No'onec da qoỹan da 'achecỹaxac
1Qaq que'eca na'a'q, nache 'am qonapec qome
«'Am sanot da ña'achecỹaxac 'Am Nataxala',
cha'aye na'aictaxa da aỹem 'aualemataỹa co'ollaxa,
qalaxaye da 'aralemataic mashe vi'iiguet,
nache aỹem 'avi'eguelaxatem da ilagaxayec.
2Ñim Lo'onatac 'Enauacna, nacheñi ñim aỹem nca'alaxatec,
aỹem ñaquita'a Ñimaye nache saishet da she'etac.
Ñim Nataxala' nacheñi ñim ỹe'eguenaxala'
qataq nacheñi ñi ỹa'añaxac, qataq nacheñi ñi ica'alaxaqui.»
3Nataqa'en qami' ishet da qauamaichiguiñi qome
da qanỹomiigui acam laỹe' da nca'alaxa,
4nache que'eca na'a'q qoñeeta' qome:
«Qaỹa'añiỹot da qana'achecỹaxaqui,
qataq qavio'oxoreñi Ñim Nataxala',
qaua'aqtaxañim na ỹotta'a't shiỹaxauapi
'enauac nam huo'o maye ỹo'otpi co'ollaxa Ñimaye,
qataq qauennataxanaxañic namayepi
da Ñimaye imattalec 'enauacna.
5Qauo'onaxañeeto'ot Ñim Nataxala',
cha'aye ỹataqta lta'araic nam ỹo'otpi co'ollaxa,
qaq iuen da ỹaỹaten 'enauac nam huetalec ana 'alhua.
6Qauo'onaxañi qataq qantoñiỹapigui'
qami' maye qarma'ai na Sión,
cha'aye Ñim Qui'itta Natamnaxala' so Israel
maye qami' netanguilo ỹataqta lta'araic da la'amaqchec.»
