Da natannaguec so Ezequías
1Qaq se'esoua na'axa'te, nache so Ezequías ỹataqta sa no'on, nache so na'aqtaxanaxanec Isaías, som llalec so Amós, nqo'ona somaye nache 'enapega, 'eeta': «Ñim Nataxala' 'eeta' da la'aqtac: ‹'Auauo'o qome ca pa'atec 'arqataxac da 'aỹa'anem nam 'aỹa'alaqpi, cha'aye 'am mashe 'aỹa'a da 'aleu, nache saishet da 'anca'altauec.›» 2Nache so Ezequías, nchemaxañi dataỹot so lque so lma', nache nachoxonnot Ñim Nataxala', 'eeta': 3«'Am Nataxala', 'am ñachoxonnot da 'auennata'a da 'eetec da ỹalaxayec, qataq da ỹataqta imauec da iquiyaqteỹaxac, co'ollaq 'am so'onataxaatacot, da so'ottac nam 'auaỹamaxareetapi.» Ime co'ollaxa nache ỹataqta nỹeetac, souaxat da ỹaguec da laquicoxo.
4Qaq huaña, nache Ñim Nataxala' 'enapega so Isaías, 'eeta': 5Qojec qome, nache 'aua'aqtaxanem ñi Ezequías qoneta': «Ñim Nataxala' maye Natamnaxala' co'ollaxa so hua'au 'arta'a David, 'eeta': ‹Aỹem sa'aqtega da 'anachoxonnaxac qataq sauaachiguilo naua 'arache'. Qaq Aỹem 'am sanema qome caua lỹa't quince vi'iye da 'anachaalataxac. 6Qaq 'am qataq na Jerusalén ñeca'alaxateeguesop qome da lhuaqỹaxac ñi nta'a ye Asiria. Aỹem ñepaxaalec qome ne'ena huaqta'a't nỹecpi. 7Qaq 'era da la'anaxat maye chegoqo'ot Ñim Nataxala' da ipacchigui qome dam 'am ỹanem la'aqtac 'eeta': 8Aỹem seqoshaxan qome caua lỹa't diez grado so lpaqal añi nala', maye mashe ivira aso laloqnaqte añi nala' maye lalamaqte so Ajaz.
Nache so lpaqal añi nala' ỹe'eguelaxa so diez grado.›»
9Qaq so nta'a Ezequías maye lma' ye Judá co'ollaq no'oita, nache ỹo'ot de'era lo'onec maye 'eeta':
10Da iuennataxac, 'eeta': Aỹem mashe sootagui da ỹataqta no'on da ñachaalataxac qalaq iuen da ashec;
aỹem qoỹenapega da saỹa ye lo'onataxanaqa' da nleuaxa da ñaqauo'o da ica'alaxa.
11Qataq sheeta': Saishet qome da ỹe'eguelaxa da ñauane' Ñim Nataxala' ana'ana 'alhua,
qataq saishet qome da ỹe'eguelaxa da selota'a nam huetalec ana 'alhua.
12Qataq mashe qanlaxaañi so ima' qataq qaiuotaxanec,
'eeta'am da 'eetec ca lpe'l ca qagueta lo'o.
Da ica'alaxa qalaq 'eeta'am ca hualoq laỹe maye lo'onatac ca ỹo'ottac na no'oxonec da ime nache qaicheguec.
Ye na'a'q qataq ye pe qalaq 'auauo'o da ñeque'eenaxac.
13Qataq imauec ye pe da sa'alaqtac souaxat da ñequi'ic,
'eeta'am da llon ca inoxootapiguilo naua ipi'ineqa.
Ye na'a'q qataq ye pe qalaq 'auauo'o da ñeque'eenaxac.
14Da ỹachetataic qalaq sheeta'am na payogotpi qataq sachottac sheeta'am na qoto'pi.
Da imeenaxanaxac qalaq mashe nasamñi da seloto'ot na piguem.
¡'Am Nataxala', mashe aỹem qaipataqta'a't, ñaq 'auanac da aỹem 'autauan!
15Qalaxaye cam sheeteco' ca ỹa'aqtac, ye nacheñi ñimaye da ỹo'ot damaye?
Som ỹo'ochaxa qalaq jec souaxat da laquicoxo da ñachaalataxac.
16Qaq nam npaxattalecpi Ñim Nataxala' nca'alec qome,
qaq salectoigui qome namayepi da ñeca'alec.
Qaq 'am, aỹem 'aỹa'anem da aỹem ñeca'alec
qataq aỹem 'avi'eguelaxatot da ñachaalataxac.
17Dam sootaigui co'ollaxa lta'araic ñequi'icỹaxac qalaq nmeneguet nagui da huo'o da ilagaxayec.
'Am aỹem 'anca'alaxateeguesop añi huachiqui maye nlaxaañi 'enauacna,
cha'aye 'auapalaxat 'enauac na ỹasouaxashetpi.
18Qaq nam huetangui añi huachiqui qalaq saishet da 'am ỹo'oxoren,
qataq nam leuaxaicpi saishet da 'am ỹanot da llo'oxonnataxanaxac,
nam tangui añi nshere qalaq saishet da nauane' dam sa nquic 'arataxac.
19Nachenata na nca'altauecpi maye ishet da 'am ỹo'oxoren,
'eeta'am da sheetec nagui aỹem.
Na nta'alpi qalaq ỹa'axatem na llalaqpi dam sa nquic 'arataxac.
20Ñim Nataxala' hueta'a ne'ena da aỹem nca'alaxatec.
Qaq ỹoqo'oye sevicnaxagui qome ana qana'arpapi
qataq so'onaxanaq 'enauaque naua na'axa'te da ñaq huo'o da qanachaalataxac
da souaqta'a añi atamnaxaqui maye lalamaqte Ñim Nataxala'.
21Nache so Isaías damaxasoxoolec da qailaxachigui aso hiigo da yaqto' qalapaxalec so lque'emaxa so nta'a, nache so nta'a no'oita. 22Huaña nache so Ezequías inat so Isaías, 'eeta':
¿Negue't ca la'anaxat da ishet da saỹaten da mashe ishet da saua'a añi atamnaxaqui maye lalamaqte Ñim Nataxala'?
