Ñim Nataxala' do'ogoxona so Ciro
1Ñim Nataxala' ỹaneuo co'ollaxa so Ciro da yaqto' nta'a,
nache ỹacoota'a na aloiguishec lhuaq da yaqto' ilo'ogue
naqa'en 'enauac nam ỹotta'a't shiỹaxauapi,
qataq nlaxaañi da lo'onataxanaxac na nta'alpi.
Ñim Nataxala' ỹo'ot da so Ciro ỹauatoigui nam lasompi
na huaqta'a't nỹecpi maye ỹotta'a't naua nañalo,
nache qaica ca ishet da ỹapogui.
Qaq nagui nache 'enapega, 'eeta':
2Aỹem sa'auta'ague qome da 'aỹa'ague,
nache samaxañi qome ana qasoxonaxapi nache nalochiguiñi ñaqa'en,
qataq sacagaxat na lasompi maye no'onataxat na bronce,
qataq sacagaxachigui na lshetaxatpi lcat na lasompi.
3Aỹem 'am sanem qome na nogoxoshetpi maye qoỹoxottañi,
qataq dam nsallaxa maye qaỹachetaña cam saqcha'a naỹamaqtaxanaqa',
qaq yaqto' 'auaỹaten da nachaỹem maye Aỹem Nataxala',
maye Natamnaxala' na Israel le'ecpi maye so'ot da 'are'enaxat.
4Qaq souaxat da ỹauoche so ỹamaxashec Jacob,
qataq na nhuo' Israel le'ecpi maye lleca'aguishecpi,
nache 'am seỹaxana co'ollaxa ñasaxauec da 'are'enaxat,
nache 'am sami' dam huo'o da llo'oxoyec 'aro'onataxanaxac
maye 'am hueto'ot nagui,
na'aictaxa co'ollaxa da saishet da aỹem 'auauatton.
5Aỹem nachaỹem Nataxala', qaica ca lỹa, qaica ca lỹa atamnaxala'.
'Am seqataxanai' co'ollaxa da yaqto' ishet da 'auloqui,
na'aictaxa co'ollaxa da saishet da aỹem 'auauatton,
6yaqto' 'enauac nam hueta'ague da nala' lliguisheguem
qataq da nala' lliguiñi, ỹaỹaten da qaica ca lỹa atamnaxala'.
Aỹem nachaỹem Nataxala' qaica ca lỹa.
7Aỹem so'ot co'ollaxa na yo'oqchiguiñi qataq na napalaxa,
qataq so'ot dam ỹaỹamaqchiguiñi qataq dam qauem.
Aỹem Nataxala' Aỹem maye so'ot 'enauac namayepi.
Dam lta'araic la'añaxac Ñim Lo'onatac 'Enauacna
8Aỹem chegoqtot qome ñaqa'en na pa'asheguem
da ñamaq da ỹauegaxanaxac,
'eeta'am na 'aỹa maye chegoqo'ot na piguem,
qataq na auot maye chegaqaigui na lo'oc na piguem, da talec ana 'alhua;
qaq dam alaỹaxac qalaq chegoqchigui qome da nca'alaxa,
qataq dam nalochiguiñi lataxac.
9Aca naco'oña 'alhua qalaq 'eeta'am camachaqaca lỹa,
da saishet da ncotaỹapegue' cam ỹo'ot co'ollaxa acamaye.
Qataq ca nshaxa saishet da 'enapega cam ỹo'ottac camaye da, 'eeta':
«Negue't nam 'auo'ottac?»
qataq cam mashe ime no'onatac saishet da
'enapega cam ỹo'ot camaye da, 'eeta':
«'am sa 'auaỹaten da 'aro'onataxanaxac.»
10Qataq nataqa'en cam ñalec saishet da nlaxalo caua lta'al,
da ta'ainco' da nviraxatra'a co'ollaxa ana 'alhua.
11Ñim Nataxala', maye Qui'itta Natamnaxala' na Israel le'ecpi,
ñim ỹo'ot co'ollaxa namayepi, 'eeta':
¿Ishet peta'a da aỹem qaunacheeto'ot
ca 'eetec da taỹa'ague nam ỹalaqpi,
huo'otaq da Aỹem qauapaxaguiñic ca sheetec da so'ot nam ỹo'onatacpi?.
12Aỹem so'ot co'ollaxa ana 'alhua qataq
nam shiỹaxauapi maye netalec anamaye,
qataq sauota'a na ihuaq da selagaxaañi na piguem,
qataq yo'oq ñaqa'en ana huaqaañipi.
13Aỹem so'ot da yo'oq so Ciro da yaqto' dauegaxan,
qataq so'ot qome da saqalaq 'enauac nam llecpi,
Qaq somaye nacheso qome so qaltaq no'oxoosheguem
yem ỹalamaxat huaqta'a't nỹecpi,
qataq huesoueeguesop naqa'en da ñecoñetaguec
na ncoñeteguishecpi maye ỹalamaxatpi,
qalaq saishet qome da iỹaxanaique aca lasheue huo'otaq da qaỹauo'o ca nme.
