaxanaxac.»

₄Choxoraicpiolec nam shiỹaxauapi maye 'etaxaloxoicpi,

nhuo' le'ecpi maye nlaxagui na lasouaxashetpi,

namayepi chegoxoguet so qauemaicpi,

ñalaqpi maye lqopitaxat na qauem.

Namayepi qaỹoqta naqa'en Ñim Nataxala',

qataq ca'ai Ñim Qui'itta Natamnaxala' na Israel le'ecpi.

₅Qami' ỹataqta qanañañeeguet da qami' yeloxoiqa,

na qaro'oqui qalaq mashe qaica ca ishet da qaiuaxaachiguiña.

Naua qarqaigolle' qalaq mashe dolate',

nache mashe imauec da qaica ca qara'añaxaqui.

₆Qaq ỹataqta 'enauac da qaro'ocỹaxaqui da qaica ca no'oita,

'enauac da que'emaq, nalauat

qataq huo'o na lli'i na qarque'emaqai,

nache qaica ca anac da qami' natare'n

qataq da ỹaxachigui nam qarque'emaqai,

huo'otaq da qami' ỹa'ame'n ca aceite

da yaqto' ỹa'axaneguet da qanqui'iqui.

₇Ye qana'alhuai qalaq ỹataqta toolec,

qataq ye huaqta'a't nỹecpi maye qarmaye ỹataqta ỹavicta.

Qataq ỹataqta qauauañiichigui da na qampa'aguenaxauaipi

chectac na ala na qa'añiguishiqui.

Nache 'enauac da ỹataqta toolec,

'eeta'am da ilaxachigui ca chegaqauec shiỹaxauapi.

₈Ye Sión nachaqyeta no'onañi 'eeta'am catai' ña'axaqui

da netangui na laiñi ca uva lma',

'eeta'am ca npe'lolec da netangui na laiñi ca melón lma'.

Qataq ndauec 'eeta'am ca huaqta'a't nỹecpi

da coleesop ca pa'aguenaxauapi.

₉Ñim Nataxala' maye Qaica ca Ỹaqalanapec,

taxa da qaica ca no'onaxatañi

da nca'altauec da shenaqta,

qaq nagui taxa nache shenaqta'ama

soua Sodoma qataq Gomorra.

₁₀Qami' nataxala'pi ye Sodoma

ña qana'axaỹaxañiỹa da la'aqtac Ñim Nataxala',

qami' nhuo' le'ecpi maye qarmaye ye Gomorra

ñaq qana'axaỹaxañiichigui da qami' ỹapaxagueneque

Ñim Qanatamnaxala'.

₁₁Ñim Nataxala', 'eeta':

«¿Ta'ainco' da aỹem qandoitapegueua'a

nam ỹataqta qalota qarachetaqtaxanaxache da qauavigaxache?

Ye aỹem mashe ỹataqta saỹemec

na qarachetaqtaxanaxache qagueta lhuaraicpi,

qataq na lcheta na huaca llalaqpi,

aỹem mashe ỹataqta seqaiga na ltago'q

na huaca lhuaraicpi, qataq na qagueta lhuaraicpi,

qataq na quetaq llalaqpi.

₁₂Qami', aỹem qauanaiua'a naxa,

qalaxaye ¿negue't ca qami' ỹamaxaleguete da qaushepaxanaqchichi

nam nqasoxoc añi ỹalamaqte atamnaxaqui?

₁₃Qaq nache tachiguiña da aỹem qandoitegueua'a

ana qarachetaqtaxanaxache maye qaica ca naigui,

qataq mashe sa sesheteguet na lmala'q na nchenaxanaxat.

Qami' qauỹaxañiuga naxa na nhuo' le'ecpi

da yo'oxonnataxan da dalaxaic so ca'agoxoic

qataq ye na'a'q mataxaqui,

qalaxaye Aỹem ỹataqta sa sesheteguet

na laponaxacpi na shiỹaxauapi

maye ỹo'ottac na qauem.

₁₄Ỹataqta seqaiga na qaraponaxaqui

da dalaxaic so ca'agoxoic,

qataq nam na'ashaxacpi maye qauo'ocheetac,

namayepi ỹataqta aỹem sa ỹalemaxat

qataq mashe sa ñalo'oguet.

₁₅Qami' naxa da qaỹa'añeetrasheguem

naua qarhuaxayilli' da qanatamñi,

nache Aỹem ỹaqa'a da samata'ague,

qaq na'aictaxa da ỹaguec da qanatamnaxaqui,

qalaxaye Aỹem saishet da qami' sa'axaỹalo,

cha'aye naua qarhuaxayilli' ỹataqta nlaqchiguilo na ntago'q.

₁₆¡Qanỹoi qataq qanqui'itaxache!

¡Qanqacheueeguesop da imeenaxanaxac

nam qauem maye qauo'ocheetac!

¡Qaỹa'axañiiñi da qauo'ocheetac na qauem!

