1¡Choxoraicolec ye Ariel, ye Ariel,
yem huaqta'a't nỹecpi maye nmataqa' co'ollaxa so David!
Inoxootrec qome caua qalote' vi'iye
da ỹo'ottac na na'ashaxacpi,
2qalaxaye ye Ariel saishet qome da sauo'o ca ldaqa',
nache huo'o qome ca noinaxac qataq ca naquicoxo,
nache yemaye 'eeta'am qome ñaqa'en aca laỹe' aca poqo
maye huetalec aca nca'atoxonaxalate.
3Cha'aye aỹem samaq qome ca ñalleppi da yaqto' 'am coleesop,
qataq sauo'o ca sansattec npaqtaxanaxat da 'am qanpaxatteua'a,
qataq ñauaxaỹaxaasheguem
aca nalloxolate da yaqto' 'am qailoquiaxan.
4Huaña qome nache 'am qaỹamaxañi nache qouetaiya',
da 'arvilỹaxac qom 'autaqa qalaq 'eeta'am ca nqui'i,
naua 'ara'aqtaqa qalaq huac da qaica ca l-lamqa'.
5Qalaxaye cam qalota 'ampa'aguenaxauapi
qom qailaxachigui nache 'eeta'am na namoxoỹaxa,
qataq cam qalota 'añaxaicpi 'eeta'am qome
ca 'auaqpi ltoxoic da huaỹoxon naqa'en na la'at.
Ñim Nataxala' nque'elaxatta qome qataq sanaỹaloxon,
6da 'am naỹa, nactaigui ca nalataxa,
qataq ca lacholaxanaxa na 'alhua, qataq ca lta'araic nllimiaxa,
qataq nactaigui ca la'at maye qaica ca iren,
qataq cam dalaataxanapec le'eraxa ca norec.
7Qaq 'enauac nam qalota shiỹaxauapi maye iloquiaxaatac ye Ariel,
qataq 'enauac nam deloctague' yemayepi
maye huotaique da ỹamaxañi na sansattec npaqtaxanaxatpi,
qataq 'enauac nam qaica ca ldaqa' naqa'en yemayepi,
'eeta'am qome ca nchoxonaxac huo'otaq ca nauanaqchec ye pe.
8Qataq 'eeta'am qome ca ỹaguec na lqouaxa da dechoxootac,
nache ipettega da 'eesa da deque'etac qalaxaye da nlouec
nache ñaq 'eetalec da qui'itchigui ana da'am,
huo'otaq 'eeta'am ca ỹaguec na laquip da dechoxootac,
nache ipettega da 'eesa da nỹomtac qalaxaye da nlouec
nache ñaq 'eetalec da ỹaguec na laquip
qataq deqaqtegue na lqosot.
Qaq 'era da 'eetec qome na qalota shiỹaxauapi
maye iloquiaxaatac na netaña añi qasoxonaxa Sión.
9¡Qaq nache qoquiito'ot qome da qaica ca qaraỹaanataxanaxaqui!
¡Qataq nache qoquiito'ot qome da sa qanauañiiñi qataq qaica ca qauloỹa'a!
¡Qataq nache qoquiito'ot qome da qavi'egochiitapigui' qoñiita'am ca taxaic,
na'aictaxa da saishet da qanỹomiigui ca lataxa maye itaqchet ca shiỹaxaua!
10Cha'aye Ñim Nataxala' qami' taleguete naqa'en ca sansatta no'ochaxa.
Qataq ỹapoguilo naua la'ai'te na na'aqtaxanaxanecpi,
qataq ỹauo'o ca lapoxot na lqaic nam huo'oi naua l-loxoco.
11Qaq 'enauac na l-loxocpi maye ỹachaxan,
'eeta'am ca nerec maye huetalec aca napotagui nere,
da qoỹanem cam ỹaỹaten da itaxaỹaxan acamaye
nache qoỹenapega qoỹeeta':
«'Autaxaỹaxan ana'ana», nache camaye, 'eeta':
«Sa seshet da setaxaỹaxan cha'aye anamaye napotagui.»
12Qaq da huo'otaq qoỹanem cam
saỹaỹaten da ltaxaỹaxanataxanaxac,
nache qoỹenapega qoỹeeta':
«'Autaxaỹaxan ana'ana»,
nache camaye 'eeta': «sasaỹaten da itaxaỹaxanataxanaxac.»
