Ñim Nataxala' nca'alaxatec ye Judá
1Qaq so nta'a Ezequías, co'ollaq hua'axaỹa de'era, nache ncolaxata'aisalo soua alogo, qataq ỹaayiñi soua alogo sansattegueta, ime nache taua'a aso atamnaxaqui maye lalamaqte Ñim Nataxala'. 2Ime nache ỹama'q soua Eliaquín som ilotague' so lma' lta'araic so nta'a, qataq so neraxanaxanec Sebna, qataq so ntaxaỹaxanaxanecpi maye ỹoqta ỹa'axaiquipi, qaq ỹaatrañi naua alogo maye sansattegueta da taỹa so na'aqtaxanaxanec Isaías, som llalec so Amós. 3Nache somayepi, da'aqtaxanem somaye, 'eeta': Ñi Ezequías, 'eeta' da la'aqtac: «Nagui qomi' souaqtaigui da qaraquicoxo, qanhuaxanaguec, qataq qaica qanqa'en ca shenaxac, shenaqta'am aca 'alo maye deco'otapigui', da mashe qaica ca la'añaxac. 4Qaq 'onaxaictoxo' da Ñim nataxala' maye 'anatamnaxala', da hua'aqchiguilo naua la'aqtaqa som lataxala' na alleppi maye lamaxashec ñim nta'a ye Asiria, cha'aye anac da isheueetac Ñim Lo'onatac 'Enauacna maye nca'altauec, qataq 'onaxaictoxo' da ỹauo'o ca nhuaxanaguec souaxat nam qauem la'aqtacpi, maye yo'oqta da hua'aqchigui Ñim 'Anatamnaxala'. Ñaq 'auo'ot taxa ca 'anatanmaxac da 'auỹaxaalec nam no'onañi nhuo' le'ecpi maye ña nca'altauecpi.» 5Qaq soua lamaxa'she so nta'a Ezequías co'ollaq je'c da nqo'onalo so Isaías, 6nache so Isaías 'enapegalo soomaye, 'eeta': «Qaua'aqtaxañim qome ca qana'aco'oi, da Ñim Nataxala', 'eeta' da la'aqtac: ‹Saishet qome da 'añe'etegalo naua qauema la'aqtaqa maye nasaxare'c da aỹem dataira'aguet soua lamaxa'she ca nta'a ye Asiria. 7Cha'aye Aỹem sanaigui qome ñimaye cam saqcha'a, qaq qom choche huo'o ca la'axaỹaxac leguemaxaic, nache ỹe'eguelaxa qome ye na'alhua, qaq huaña qome yemaye nache so'otec da qaỹalauat qairolec ca ỹeelonec.›» 8Qaq som lataxala' na alleppi maye Asiria le'ec, co'ollaq la'axaỹaxac da so nta'a ye Asiria ca'ai ye Laquis. Nache jec ca'ai ye Jerusalén, nache natenalec co'ollaxa so nta'a ye Asiria da iloquiaxaatac ye Libna. 9Qaq huaña yemaye nache so nta'a ye Asiria, la'axaỹaxac da so nta'a Tiracá maye lma' ye Etiopía da inoxonec nnaictague' so nalleppi da iloquiaxan somaye. Qaq huaña nache so nta'a ye Asiria qaltaq ỹauo'o so lamaxashecpi da ỹamaxa so nta'a Ezequías maye ilotague' ye Judá, da yaqto' 'enapega, 'eeta': 10«Saishet qome da 'anañaneguet da 'am ỹatenachet Ñim 'Anatamnaxala', da 'eetega saishet da ỹoxonec qome ye Jerusalén. 11Cha'aye mashe 'auaỹaten, nam ỹo'otpi co'ollaxa na nta'alpi ye Asiria, nam ỹo'otec 'enauac na 'alhuapi maye nlaxaañi co'ollaxa. Qaq 'am ¿peta'a ishet da 'anca'alec qome? 12Som hua'au ita'alpi co'ollaq ilaxachigui som laỹepi shiỹaxauapi, 'eeta'am ye Gozán, Jarán, Resef, qataq so shiỹaxauapi yem 'alhua Bet Edén maye netaña co'ollaxa ye Telasar. ¿Qaq peta'a nca'alaxatec co'ollaxa somayepi, nam atamnaxala'pi? 13¿Ca hueta'ague ca nta'alpi ye