Qaỹa'axata'a dam talec qome ye Jerusalén
1Da na'aqtac da qaỹa'axata'a so ca'amegue maye huaña so nauanaqchec:
¿Ta'ainco' ye 'enauac da qoñeeta da qa'aisheguema na l-laq na nỹecpi?
2Qami' huaqta'a't nỹecpi maye qami' nlaqchiguilo
da cotaxac qataq da na'alaxac,
qami' huaqta'a't nỹecpi maye qarqopitaxache da na'ashaxac.
Qaq nagui nam qami' ileuaiguilo qalaq saishet da ilem ca ỹeelonec,
qataq saishet da ileuaigui ca alaataxac.
3Na 'arataxala'pi qalaq 'enauac da datauec,
dataueeguesop na checnec qalaxaye noxonecpi.
Nam 'analleppi maye 'añaxaicpi qalaq qaỹoqtegue da datauec,
qalaxaye nache 'ena'am qaicoñerai'.
4Qaq ỹoqo'oye aỹem shenapec: Ñaq aỹem qauỹocheelec qome,
cha'aye sauotaique da ñeỹen souaxat da lta'araic ñiqui'ic,
qaq saishet qome da aỹem qaua'añaqchichi,
cha'aye ỹataqta qailaxachigui na ỹalamaxat ihuo' le'ecpi.
5Cha'aye Ñim Nataxala' maye Qaica ca Ỹaqalanapec
mashe lapaxañi da nvi' qome ca na'a'q maye huaigui ca lta'araic ncolanaxa,
qataq huaigui da huo'o ca qanlaxaañi qataq qaica ca toonaxac
huaña ye ca'amegue maye huaña so nauanaqchec.
Qaq mashe qanlaxatteguiñi na npaqtaxanaxatpi
qataq da na'alaxac ivira'a ana qasoxonaxapi.
6Qaq na Elam le'ecpi mashe ỹacona ana lchecnapi,
qataq mashe netangui ana nnaigonapi, qataq netalec na lalo caipi,
qaq na lma' ye Quir qalaq ỹacona ana lpaqtaxanaqtepi.
7Qaq nam ỹataqta 'onaxaicpi ca'ameguepi ye Jerusalén,
qalaq nlaqaalec ana naigonapi, qaq nam netalec na caipi
qalaq nauaatac ñi lasom ye huaqta'a't nỹecpi.
8Nache ye Judá qaica ca npaxaalec.
Qaq se'eso na'a'q, qami' qauamachiỹa'a co'ollaxa so nỹec maye laỹe' na no'ogoxonaxatpi, nỹec maye le'enaxat Aviaq, 9qataq qauloỹa'a co'ollaxa na qalota lpoxoỹaxapi so huaqta'a't nỹecpi maye lalamaxat so David, qataq qaucoyingui so 'etaxat añi qapio'ole 'etaxat laỹe', 10qataq qaumichiñi co'ollaxa so nỹecpi ye Jerusalén, nache huo'o so qanlaxachiiñi da yaqto' qauo'onataxañiỹa da qauaỹamaxachiiñi so mpaqtaxanaxat. 11Nache soua dos npaqtaxanaqa'ate ñichiguinguilo qanqa'en aso 'oonole 'etaxat laỹe' da yaqto' tategueua'a so 'etaxat maye chegoqtapegueuga aso togoshe laỹe' na 'etaxat. Qalaxaye saishet da qauamachiỹo'ot ñim ỹo'ot co'ollaxa 'enauac de'era, ñim nache 'eetai' soua qaỹoqteguelo vi'iye da lapaxañi damaye.
12Qaq se'eso na'a'q, Ñim Nataxala' maye Qaica ca Ỹaqalanapec
qami' 'enapegalo co'ollaxa da qanỹiñi qataq qanachoxoreñi
qanamarequi' naua qarqaigolli' qataq qaỹa'añiiyiñi naua qo'ogolli'
maye sa nsattegueta maye la'anaxat da qanqui'iqui.