13Qaq Ñim Nataxala', 'eeta':
«Ne'ena nhuo' le'ecpi da Aỹem ỹo'oxoren
qalaq choche alap qataq choche la'aqtaqa,
qalaxaye da lquiyaqteỹaxac
qaỹoqta naqa'en Aỹem,
qataq da llo'oxonnataxanaxac
da Aỹem ỹo'oxoren,
damaye maiche lapaxaguenataxanaxac
qataq lamaxasoxonaxac na shiỹaxauapi.
14Qaq ỹoqo'oye, ne'ena nhuo' le'ecpi
qaltaq so'ot qome ca la'aalaxa,
sachegoxotchigui nam saqaỹauanapega
qataq huo'o da llo'oxoyec,
nache da laỹaanec nam ỹaanaxanaxaicpi,
qataq da laỹaanataxanaxac
nam ỹaanataxanaxaicpi imeuo qome.»
15¡Qaq choxoraxaso' nam nqañoxottaisop
Ñim Nataxala' da yaqto' ỹoxottañi nam huotaique da ỹo'otpi,
qataq huetaigui na napalaxa da ỹo'ot na
qauem nache, 'eeta':
«Qaica ca qomi' ỹauaachiguilo,
qataq qaica ca qomi' nomalo»!
16¡Qalaxaye de'era qaica ca naigui!
Cha'aye cam nshaxa saishet da 'eeta'am cam ỹo'ot camaye,
qataq ca no'onatac saishet da 'enapega cam
ỹo'ot camaye da, 'eeta':
«'Am saishet da aỹem 'auo'ot co'ollaxa»,
qataq ca nshaxa saishet da 'enapega cam ỹo'ottac
camaye da, 'eeta':
«'Am saishet da 'auaỹaten dam 'auo'ottac.»
Na Israel le'ecpi qaỹachaxanapeguem da nca'alaxa
17Qaq yem aviaq ye Líbano mashe saqaỹaloq da nlaguiñi
nache qoỹanaxaalec qome,
qaq nam no'on nanaxanqa'pi qalaq ỹe'eguelaxa da aviaq.
18Qaq que'eca na'a'q nache nam saq hua'aqapi
ishet qome da hua'axaỹa da qaitaxaỹaxan aca nere,
qaq na qanamaicpi qalaq ishet qome da nauaañi,
cha'aye huesoueeguesop qome ca ỹataqta lta'araic napalaxa.
19Qataq nam qaica ca la'amaqchec ỹe'eguelaxa qome
da huo'o da lamaicỹaxac souaxat Ñim Nataxala',
qataq nam ỹataqta choxoraqpi huo'o qome
da ntonaxac souaxat Ñim Qui'itta Natamnaxala' na Israel le'ecpi.
20Qataq imeuo qome na qaica ca ireetac,
qataq imeuo qome nam na'amqaanaxaicpi,
qataq imeuo qome nam nda'a't na qauem iuennatega da ỹo'ot,
21qataq nam nmaxalec naxa ca lỹa da 'eetega laataxanaxaic,
qataq nam ỹatenachet naxa cam nmit na nasouaxashet,
qataq nam datenataxan naxa da yaqto' ỹaneguet
da qauem cam qaica ca lasouaxashet.
22Qaq ỹoqo'oye Ñim Nataxala'
maye Natamnaxala' na Israel le'ecpi,
Ñim nca'alaxatec co'ollaxa so Abraham, 'eeta':
«Qaq nache chegoqchiguiña nagui
da na chegoxoguetpi so Jacob
saishet qome da huo'o ca la'aloxo,
qataq saishet qome da napagaqtec da lasheguiỹaxac,
23Cha'aye nam chegoxoguetpi
somaye qom ỹauaachigui
nam so'otecpi nam lauo' le'ecpi,
nache ỹauattoota qome dam qui'itta ỹataxac,
nache huo'o naq 'enec naqa'en aỹem,
maye Aỹem Qui'itta Natamnaxala' na Israel le'ecpi.
24Qaq nam isomtapigui' co'ollaxa qalaq
ỹaconeguet qome cam naỹaanataxanaxac,
qataq nam saishet da qaitaxaỹaua'a,
ỹasateguet qome da qaỹapaxaguen.»