Qaq 'era da la'aqtac Ñim Nataxala' maye Qaica ca Ỹaqalanapec.
14Ñim Nataxala' 'enapega so Israel, 'eeta':
«Na shiỹaxauapi maye netalec na no'onaxapi ye Egipto
qataq na nmenaxaicpi ye Etiopía
qataq na shiỹaxauapi ye Sabá maye logoraicpi,
'am nañanot qome, nache namayepi 'arlatacpi qome,
qataq 'am ca'attaueegue qome netagui na ncoñetaxanaxat lcat,
qataq 'am ỹa'aroto naua l-llectel nache 'am nachoxonnot, 'eeta':
‹Ỹoqta 'eesa da Ñim Lo'onatac 'Enauacna qami' hueta'agueta,
qataq ỹoqta 'eesa da qaica ca lỹa atamnaxala'.›»
15Qaq 'Am Atamnaxala', ỹoqta 'eesa da 'am saqcha'a,
'Am Atamnaxala' maye 'am lca'alaxaqui na Israel le'ecpi.
16'Enauac nam ỹo'ottac na ne'enaqtacpi atamnaxala'pi,
huo'o qome da la'aloxo qataq qaica ca la'amaqchec, qataq qane'eetapigui.
17Qalaxaye Ñim Nataxala' nca'alaxatec qome na Israel le'ecpi,
irolec da chochaq tatec lca'alaqtaxanaxac,
qaq nache saishet qome da ỹe'eguelaxa da huetaigui da la'aloxo,
qataq da qaica ca la'amaqchec.
18Ñim lo'onatac na piguem, Ñim Atamnaxala' qataq Nataxala'.
Ñim ỹo'ot co'ollaxa ana 'alhua qataq ỹo'ot da lataxac,
qataq ỹo'ot da sareraỹai' anamaye,
ñim ỹo'ot co'ollaxa qalaxaye saishet da huotaique da qui'ittelec,
nacherata da huo'o cam netalec anamaye, 'eeta':
«Aỹem nachaỹem Nataxala', qaica ca lỹa.
19Aỹem saishet da ñeqañoxottañi co'ollaq setaqa,
huo'otaq da sootaigui ca napalaxa ana 'alhua.
Saishet co'ollaxa da shenapega nam chegoxoguetpi so Jacob, da sheeta':
‹Qanmiche cam qaica ca hueta'a da Aỹem qanmichiỹaique.
Aỹem Nataxala', aỹem sa'axat cam 'eesa,
qataq ñasaxauec cam ỹaỹamaqchiguiñi lataxac.›»
Ñim Nataxala' dataỹa'aguet nam ne'enaqtac atamnaxala'pi
20Qalapoñiỹa't qome, nache qauanaqui,
qanquiquiiuo 'enauac qami' lca'alaxaicpi nam ỹotta'a't nhuo' le'ecpi.
Ỹataqta qaica ca laỹaanataxanaxac nam qaica'attaueeguepi
naxa da ỹachetac na ne'enaqtacpi qo'oipaq,
qataq natameetacot nam atamnaxala'pi maye saishet da deca'alaqtaxan.
21Ña qaua'aqtaxañi qataq qauachaxañi cam ỹo'ot da 'eesa de'era,
qana'aqtaxañiỹa't ñi 'oonolec na'aqtaxane' ca lỹa.
¿Negue't ca ỹa'axatta'a co'ollaxa de'era?
qataq ¿Negue't cam ỹa'axatta'aguet co'ollaxa de'era soua hua'au' vi'iye?
¿Saisheto' da nachaỹem, Aỹem Nataxala'?
Qaq qaica ca lỹa Atamnaxala', maye huegaxanaxaic
qataq ca'alaqtaxanaxaic.
22«Ñaq Aỹem qauamachiỹo'ot nache qanca'alleeuec,
'enauac qami' maye qoviita'alo naua loga'te ana 'alhua,
cha'aye aỹem, nachaỹem Atamnaxala', qaq qaica ca lỹa.
23Aỹem, maiche aỹem san da ỹa'aqtac,
sachaxanapec co'ollaxa da ỹauegaxanaxac,
qaq de'era sachaxanapec ipacchigui qome,
qaq 'enauac qome nam shiỹaxauapi da aỹem ỹa'aroto naua l-llectel,
qataq Aỹem ỹanot qome da la'aqtac
24nache, 'eeta': ‹Nacheñita Ñim Nataxala'
hueto'ot da nauegaxanaxac qataq da na'añaxac.
Qaq 'enauac nam Aỹem nquiỹatega, qane'eetapigui qome.
25Qaq chegoqchigui Aỹem da 'enauac na nhuo' Israel le'ecpi,
da dauegaxan qome, nache huo'o qome da na'amqaanaxac souaxat Aỹem.›»
