Qaỹa'axata'a da nlaguiñi ye Babilonia
1Da na'aqtac da qaỹa'axata'a ye toolec 'alhua maye huaqta'ai' aye auaxai, 'eeta':
'Eeta'am ca la'at maye chegoxogue da taguiñi,
da anac nam chegaqalec ye toolec 'alhua,
yem 'alhua maye ncolanaxat.
2Qaq aỹem Isaías, ỹataqta huo'o da lchec som ỹauanaqchec
maye aỹem ỹachaxana Ñim Lo'onatac 'Enauacna,
som que'elaqtaxanaxaic deque'elaqtaxan
qataq som laqtaxanaxaic delaqtaxan.
¡Ña 'anachaañi 'am Elam! ¡Qataq 'auloqui 'am Medos!
Aỹem, nache tachiguiña ñaqa'en da nachoxoc na shiỹaxauapi.
3Na ỹo'oc qalaq ỹataqta imauec da daỹalli,
qataq ỹataqta ñeviitiguiñi da ñiqui'ic, sheeta'am aca 'alo da deco'otapigui',
da ỹachetataic qalaq ỹo'ot da sa sa'aqa,
qataq da ỹi'iỹaxa ỹo'ot da sa ñauaañi.
4Ye iuennataxa qalaq sanaỹaten,
qataq aỹem iviloxolaqchet da icolanaxa.
Na latomoxolec ye avit maye ỹataqta iqopitaxat naxa,
qalaq ỹe'eguelaxa da chaqaic ñaqa'en.
5Namayepi ỹaỹamaxaañi na lquia'axala'pi,
qataq lapaxañi nam lapiaxala'pi,
nache namayepi deque'etac qataq nỹomtac.
Qami' nataxala'pi, qanachaachiñi
qauqashelgaqchichi ana npaqtaxanaqtepi.
6Cha'aye Ñim Nataxala' aỹem 'enapega, 'eeta':
«'Aue qojec nache 'auauo'o qome ca nauanaxanaxanec,
da yaqto' dalaxanec 'enauac nam ila'api camaye.
7Da huo'otaq ila'aguet aca naigona maye lauegaxala'ate caua caaỹo,
huo'otaq ca shiỹaxauapi maye netalec ca 'ashenapi,
huo'otaq aca nauanaxanaxapi, nache ỹataqta ichemaxatta qome.»
8Huaña nache so nauanaxanaxanec ỹa'alaq, 'eeta':
'Am ỹataxala', nam ỹauanaxanaqa' nache soota'a imauec ye na'a'q,
qataq imerauec naua pesa'ache da soota'a namaye.
9Qaq aỹem sela'aguet na shiỹaxaua netangui ana naigona
maye lauegaxala'ate naua caaỹo.
Qaq da la'aqtac namaye, 'eeta': «¡Mashe qailaxachigui,
mashe qailaxachigui ye Babilonia!
Qaq 'enauac na lqui'ipi nam natamnaxala'pi huetaiya',
ỹataqta 'enauac dolachigui.»
10Qami' ỹalamaxat ihuo' le'ecpi maye qami' qaỹapetapiguilo qoñeeta'am ca trigo,
aỹem mashe qami' sa'aqtaxanema som sa'aqchigui
maye chegoqo'ot Ñim Nataxala' maye qaica ca Ỹaqalanapec,
Ñim Natamnaxala' na Israel le'ecpi.
Qaỹa'axata'a dam talec qome ye Edom
11Da na'aqtac da qaỹa'axata'a dam talec qome ye Edom.
Aỹem sa'axaỹa so nỹaxanaxac chemaqchiguiña ye Seír, 'eeta':
«'Am nauanaxanaxanec, ¿chaq negue't ye la hora ne'ena pe?
¿Chaq lcate' caua saxanaxalo da yaqto' yo'oxoñi?»
12Nache so nauanaxanaxanec ỹasat, 'eeta':
«Mashe yo'oqteguet na yo'oxoñi, qalaxaye nataqa'en na pe.
Qaq da huotaique qaunataxañi qalaq qaunataxañi,
qaq da huotaique da qañe'eguelaqai qalaq qañe'eguelaqai.»
Na'aqtaxanaxac da qaỹataỹa'aguet ye Arabia
13Da na'aqtaxanaxac da qaỹataỹa'aguet ye Arabia, 'eeta':
Nam queuoxoicpi Dedán le'ecpi,
maye nmataqa' naxa na huouesat ye toolec 'alhua,
14ña qauqachiỹa'aguet nam ỹaguec na laquip,
nache qaỹa'añim ca 'etaxat.
Qaq qami' maye qoñiitalec na 'alhua Tema,
qauqachiỹa'aguet nam naneltaxaatacpi nache qaỹa'añim ca aloq.
15Cha'aye namayepi dataueeguesop nam ỹeelonec,
nam ỹeelonec maye ỹataqta ỹaxaraic,
qataq na nchecnecpi maye ỹataqta lhuotta da qoỹainaxana,
qataq da lchec da alaataxac.
16Qaq Ñim Nataxala' aỹem 'enapega, 'eeta':
«Qom inoxonec ca 'oonolec vi'i, maye 'eeta'am ca vi'i
maye qoỹanem da do'onataxan ca 'onataxanaxaic,
qaq nache 'eetec qome da imeuo 'enauac da la'amaqchec ye Quedar.
17Nache saq 'amaqtaq qome ca checnec lo'opi,
qataq ca alaataxaicpi maye lca'alaxaicpi ye Quedar.»
Qaq 'era da la'aqtac Ñim Nataxala' maye Natamnaxala' na Israel le'ecpi.
