1Qaq co'ollaq mashe ivi' soua catorce vi'iye, da lo'onataxanaxac so Ezequías maye nta'a ye Judá, nache so Senaquerib maye nta'a ye Asiria, iloquiaxan 'enauac so huaqta'a't nỹecpi maye ỹotta'a't naua nañalo ye 'alhua Judá, maye huo'o so sansattec lpaqtaxatpi nache loxonec. 2Qaq so nta'a ye Asiria chegoqchiguiña naqa'en ye Laquis, da ỹamaq so 'amaqtaqaic lataxala' na alleppi, nnaictague' naqa'en so 'añaxaicpi nalleppi, da yaqto' taỹa so nta'a Ezequías maye netaña ye Jerusalén, qaq somayepi hua'a co'ollaxa da lanataqa' so loigue so llec na 'etaxat maye chegaqasheguema aso laỹe' na 'etaxat, som nqa'aic maye taỹauga so no'onaxa som nỹoxonaq. 3Qaq huaña nache ca'ata'aguet somayepi, so Eliaquín, som llalec so Hilcías, maye ilotague' so nỹec lta'araic maye lma' so nta'a, qataq soua neraxanaxanaqa, Sebna qataq so Joah maye llalec so Asaf. 4Nache som 'amaqtaqaic lataxala' na alleppi Asiria le'ecpi, 'enapegalo soomaye, 'eeta': Qaua'aqtaxañim ca Ezequías, de'era la'aqtac ñim 'amaqtaqaic nta'a, ñim nta'a ye Asiria maye, 'eeta': «¿Chaq negue't cam ỹo'ot da saishet da 'añi'itac? 5¿'Aupettega peta'a da naua 'onaxaiqa na'aqtaqa, da 'eeta'ama da nauattonaxanaxac da huo'o ca qalapaxañi lataxac, qataq da na'añaxac da qaỹo'ot ca alaataxac? ¿Chaq negue't cam 'ape'etega da yaqto' 'auataỹa'aguet aỹem? 6¡Aỹem sela'a da 'ape'etega ye Egipto da 'am itauan! Qalaxaye ye Egipto 'eeta'am aca coqta poxoỹaxai da huo'o ca ỹashel-lec, nache icolaxat qataq ỹapacaviigui na lhuaq. Qaq 'era da lataxac ñim Faraón, maye nta'a ye Egipto, da ique'emaqchet 'enauac nam pe'etega ñimaye. 7Qaq da 'eeta': Qomi' sepia'aqtega Ñim Nataxala' maye Qanatanmaxala', qaq ¿peta'a saq nacheño' ñim Ezequías, ñim nlaxaañi co'ollaxa so 'anatamnaqa'pi qataq aso nca'atoxonaxalatepi, qataq 'enapega co'ollaxa na shiỹaxauapi ye Judá qataq ye Jerusalén, da 'oonole naqa'en aca nca'atoxonaxalate da huaña naqa'en da yo'oxonnataxan. 8Qaq 'am Ezequías, no'on da 'anaỹamaxate' ñim ña'aco' maye nta'a ye Asiria. Nache aỹem 'am sanem ca dos mil caipi, da 'auanata cam ishet da nelec camayepi. 9Qaq ¿cam 'eeteco' da 'aushet da 'auataỹa'aguet cam 'oonolec lataxala' na alleppi maye qaica ca la'amaqchec maye lamaxashec ñim ỹataxala', da 'am 'ape'etega ye Egipto da 'auachegoxoto'ot aca naigonapi maye alaataxaquipi, qataq cam ỹalleppi maye ishet da nelec na caipi? 10Qataq, ¿'aupettega peta'a da aỹem ñanac da seloquiaxan qataq selaxachigui ne'ena 'alhua, da saishet da aỹem hueta'aguet Ñim Nataxala'? ¡Ye nacheñi Ñim aỹem ỹamaxalec da seloquiaxan qataq selaxachigui namaye!» 11Nache so Eliaquín, Sebna qataq so Joah, ỹasatreguet so 'amaqtaqaic lataxala' na alleppi Asiria le'ecpi, 'eetra': –Ña qomi' 'anqouagueque da 'auota'aisalo naua na'aqtaqa arameo da qomi' 'autaxaỹoto, cha'aye qomi' saỹatena'q naamaye. Qaq saishet da 'auota'aisalo naua hebreo la'aqtaqa, cha'aye 'enauac nam shiỹaxauapi maye netalec na npaqtaxanaxat na'axaỹaxaatac. 