Qaỹataỹa'aguet nam pe'etega ye Egipto
1¡Qaq choxoraxaso' nam taỹa ye Egipto
da nmitaique ca ntaunaguec,
nam pe'etega na qalota caipi qataq
naquittega ana qalota naigonapi,
qataq nam qalota alleppi maye nalaataxala' na caipi,
qalaxaye sa ỹamato'ot Ñim Qui'itta
Natamnaxala' na Israel le'ecpi,
qataq saishet da nmitaique Ñim Nataxala'!
2Qalaxaye Ñimaye nataqa'en ỹaanaxanaxaic,
qaq ỹaỹaten da ỹan cam qauem,
qataq da huo'o ca 'enapec
qalaq saishet da ỹe'eguelaxa da naralaxat ca la'aqtac.
Ñimaye, dataỹa'aguet qome nam qauemaicpi,
qataq nam itauaatac nam 'etaxaloxoicpi.
3Nam Egipto le'ecpi namayepi chochaq shiỹaxauapi,
qaq saishet da atamnaxala'pi,
nam lalopi caipi qalaq ỹoqta 'eesa lapat,
qaq saishet da saq cha'api.
Qaq Ñim Nataxala' qom ỹaasheguem na
lhuaq da yaqto' iuaxan namayepi,
nache nam detaunaxaatacpi
qataq nam qaitauaatacpi huañi qome,
nache 'enauac qome da deqat namayepi.
4Ñim Nataxala' aỹem 'enapega, 'eeta':
«Qaq 'eeta'am ca llon da desoqtalec aca lalaata qagueta,
nache saishet da iquichoqchet
camaye cam qalota qagueta lo'opi,
na'aictaxa da 'enauac camayepi da
laỹona't nache ỹa'alaqtalec
da huotaique da iquichoqchet,
qalaxaye saishet da ñi'i,
qaq nache 'eetec qom anac Ñim Nataxala'
maye Qaica ca Ỹaqalanapec
da iueelec nam lalamaxat nhuo' le'ecpi
qom huaña añi qasoxonaxa Sión.
5Qataq 'eeta'am ca maỹo da npaxattalec ca lpata'c
nache huaỹoteguelec camaye,
qaq nache 'eetec Ñim Nataxala'
maye Qaica ca Ỹaqalanapec
qom anac da npaxaalec ye Jerusalén,
npaxaalec, iueelec, ntela'a qataq nca'alaxatec.»
6Qaq qami' maye qami' llalaqpi so Israel
qavi'eguelaqaỹot qome Ñim ỹataqta
qaualemataỹai co'ollaxa.
7Cha'aye que'eca na'a'q qom 'enauac da qoñiita qaualache
na qanatamnaxala'aipi maye chegaqaigui
na lcat plata qataq na lcat oro,
maye maiche lo'onatacpi naua qarhuaxayilli'.
8Nache ye Asiria noxonec qome qairolec ca ỹeelonec,
qalaxaye saishet da nacheca ca
yo'oqchigui la'añaxac ca shiỹaxaua.
Nam shiỹaxauapi qalaq dataueeguesop qome ca alaataxac,
qalaxaye noxonec qome na nalleppi
nsoxoppiolec nache qaỹauo'o nlatacpi,
9qaq souaxat da ncolanaxa nache ca
nta'a chegaqañi qome da datauec,
qataq nam ltauapi ỹalat qome ana
ỹaviguisheguem la'anaxanaqtepi.
Qaq 'era da la'aqtac Ñim Nataxala' da hueta'a
naqa'en ye Jerusalén ca norec,
da yaqto' huaña da iuaxan na npa'aguenaxauapi.