Hamat, ye Arpad, ye Sefarvayin, ye Ená qataq ye Ivá?» 14Nache so Ezequías ỹaconeguet co'ollaxa aso nere maye lla'aco so namaxashecpi nache itaxaỹaxan, qaq co'ollaq ime, nache taua'a aso atamnaxaqui maye lalamaqte Ñim Nataxala', nache ỹanot Ñim Nataxala' asa'aso nere, 15nache natamen, 'eeta': 16«'Am Nataxala' maye Qaica ca 'Auqalanapec, maye 'Am Natamnaxala' na Israel le'ecpi, qataq añi 'anso'onaxaqui netanguilo ñeua ne'enaqtaqa le'enaxat querubines. Qataq nachaq 'amta da 'am natamnaxala', 'enauac nam nta'alpi ana 'alhua. 'Am maye 'auo'ot co'ollaxa na piguem qataq ana 'alhua. 17Ñaq 'ana'axaỹaxaachiguiñi 'Am Nataxala', qataq ñaq aỹem 'ana'axaỹaxana. Ñaq aỹem 'aulochigui 'Am Nataxala'. Ñaq 'ana'axaỹaxanalo naua aỹem namaxalo la'aqtaqa ca Senaquirib, ne'enaua na'aqtaqa ỹataqta 'am isheueetac, 'Am Atamnaxala' maye 'anca'altauec. 18Qaq 'eesa meque' 'Am Nataxala', da so nta'alpi ye Asiria ilaxachigui co'ollaxa 'enauac so ỹotta'a't shiỹaxauapi qataq na na'alhuapi somayepi, 19qataq ỹasaxangui co'ollaxa so norec so natamnaxala'pi, cha'aye saishet da 'eesa da atamnaxala'pi, somayepi chochaq 'epaq qataq coma', maye lo'onatac cam shiỹaxaua. Qaq ỹoqo'oye ishet co'ollaxa da ilaxachigui. 20Qaq nagui 'Am Nataxala' maye 'am Qanatamnaxala', qomi' 'anca'alaxateeguesopa qome da la'añaxac namayepi, yaqto' 'enauac na ỹotta'a't shiỹaxauapi ana 'alhua, ỹaỹaten da nachaq 'amta 'Am nataxala' qataq 'Am Atamnaxala'.»
21Huaña nache so Isaías ỹamaxa so la'aqtac so Ezequías, 'eeta': «'Era da la'aqtac Ñim Nataxala', maye Natamnaxala' na Israel le'ecpi: ‹Aỹem sa'aqtega dam 'anatamnaxac da aỹem 'anachoxoreetacot souaxat so Senaquirib, maye nta'a ye Asiria.›» 22Qaq 'enaua naua la'aqtaqa Ñim Nataxala', da ỹa'axata'a da 'eetec qome ñim nta'a ye Asiria:
«Na huaqta'a't nỹecpi na Sión,
'eeta'am qome aca qa'añole da 'am ỹe'eetac 'am Senaquirib.
Qataq na Jerusalén iconnaxaatac qome na lqaic, qom qoca'ai namaye.
23¿Negue't cam 'aunotega qataq 'ausheueetac?
¿Negue't cam 'auqaqaatalec qataq 'auachaxana
dam ño'oxonnaxaic 'armeenaxanaxac?
¡Qomye nacheñi ñim Qui'itta Natamnaxala' na Israel le'ecpi!
24Cha'aye 'auachegoxotchigui co'ollaxa so 'aramaxashec
da 'ausheueetac Ñim Nataxala', qoneta':
‹Sauota'a ana ỹataqta qalota ñenaigonapi ñalaataxaquipi,
da senotsheguemec na ỹataqta pa'asheguem ana qasoxonaxapi,
qataq naua loiguiye ye Líbano, nache sechec ana ỹataqta logorai cedropi,
qataq ana ỹataqta no'on piinopi.
Qataq sevirasheguema yem ỹataqta qaỹoqotcheguema,
yem aviaq maye 'eeta'am ca nanaxanaqa'.
25Qataq so'ot ana isherepi naña nam ỹaqa'a 'alhuapi,
nache ñiỹomtapigui na le'ec 'etaxat anamayepi,
qataq sauota'ai naua lavi'illi naua ỹapia'ate
da deqaqa ñaqa'en 'enauac nam talapi ye Egipto.›»
26¿Qaq sa 'auaỹateno' da nache Aỹem, Nataxala',
da so'ot co'ollaxa 'enauac de'era?