₁₇¡Qanapaxagueñiỹa da qauo'oche ca no'on,

qana'añaxache da qauo'oche ca nalochiguiñi,

qautauañi ca shiỹaxaua maye sa qaiyacnapec,

qauo'ochec ca ỹaỹamaqchiguiñi lataxac ca saploq,

qataq qavicheelec aca pa'ai!»

₁₈¡Ñim Nataxala', 'eeta':

«Ña qauanaqui da ñecotaỹaqapigui de'era lataxac,

na'aictoxo' da ỹataqta togaxaraic na qarasouaxashichi,

qalaxaye Aỹem so'ot qome da ỹataqta ỹapagaq 'eeta'am aca aloñi,

na'aictoxo' da 'eeta'am ca ỹataqta togaxaraic

nqo'oilliguishec hualoxolaỹi,

qalaxaye Aỹem so'ot qome da ỹataqta ỹapagaq 'eeta'am ca qagueta laue.

₁₉Da qauasacheeguet da qami' laxaraiqa,

qaq huaña nache qolliquiitac qome na ỹataqta no'on

maye chegaqaigui ana 'alhua,

₂₀qalaxaye da nache qoquiito'ot da sa qaualaqai,

nache qoviỹaigui qome ca alaataxac da qami' qaỹalaua't.»

Qaq 'era da la'aqtac Ñim Nataxala'.

₂₁¡'Am huaqta'a't nỹecpi maye 'am laxaraic co'ollaxa

qaq nagui qalaq 'avira'a da sa 'aualaq!

Som shiỹaxauapi maye 'am netaigui co'ollaxa

ỹataqta ỹo'ottac co'ollaxa da ỹaỹamaqchiguiñi lataxac,

qataq ỹataqta no'on da lataxac,

qaq nagui qalaq nda'a't na laataxanaxaicpi na 'am netaigui.

₂₂Qoneta'am co'ollaxa ca lcat plata da 'aryac,

qaq nagui qalaq qoneta'am na lasogoñi,

qataq qoneta'am co'ollaxa ca no'on lataxa,

qaq nagui qalaq qoneta'am na 'etaxat.

₂₃Na 'arataxala'pi ỹataqta qauemaicpi

qataq nauochaxaua na cachaxaicpi.

'Enauac da nmitta'a da nmeela't,

qataq nmitta'a da qaỹauo'o na nmepi.

Saishet da ỹo'otec ca ỹaỹamaqchiguiñi lataxac ca saploq,

qataq saishet da huapegue' da itauan aca pa'ai.

₂₄Qaq ỹoqo'oye Ñim Nataxala' maye Qaica ca Ỹaqalanapec,

Ñim La'añaxanec na Israel le'ecpi, da la'aqtac, 'eeta':

«¡Nache tachiguiña nagui! Aỹem sataỹa'aguet qome nam aỹem ipa'agueetacpi,

ñaq sepalaique ca ivi'.

₂₅Aỹem ñauaxaỹaxaasheguem qome na ihuaq da 'am sataỹa'aguet,

nache ỹataqta ỹavicta ñaqa'en nam lasogoñi maye 'am huetaigui,

qataq seỹouec 'enauac na 'arshepaxanaxa.

₂₆Qataq na nmit na nasouaxashet maye 'am netaigui

she'eguelaxata qome dam no'on lataxac,

qataq nam ỹan da nqataxac 'eeta'am ñaqa'en so chegoqchiguiña co'ollaxa.

Qaq qom ime da so'ot de'era, nache qaỹe'eguelaxa da 'am qaỹamata'ac,

‹Huaqta'a't nỹecpi maye huetaigui da ỹaỹamaqchiguiñi lataxac›,

‹Huaqta'a't nỹecpi maye laxaraic›.

₂₇Aỹem serolec qome da ỹaỹamaqchiguiñi ỹo'onataxanaxac,

da ñeca'alaxatec qataq da sesouec na hueta'a ye Sión,

nam Aỹem ñe'eguelaxa qome.

₂₈Qalaxaye aỹem selaxachigui qome

na qauemaicpi qataq na 'etaxaloxoicpi,

qaq nam aỹem ca'ai namayepi ileu qome.

₂₉Qaq huaña qome nache qaua'aquiilec ana enciinapi,

qataq nam nanaxanaqa'piolec maye ỹataqta qanqopichiỹa,

nam huaña naxa da qavio'oxoreñi

nam ne'enaqtac atamnaxala'pi.

₃₀Nache qoñeeta'am qome aca encina maye deqaqa ana laue,

qataq qoñeeta'am ca nanaxanaqa'

da saq talec ca 'etaxat.

₃₁Qaq cam ỹale 'añaxaic qalaq 'eeta'am ca 'auaqpi,

qataq nam lo'onatacpi 'eeta'am aca lto'o,

qaq caamaye 'enauaque da ỹavi'c,

nache qaica ca anac da ỹalama't.»