Da tatec lauotaxanaqtaic Ñim Lo'onatac 'Enauacna
1Ñaq 'aua'alaq qome souaxat da 'auamachiguiñi
'am 'alo maye sa 'auco'o qataq qaica ca 'aỹa'alaqpi,
ñaq 'ana'axannec da 'auo'onaxan souaxat da 'antonaxac,
'am maye sa ỹauanega da huo'o ca 'aỹa'alec,
cha'aye Ñim Nataxala', 'eeta':
«Aca 'alo maye qaỹalat, acamaye qalota qome ca llalaqpi,
saq 'ena'am aca 'alo maye huo'o ca lhua.»
2'Alcagaxaañi qome ca 'arpe'l,
qataq saishet da 'añe'etac da 'anquigaxatec
na 'arapoxonaxatpi ca 'arpe'l maye qonetaigui,
qataq 'analogaxa't naua lque'ete
qataq ỹataqta 'auaỹamaxatchiguiñi da 'autoqooñi ana lashepi,
3cha'aye na pa'aigue na 'oiguishec 'arhuaq
qataq na 'ane'emaq nquictauec qome,
nam 'am chegoxoguetpi loxonec qome na qalota ỹotta'a't shiỹaxauapi,
nache naigui qome na huaqta'a't nỹecpi maye toolec nagui.
4Qaq saishet da 'añi'i cha'aye saishet qome da 'am qaỹe'eetac
saishet qome da 'am qaisheueetac qataq saishet da huo'o ca 'ancoqtaique.
Nacherata da 'acoua'ai da 'arcoxo maye huaigui so 'annogotshec
qataq saishet da 'auennatega da 'ane'enaguec co'ollaq 'am pa'ai.
5Cha'aye Ñim 'am lo'onata co'ollaxa ñimaye ỹauo'o 'am lhua.
Qaq da le'enaxat 'eeta', Nataxala' maye Qaica ca Ỹaqalanapec,
Ñim 'arca'alaxaqui nacheñi Ñim Qui'itta Natamnaxala' na Israel le'ecpi,
nacheñi Ñim Lo'onata 'enauac ana 'alhua.
6'Am qoneta'am co'ollaxa aca nhua maye ñaq qa'añole
maye qaỹalat nache huo'o da laquicoxo qalaxaye Ñim 'Anatamnaxala'
qaltaq ỹe'eguelaxalec da 'am iỹaxana nache 'eeta':
7«Qaq sa qaỹauec so huaigui da 'am salat,
qalaxaye souaxat da lta'araic ỹauotaxanaqtaic 'am,
nache qaltaq 'am she'eguelaxaguet.
8Qaq souaxat da salemata,
nache cara'ac da 'am ñeqañoxocheesop,
qalaxaye souaxat da chochaq tatec ỹauotaxanaqtaic 'am,
nache 'am sechoxoren.»
Qaq 'era da la'aqtac Ñim Nataxala' maye 'arca'alaxaqui.
9«Qaq 'eeta'am co'ollaq sanem da ỹa'aqtac so Noé,
da saishet da ỹe'eguelaxa da ipaxaalec na 'alhua ca auot lta'araic,
qaq nache 'eetec nagui da san ỹa'aqtac da saishet
da qaltaq she'eguelaxalec da 'am salemataỹa
qataq saishet da she'eguelaxalec da 'am sareetalec.
10Qaq na'aictaxa da ca'aisalo naua hueta'alo ana qasoxonaxapi,
qataq da cholaxan ana lcomaraxalatepi,
qalaxaye da ỹauotaxanaqtaic da qoneta saishet da nquic,
qataq da ñaỹamaxataxac maye ỹo'ot da nlagaxayec,
saishet qome da nlaguiñi.»
Qaq 'era da la'aqtac Ñim Nataxala' maye 'am ichoxoren.
Ca dalaxaic Jerusalén
11¡'Am huaqta'a't nỹecpi maye 'auaquicotac
maye 'am iuaxan co'ollaxa so la'at lta'araic,
qaq qaica co'ollaxa ca 'am ỹa'añaqchet!
Qalaxaye aỹem sauota'a qome na no'on coma' da 'am ño'oxoosheguem,
qataq so'ot ca 'aro'oxonaxala' sauota'a na coma' zafiro,
12qataq sauota'a lo'oxonaxat na coma' rubíes ana 'aralloxolatepi,
qataq sauota'a na coma' berilo na 'anasompi,
qataq lo'oxonaxat ñaqa'en na ỹataqta no'on coma' ca 'arpaqtaxanaxatpi.
13Qaq Aỹem sapaxaguen qome 'enauac ca 'aỹa'alaqpi,
nache 'enauac qome camayepi da huo'o da lamaicỹaxac.
14Da nalochiguiñi lataxac, nachera qome da ỹo'ot da 'ara'añaxac,
qaq huaña nache imeuo qome da 'am qaipataqta'a't qataq da 'ayi'iỹaxa,
qataq da lchec saishet qome da qaltaq 'am sa ỹalemaxat.
15Da huo'o ca 'am iloquiaxan, qalaq saishet da
nachaỹem da huo'omshe 'am iloquiaxan,
qaq cam 'am iloquiaxan qalaq 'oxonec qome.
16«Ñaq 'aumeten, da aỹem so'ot co'ollaxa nam ỹo'ottac na lcat,
do'onataxana ñaqa'en na le'eraxa ana poqo
da ỹo'ot nam ỹotta'a't no'ogoxonaxatpi,
qaq nataqa'en so'ot som ỹale maye laqtaxanaxaic
da yaqto' nlaxaañi nam huo'o,
17qalaxaye qaica co'ollaxa ca ỹo'ot ca no'ogoxonaxat
maye ishet da 'am ilaxachigui.
Qaq 'am 'auo'otec qome da chochaq ñe'emaxat
nam 'eetega huo'o ca 'arasouaxashet.
Qaq 'era da sanem, nam Aỹem ỹo'oxoreetac,
dam lca'alaxa namayepi aỹem chegoqo'ot qome.»
Qaq 'era da la'aqtac Ñim Nataxala'.
