Isaías 32

₁Huo'o qome ca nta'a maye ỹataqta no'on da lo'onataxanaxac,

qataq ca ltauapi nta'alpi maye nalochiguiñi

qome da lo'onataxanaxac.

₂Ñim 'oonolec camayepi qalaq 'eeta'am

qome ca ñe'eguenaxaqui da huo'o ca la'at,

qataq npaqtaxanaxat da huo'o ca la'at lta'araic,

qataq 'eeta'am na la'auaxacpi da

icorelec na 'etaxat ca deqaqta 'alhua,

qataq 'eeta'am na lpaqal aca late'erai coma'

maye naña ca toolec 'alhua.

₃Qaq camayepi ỹataqta nlotec qome,

qataq ỹataqta lhuotta da na'axaỹaxana ca ntaxaỹaxac.

₄Qataq saishet da iỹalatapigui'

nacherata da ntelañi da huo'o ca ỹo'ot,

qataq da huo'o ca ỹa'axategue lataxac

qalaq ỹataqtegue naqa'en.

₅Qaq nam shiỹaxauapi saishet qome da ỹamata'ac

no'on da lataxac nam qauemaicpi,

qataq saishet da huo'o naq 'enec naqa'en

nam tenataxanaxaicpi.

₆Cha'aye cam qauemaic da detaqa qalaq

ipacchigui da qauema naua la'aqtaqa,

qataq nache iuennatega da ỹo'ot na qauempi,

qataq nmitta'a da ỹo'ot da lalaataxanaxac,

qataq datenataxan da dataỹa'aguet Ñim Nataxala',

qataq saishet da iquia'axan cam huo'o na lqouaxa,

qataq saishet da nỹomaxan cam huo'o na laquip.

₇Qaq cam tenataxanaxaic

qalaq lo'ogoxonaxat na qauempi,

qataq ỹo'ot nam qauem latenataxanaxacpi,

nache da latenataxanaxac na'aqchet nam choxoraqpi,

qataq nam huo'o da lhuenaxanaxa

da qaỹo'otec ca nalochiguiñi lataxac.

₈Qaq cam no'on da lataxac qalaq ipacchigui

da iuennatega da ỹo'ot ca no'on,

qaq cam lapaxañi lataxac qalaq nache 'eetai' da quetalec.

₉Qaq qami' 'alpi maye qaica ca qarhuogoqoi,

ña qana'axaỹaxañiỹa da qami' sa'aqtaxanema.

Qami' 'alpi maye qaica ca qandaqaitaique,

ña qaua'aqaỹalo naua ỹa'aqtaqa.

₁₀Qami' 'alpi nagui qaica ca qandaqaitaque,

qalaxaye qom mashe ỹapacauec ca 'oonolec vi'i,

nache qami' cholaxa'n qome souaxat da qarcolanqai,

cha'aye ime qome da nqataxanaxac,

nache saishet da qaltaq qanqat ana uva.

₁₁Qami' 'alpi maye qaica ca

qarhuogoqoi, ña qaviloxolli qome,

qami' maye qaica ca qandaqaitaique,

ña qami' cholaxa'n qome,

qanqache' qome naua qarpotolli' nache qaỹa'añiiyiñi

caua qarpotolli' maye sansattegueta

maye la'anaxat da qanqui'iqui.

₁₂Ña qauachaxañi qome da qanqui'iqui

souaxat nam huo'o da lyac no'onaxapi,

qataq anam ỹataqta no'on nañiguishe uvapi.

₁₃Cha'aye ne'ena na'alhua nam ihuo' le'ecpi

ñaxaalec qome ana ỹaxat qataq na huouesat,

qataq 'enauac na nma'pi maye hueta'a naxa da namaicỹaxac,

yem huaqta'a't nỹecpi maye lqopitaxat da na'ashaxac.

₁₄Qataq ñi lma' lta'araic ca nta'a qanayeca'ai qome,

qataq yem huaqta'a't nỹecpi maye qalota

na hueta'a toolec qome,

qataq na sansattec npaqtaxanaxatpi

nataqa'en qanayeca'ai qome,

nache nmataqa' qome yemaye nam huauec 'ashenapi,

qataq lquia'aqa' qome yemaye na nlopi shiguiỹacpi.

₁₅Qalaxaye dam saqcha'a la'añaxac Ñim Nataxala'

qaltaq qomi' ñe'eguelaxalo qome

nache na toolec 'alhua

ỹe'eguelaxa qome da ishet da qoỹanaxaalec,

qataq nam no'on 'alhua ñaxaalec qome ana qalota qo'oipaqpi.

₁₆Nache da nalochiguiñi lataxac

hueta'a qome na toolec 'alhua,

qataq da no'on lataxac hueta'a qome nam no'on 'alhua.

₁₇Nache dam nalochiguiñi lataxac

chegoqchigui qome da nlagaxayec,

ñe'emaxa qataq chochaq tatec da qaica ca qandaqtaique.

₁₈Nache nam ihuo' le'ecpi hueta'a qome

cam hueta'a da nlagaxayec,

qataq netaiguilo naua na'atchiyiñi nỹaqa,

qataq nam nma'pi maye ỹe'emaqtac,

₁₉na'aictaxa da qanchiguiñi na aviaq qataq qaica

ca 'enec qanqa'en na huaqta'a't nỹecpi.

₂₀Qalaxaye qami' qauamaichiguiñi qome,

cha'aye na qa'anaxanaqa'aipi

qaicottalec qome na qalota 'etaxat,

qataq saqoue qome na 'auaqpi maye

aloq nam qareloi 'ashenapi

qataq nam qarauegaxanala'ai huacapi.