13Qalaxaye qami' qauo'ocheetac da na'ashaxac,
nache qauamaitapiguiñi
qaualauache aso huacapi qataq aso qaguetapi,
nache qolliquiitac so lapat qataq qanỹomiitapigui so lataxa.
Nache qoñiỹapec: «Sequia'aq qataq ñiỹomaq
cha'aye qonte' nache seleuaq.»
14Qaq Ñim Nataxala' maye Qaica ca Ỹaqalanapec,
aỹem ỹa'axaỹaqchetec de'era, 'eeta':
«Aỹem saishet da sapalaxat de'era nasouaxashet,
choche ivitta'a qom qaullivi.»
Qaq 'era da la'aqtac Ñim Nataxala' maye Qaica ca Ỹaqalanapec.
So Sebna nmeneguet qanqa'en so Eliaquín
15Ñim Nataxala' maye Qaica ca Ỹaqalanapec aỹem 'enapega, 'eeta': «'Asoma, 'anqo'ona ñi Sebna maye ilotague' ñi nma' lta'araic, nache qonapega qoneta':
16Qaq ¿negue't cam 'auo'ottac da qoueta'a ne'ena?
¿Negue't ca 'am ỹamaxalec da 'anaña ne'ena añi 'anhuachiqui?
¿Ta'ainco' da 'analec na pa'asheguem añi 'araỹe'
qataq da 'anshe' ana coma' da 'auo'ot ca 'anmataqa'?
17Ñim Nataxala' 'am ỹasaxauga qome ca ỹataqta qaỹoqta,
'eeta'am ca ỹale maye ỹataqta 'añaxaic.
Nache 'am ỹaconeua'a qome, 'am irolec da la'añaxac,
18nache 'am ỹasotec, qoneta'am aca peloota,
nache 'am ỹasaxalec ca 'alhua maye ỹataqta qalochiguiñi.
Qaq nache huaña qome da 'aleu,
qataq vi'iiguet ana 'annaigonapi maye 'ayo'oxoraqtepi,
nache 'auo'ot qome da la'agaxa na hueta'a ñi lma' lta'araic ñi 'arataxala'.
19Aỹem 'am ñeqateeguesop qome ye 'aro'onataxanaqa'
qataq qoca'ai ñaqa'en da 'aro'onataxanaxac.
20Que'eca na'a'q, seỹaxana qome ñi ỹamaxashec Eliaquín,
ñim llalec so Hilcías,
21nache nam 'ogo sanaxanaxanguilo qome ñimaye,
qataq na 'ansaataxaqui nsaachigui ñaqa'en ñimaye,
qataq sanem ñimaye da 'ara'amaqchec.
Nache ñimaye 'eeta'am da lta'a na netaña na Jerusalén,
qataq nam nhuo' le'ecpi ye Judá.
22Nache sanem qome aca lvinaqte ñi nỹec maye lalamaxat so David;
nache qaica ca ishet da ỹapogui cam ỹauatogui ñimaye,
qataq qaica ca ishet da ỹauatogui cam ỹapogui ñimaye.
23Qaq ñimaye 'eeta'am qome aca so'onaxaqui
maye huo'o da la'amaqchec qom netangui na llalaqpi so lta'a.
Qataq so'ot da saishet da deraỹai' ca hueta'a,
'eeta'am aca clavo da qaitoqneuo.
24Nache qoỹemaxaua'a qome 'enauac nam no'on nogoxoshetpi
maye lalamaxatpi som llalaqpi so lta'a qataq 'enauac nam chegoxoguetpi somaye,
qataq 'enauac ana ỹotta'a't ỹomaxaquipi,
anam qapio'olepi qataq anam late'eraipi.
25Qalaxaye que'eca na'a'q, ñeuec qome aca'aca clavo
maye ỹataqta qaramchiguiñi ca netaña
cha'aye qanqat qome acamaye nache naañi,
nache 'enauac cam ỹemaqtaua'api acamaye dolagui qome.»
Qaq 'era da la'aqtac Ñim Nataxala'.
