Isaías 11

₁Qaq asa'aso qo'oipaq lamo,

maye nacheso so Jesé, huo'o qome aca llaxataxa,

qaq aca'aca llaxataxa chegoqtoiguilo qome naua lpa'aye.

₂Qaq so Saqcha'a La'añaxac Ñim Nataxala'

nache hueta'aguet qome camaye,

nache ỹanem da laỹaanec, laỹaanataxanaxac,

sanqalat, la'añaxac, lauattonaxanaxac,

qataq ỹalaxaguet Ñim Nataxala'.

₃Da huo'o ca nmit qalaq saishet da quetague'

da yo'oqchigui lataxac ca shiỹaxaua,

qataq saishet da ỹo'ot ca chochaq la'axaỹaxac,

cha'aye ỹaỹamaxareeta da ỹalaxaguet Ñim Nataxala'.

₄Nacherata da do'ogoxona da nalochiguiñi lataxac

da nmit na choxoraqpi, qataq iueelec

nam qaica ca la'amaqchec maye netalec ana 'alhua.

Naua la'aqtaqa qalaq 'eeta'am ca pon 'epaq

da iuaxan ca qauemaic, qataq ỹauota'a

na la'at maye chegaqaigui na alap da ỹalauat ca qauemaic.

₅Camaye nache 'eetai' qome da ỹaatañi

da nalochiguiñi qataq dam 'eesa lataxac.

₆Qaq huaña qome, nache ca qa'alaq

nhuoteete' ca qagueta llalec, ca quiyoc

qataq ca quetaq llalec huaqta'a't da nmattrapeguec,

ca huaca llalec qataq ca llon llalec

qalaq nache nactasheguema't da llaxa,

qaq catai' nogotolec ilotegueto qome caamaye.

₇Aca huaca qataq aca 'oosa qalaq auochaxau' qome,

qataq caua llalqa huaqta'a't qom nmattrapeguec,

qaq ca llon qalaq chectac qome na 'auaqpi

'eeta'am ca nauegaxanaxala' huaca.

₈Qaq catai' nogotolec maye ñaq lleptac

qalaq ỹa'ashaxaatac ca lauac ca na'araxanaq,

qataq ishet qome da ỹasheltapeegue ca lauac camaye.

₉Nache cam hueta'a añim qui'itta ñeqasoxonaxa

qaica qome ca ỹo'otec ca qauem ca lỹa,

cha'aye da nauattonaxanaxac Ñim Nataxala'

nlaqchigui qome ana 'alhua,

'eeta'am na 'etaxat da nlaqchigui naqa'en aso auaxai.

₁₀Qaq qom ivita que'eca na'a'q,

nache aca llaxataxa se'eso lpa'a'

maye nacheso so Jesé, nachaañi qome

'eeta'am da la'anaqte na nhuo' le'ecpi,

nache na ỹotta'a't shiỹaxauapi jec qome da nmittaique,

qaq cam hueta'a camaye qalaq ỹataqta huo'o qome da llo'oxoyec.

₁₁Qaq que'eca na'a'q Ñim Nataxala'

qaltaq ỹachaxan qome da la'añaxac,

nache ñe'eguelaxat cam lca'alaxaicpi

nam lalamaxat nhuo' le'ecpi, maye hueta'a ye Asiria,

Egipto, Patros, Etiopía, Elam, Sinar, Hamat,

qataq ana ỹaqa'ata 'alhuapiolec aso auaxai.

₁₂Qataq nauaxaỹaxaasheguem qome aca la'anaxanaqte

da yaqto' nam ỹotta'a't shiỹaxauapi ila'a,

nache laỹona't na Israel le'ecpi

maye qaỹauega co'ollaxa ye ỹaqa'a 'alhuapi,

qataq chegoqchiguiña naqa'en 'enauaque

naua laỹel ana 'alhua,

na Judá le'ecpi maye nlagaxattac co'ollaxa.

₁₃Da lquiỹaxanaqtaic ye Efraín imeuo qome,

qataq da lalemataic ye Judá vi'iiguet qome,

nache ye Efraín saishet qome da nquiỹatega ye Judá,

qaq ye Judá saishet qome da dalematatega ye Efraín.

₁₄Maye nacherata da ntauna't qome da dataira'aguet

ye Filistea le'ecpi maye pa'aỹa'ague da nala' lliguiñi;

qataq huaxaỹa't qome da deuotaxanec da lsallaxa

yem pa'aỹa'ague da nala' lliguisheguem,

qaq da la'añaxac ivira'a qome ye Edom qataq ye Moab,

qataq ivira'a da choche ỹamaqtac qome ye Amón le'ecpi.

₁₅Ñim Nataxala' ỹauategue qome ca nqa'aic

aso Auaxai Togaxarai,

qataq nauaxaỹaxaasheguem na lhuaq

taalec naqa'en so tala Éufrates,

qataq anacot ca la'at maye ỹataqta chaqaic,

nache icolaxachigui se'eso tala

siete naqa'en caua la'auaxaco, qaq saiuen qome

da qanqa't naua pela'ate da qaỹa'axasoxonguilo caamaye.

₁₆Qaq yem no'onañi nhuo' le'ecpi

maye lalamaxatpi Ñim Nataxala'

qom ivita da ñe'eguelaq chegoqchiguiña ye Asiria,

nache qalotegue qome ca llec nqa'aic,

'eeta'am so na'a'q co'ollaq so Israel le'ecpi ca'ai ye Egipto.