Ye Babilonia noxonec
1Ña 'aunotec 'am qa'añole Babilonia, maye saxanaqca ca 'arhua,
nache 'anso'ongui na namoxoỹaxa,
ña 'aunoteeguesop añi 'anso'onaxaqui 'am qa'añole Caldea,
nache 'anso'onangui na 'alhua,
cha'aye saishet qome da qaltaq qaỹe'eguelaxa
da 'am qaỹamata'ac da 'am nogotole qataq da 'am 'onaxaale.
2'Auacona ca coma' maye namaicnaxanaxat
nache 'auamaiquen ca 'ayiiña,
qataq 'anqat na lapoxot na 'arqaic qataq 'aunaasheguem ana 'arpoto,
qataq 'auauaaleguete naua 'archel,
nache 'auapetañi da 'aua'axasoxongui na talapi,
3yaqto' qaimeten da 'aro'ocỹaxac maye huetauec,
aja', ỹataqta imauec qome da qaỹauaachigui
da 'aro'ocỹaxac qom qouetauec,
cha'aye Aỹem sepalaique ivi', nache qaica ca sechoxoreetac.
4Ñim Qarca'alaxaqui, Ñim Qui'itta Natamnaxala' na Israel le'ecpi,
ñim le'enaxat Nataxala' maye Qaica ca Ỹaqalanapec, 'eeta':
5'Anso'ooñi nache 'añe'emaxat 'am llale na caldeopi,
'aigui na napalaxa,
cha'aye saishet qome da qaltaq 'am qaỹamata'ac
'am late'e na ỹotta'a't shiỹaxauapi.
6Aỹem co'ollaq salemataỹa nam ỹalamaxat nhuo' le'ecpi,
nache saneguet namayepi da saqaỹaỹamaxatapec,
qataq saneguet da 'ara'añaxac.
Qaq 'am saishet da 'auchoxoreetac co'ollaxa namayepi,
na ỹa'axaiquipi maye nataxala'pi qalaq 'auachelec
co'ollaxa nam qapa'atta lla'ac.
7Qataq qonapec co'ollaxa: «Aỹem nache 'eetai' qome da aỹem nate'e»,
qaq saishet da 'auennataxaalec co'ollaxa de'era,
qataq saishet da 'auennata'a ca 'eetec cam loga't damaye.
8Qaq ña 'ana'axaỹaxana nagui de'era,
'am 'alo maye 'arqopitaxat da nyacỹaxac
qataq 'avi'imaqtac da 'anso'ootangui añi 'anso'onaxaqui,
ye pa'auo 'arhuennataxac qalaq, 'eeta':
«Aỹem nachaqaỹemta nache qaca aca lỹa sheeta'am,
qaq saishet qome da sevira da aỹem pa'ai, qataq saishet da saqca ca ỹalec.»
9Qalaxaye nque'elaxatta da huaigui ca 'oonolec na'a'q
da 'am nvita qome ca qauem,
nache 'am pa'ai qome qataq qaica ca 'aỹa'alaqpi,
na'aictaxa nam qalota 'araconaxanaxacpi
qataq nam saqaivi da qanaloqten 'aye'eyaqnataxanaxacpi.
10'Am qaica ca 'andaqtaique da 'auo'ottac da qauem,
qataq qoneta' naxa: «Qaica ca aỹem ilotagui.»
Dam 'araỹaanec qataq nam 'arauattonaxanaxacpi 'am ỹatenachet.
Qaq dam pa'auo 'arhuennataxac, 'eeta':
«Aỹem nachaqaỹemta nache qaica ca lỹa.»
11Qalaxaye anac qome ca qauem da 'am talec,
nache saishet qome da 'ampaxateguet da 'aurolec da 'ano'onataxac,
'am talec qome ca ỹataqa qauem, maye saishet da 'analo'oguet,
qataq 'am talec cam qauem maye saishet da 'apettega da 'am talec,
camaye nque'elaxatta qome da 'am talec.
12Qaq nache qoqueto'ot qome da 'aye'eyaqnataxanaxac
qataq dam 'araconaxanaxac maye 'anapaxagueetega
co'ollaq ñaq 'am qa'añole,
shapegueto' da huo'o ca naigui, qataq shapegueto'
da 'auañoxot na shiỹaxauapi da 'am ñi'iỹa.
13'Am, qalota co'ollaxa na 'am detaqtaua'a,
nache ivitta'a da 'anasamiisop.
¡Qaq ña nachaateuo 'anqa'en da yaqto' 'am mpaxaalec
nam ỹaỹaten da lataxac ana huaqaañipi,
qataq nam ishet da huo'o ca ỹa'axata'a da ilo'ot ana huaqaañipi,
qataq nam 'am da'aqtaxaateguem naxa ima'ape
naua ca'agoxoiqa da ỹa'axata'a cam ñaq natauo!
14Qalaxaye ñaq 'aumeten, namayepi 'eeta'am
ca 'auaqpi deqaqta da ỹavigaxat ca norec,
qataq saishet da nca'aleeguesop na le'eraxa ca norec.
Cha'aye que'eca norec saishet qome da choche poqo,
da yaqto' qaỹatatangui da qantootapigui.
15Qaq 'era da 'eetec qome nam shiỹaxauapi maye 'iyaxaic lo'opi,
nam qalota naxa da 'ana'aqtaxaategue' dam
chegoqta'ague da 'anachaalataxac,
ñi 'oonolec namayepi maiche ỹo'ot qome ca llecỹaxac,
qaq nache qaica qome ca 'am nca'alaxatec.