Qaq nache chegoqchiguiña soua qaỹoqteguelo vi'iye
da llapaxañi co'ollaxa damaye,
qaq nagui nache sacoolec da so'ot,
qaq ỹoqo'oye 'am ishet da 'aulaxachigui so huaqta'a't
nỹecpi maye sansattec so lpaqtaxat,
qataq ỹataqta nlachiguiñi 'anqa'en.
27Som netaiguipi co'ollaxa somayepi qaica ca la'añaxac,
nda'a't da nlaxagui da lli'iỹaxa qataq da la'aloxo,
nache 'eeta'am aca huoue maye ñaxattalec na no'onaxa,
qataq 'eeta'am ca 'auaqpi darala, qataq 'eeta'am aca huoue
maye ñaxaalec na l-laq ca nỹec da ỹavigaxat
na la'at maye chegoxogue da nala' lliguisheguem.
28Aỹem saỹaten 'enauac nam 'ardaxacpi
qataq 'enauac nam 'auo'otpi,
qataq saỹaten da ỹataqta Aỹem 'aualemataỹa.
29Qaq cha'aye Aỹem saỹaten da 'annogoxonaxac,
qataq da 'año'oxonnaxac,
nache Aỹem sanagui qome na 'armic aca colliichigui lcat,
qataq sanagui na 'ap caua 'arqueenaxanaqa'ate,
nache 'avi'eguelaqtegue ñaqa'en som nqa'aic
maye 'auanacteuo'ogue co'ollaxa.
30Qaq huaña nache so Isaías qaltaq 'enapega so Ezequías, 'eeta':
«'Era da la'anaxat qome cam ñaq taỹa'a da yo'oq:
Ne'ena vi'i qataq ca lỹa vi'i qollequiitac qome
nam trigo maye maiche ñaxatsheguem,
qalaxaye ca lỹa vi'i nache ishet qome da qa'anaxañi qataq qauqataxañi,
qataq qaỹa'añiiñi ana uva nache qollequiitac qome ana ala.
31Qaq nam no'onañipi na Judá qalaq 'eeta'am qome aca nañiguishe,
da ỹa'alyiñi naua lpa'aye qataq ñaxatec ana ala,
32Cha'aye namayepi huo'o qome ca no'onaña na Jerusalén,
qataq añim qasoxonaxa Sión huo'o qome ca hueta'a lca'alaxaicpi.
Qaq damaye chegoqchigui qome dam 'ettaigui lauotaxanaqtaic
Ñim Nataxala' maye Qaica ca Ỹaqalanapec.
33Qaq Ñim Nataxala' ỹa'axat da 'eetec qome ñi nta'a ye Asiria, 'eeta':
‹Saishet qome da inoxoneua'a na Jerusalén
qataq saishet da chochaq 'oonole lchecna aca ỹaỹenec,
qataq da ỹauota'a aca lpaqtaxanaqte da iloquiaxan namaye,
qataq saishet da no'oxoosheguem ca llec da inoxotaua'a namaye.
34Qaq som nqa'aic maye nacteuo'ogue co'ollaq nvi'
nache ỹe'eguelaqtegue qome,
nache saishet da inoxoneua'a qome ne'ena huaqta'a't nỹecpi.
Qaq 'era da la'aqtac Ñim Nataxala'.
35Qataq Aỹem ñepaxaalec qome ne'ena
huaqta'a't nỹecpi qataq ñeca'alaxatec,
souaxat da maiche ỹauotaxanaqtaic da sheeta,
qataq da ỹauotaxanaqtaic so ỹamaxashec David.›»
36Nache so lamaxashec Ñim Nataxala' jec, nache ỹalauat so ciento ochenta y cinco mil alleppi, huaña naqa'en yem lanataqa' so Asiria le'ecpi, qaq so lỹa na'a'q co'ollaq nlouec so laỹepi nache ilalec som leuaxaicpi huetaiya'. 37Qaq huaña nache so Senaquirib maye nta'a ye Asiria, nqat so lpe'l, nache jec ỹe'eguelaxa ye Nínive qaq nache naña yemaye. 38Qaq huo'o so na'a'q co'ollaq hueta'a aso atamnaxaqui, da ỹo'oxoreetac so natamnaxala' Nisroc, nache soua llalqa Adramelec qataq so Sarezer, nqo'ooreua'a somaye nache ỹalaua't, qaq ime nache soomaye datare'c taỹalo ye 'alhua Ararat. Qaq huaña nache da lo'onataxanaxac somaye da nta'a, talec som llalec Esarhadón.
