1¿Negue't qome ca ỹa'amaqten da qara'aqtaxanaxac?
Qataq Ñim Nataxala' ¿negue't cam ỹachaxana dam la'añaxac?
2Ñim Nataxala' maiche lhuennataxa co'ollaxa da ñim lamaxashec
'eeta'am da lañaxataxac aca nañiguishe da saxanaxa da da'añi
maye naua lpa'aye taiguilo cam deqaqta 'alhua.
Nache qaica ca lyac qataq ca llo'oxoyec,
da lataxac qalaq saishet da qaiqopittaua'a,
3na ỹalleppi qalaq ỹo'otan co'ollaxa qataq sa ỹaconeguet.
Ỹale maye nlaqchigui da nqui'ic,
qataq nala'aguet da nque'eenaxac.
Qataq 'eeta'am ca sa iuen da qailotagui,
nache 'enauac qomi' da so'otanaq qataq saishet da sauotaxac.
4Qalaxaye somaye ỹache co'ollaxa nam qaralolaxapi,
qataq nque'etaxangui nam qanqui'ic taxa.
Nache qomi' sepetaqtega da Ñim Lo'onatac 'Enauacna,
ique'emaqchet somaye qataq ỹauo'o da nhuaxanaguec
qataq qaica ca 'enec naqa'en.
5Qalaxaye somaye qaique'emaqchet co'ollaxa souaxat da sa salaxasoq,
qataq qailaxatta souaxat na qarasouaxashetpi,
qalaxaye da nhuaxanaguec maye nque'etaxangui co'ollaxa
qomi' ỹanema da nlagaxayec,
qataq na lque'emaxapi co'ollaxa somaye ỹo'ot da qomi' no'oite'.
6'Enauac da shenaqta seqataq co'ollaxa shenaqta'am aca qagueta,
nache ñi 'oonolec da shenaqta quetague' ca maiche nqa'aic,
qalaxaye Ñim Nataxala' ỹache naqa'en som lamaxashec
'enauac na qarasouaxashetpi.
7Qataq saq qaiyacnapec qataq qaica ca la'amaqchec qanqa'en co'ollaxa,
qalaxaye somaye saishet da ỹauachigui na alap
'eeta'am aca qagueta da qaỹauectauga ca nalaataqa',
qataq ỹe'emaqtom, saishet da ỹauachigui na alap
'eeta'am aca qagueta da qanpetectac.
8Co'ollaq qaỹaconeua'a qalaq ỹataqta saqairen qataq qaica co'ollaxa ca iueelec,
qataq qaica ca qochetega somaye.
Qataq qanqateeguesop ana 'alhua,
nache qaỹalauat souaxat na lasouaxashetpi
na ỹalamaxat nhuo' le'ecpi.
9Qataq qaỹachaua'a na laỹe na qauemaicpi co'ollaq qailareñi,
qataq ỹalectaigui na 'etaxaloxoicpi co'ollaq qailareñi,
na'aictaxa da somaye sa nauane' da ỹo'ot ca qauem,
qataq saishet da nauoigui na alap ca latenataxanaxac.
10Cha'aye Ñim Nataxala' maiche lhuennataxac da ỹaneguet da nque'eenaxac somaye.
Qaq somaye ye nañaalec na nasouaxashetpi,
nache ỹataqta qaỹoqtec da nachaalataxac
qaq ivira'a da ỹalectaigui na llalaqpi,
qataq chegoqchigui somaye da ỹaỹamaqchiguiñi
nam lapaxañipi Ñim Nataxala'.
11Qaq qom ivirec ca lta'araic nque'eenaxac,
nache ila'a ca yo'oqchiguiñi,
huaña nache somaye ỹataqta machiguiñi da ỹaỹaten,
qaq se'eso no'on da lataxac maye lamaxashec Ñim Nataxala'
qalota qome na isouec cha'aye ỹache qome na lasouaxashetpi namayepi.
12Qaq ỹoqo'oye Ñim Lo'onatac 'Enauacna
ỹanem da ỹalectaigui na 'amaqtaqaicpi
qataq ỹalectaigui na 'añaxaicpi da dauegaxan,
cha'aye nañaneguet co'ollaxa da nleuaxa
qataq da ỹalectaigui qanqa'en na qauemaicpi,
qamaq somaye ỹache na lasouaxashetpi na qalota shiỹaxauapi
qataq detaqteguelec nam 'etaxaloxoicpi.