12Qalaxaye som lataxala' na alleppi Asiria le'ecpi, 'eeta': Ñim nta'a ye Asiria, saishet da aỹem namaxa ñi qana'aco'oi qataq qami' da sa'axat de'era. Maye, nachena ne'ena shiỹaxauapi maye netalec na npaqtaxanaxat da saxatem de'era, cha'aye namayepi nache qoñeeta'am, da chec qome na maiche la'atec, qataq nỹomgui na maiche lchaxat. 13Huaña nache so lataxala' na 'allippi nachaañi, nache ỹataqta nlamaxaren da detaxaiguilo naua la'aqtaqa na hebreo, 'eeta': Ña qana'axaỹaxañiỹa da la'aqtac ñim 'amaqtaqaic nta'a, ñim nta'a ye Asiria, 'eeta': 14«Saishet qome da qanañañi da qami' ỹatenache't ñi Ezequías, cha'aye ñimaye saishet qome da qami' nca'alaxatre'c.» 15Qaq ñi Ezequías da huotaique da qami' ỹaye'n da qaupi'iỹa'ai Ñim Nataxala' nache, 'eeta': «Ñim Nataxala', 'eesa qome da qomi' nca'alaxatre'c, Ñimaye saishet qome da ỹa'aqta'a ñi nta'a ye Asiria, da loxonec ne'ena huaqta'a't nỹecpi». 16¡Qaq saishet qome da qaualaqaiguet ñimaye! Cha'aye ñim nta'a ye Asiria, aỹem namaq da qami' shenapegalo da qanmañi' ñimaye, qataq qanañañi, yaqto' ñi 'oonolec da qoñiita ishet qome da chectac ana ala aca maiche lañiguishe uva qataq hiigo, qataq nỹomtapigui na 'etaxat maye chegaqangui aca maiche lshere. 17Qaq da ime nache qami' ỹauegalo ca lỹa 'alhua maye 'eeta'am nam qana'alhuai, cam 'alhua maye huo'o na trigo qataq ana uva, da yaqto' qauo'oche aca nauole 'ayiiña qataq ca lataxa. 18Qaq ñi Ezequías da qami' 'enapegalo da Ñim Nataxala' qami' nca'alaxatrec qome, nache saishet qome da qanañañi da qami' ỹatenache't ñimaye. Cha'aye ¿huo'o peta'a ca natamnaxala'pi na laỹepi ỹotta'a't shiỹaxauapi da nca'alaxatec co'ollaxa cam hueta'a ca maiche na'alhua, da nca'alaxateeguesop da la'añaxac ñi nta'a ye Asiria? 19¿Cam hueta'ague ca natamnaxala'pi na Amat le'ecpi qataq na Arpad le'ecpi? ¿Cam hueta'ague ca natamnaxala'pi na Sefarvayin le'ecpi? Namayepi, ¿peta'a ishet da nca'alaxatec co'ollaxa ye Samaria, da nca'alaxateeguesop da la'añaxac ye Asiria? 20Qataq 'enauac ne'ena natamnaxala'pi nam laỹepi shiỹaxauapi ¿negue't cam nca'alaxatec co'ollaxa can hueta'a ca maiche na'alhua, da nca'alaxateeguesop da la'añaxac ñi nta'a ye Asiria? ¿Ta'ainco' ye qaupicheetega da Ñim Nataxala' ishet da nca'alaxatec ye Jerusalén? 21Qalaxaye soomaye ñe'emaxat, saishet da choche 'oonolec ca la'aqta'c, cha'aye so nta'a 'enapegalo co'ollaxa da saishet da ỹauo'o ca lasataxa'c. 22Qaq huaña nache so Eliaquín maye ilotague' so lma' lta'araic so nta'a, qataq so Sebna qataq so Joah maye neraxanaxanaqa, ỹataqta daquicote' nache ncolaxata'aisalo soua alogo, qaq ime co'ollaxa nache je'c da nqo'oneua'alo so nta'a Ezequías, da yaqto' da'aqtaxaarem somaye, dam la'aqtac som 'amaqtaqaic lataxala' so alleppi ye Asiria.
