Isaías 59

₁Da la'añaxac Ñim Nataxala' saishet da vi'iiguet

da 'eco' saishet da deca'alaqtaxan,

qataq Ñimaye saishet da sa hua'aqa da 'eco' saishet da huo'o ca hua'axaỹa.

₂Qalaxaye nam qauem maye qauo'ocheetac,

nachena nam 'eeta'am ca npaqtaxanaxat

maye mpaxat da qana'ayeetaua'a Ñim Lo'onatac 'Enauacna,

nam qarasouaxashichi nachena nam ỹo'ot da ỹapogui na lashec Ñimaye

qataq da saishet da qami' hua'axaỹalo.

₃Qami', naua qarhuaxayilli' qalaq huagui na ntago'q,

qataq naua qaya'axaatalli' qalaq huagui na ltago'q na qaralaataqui,

naua qa'apilli' qalaq nauoiguilo na natenataxanaxacpi,

ñi qarachaxachi qalaq nda'a't na qauem huetalec.

₄Qaica ca ỹa'axateuo cam 'eesa,

qataq qaica ca no'on da lataxac nam nmit na nasouaxashetpi,

nda'a't da pe'etega da natenataxanaxac qataq naua

na'aqtaqa maye saq 'eesora,

namayepi nlaqchigui na qauem, qataq deco'oic da nalaataxanaxac.

₅Qataq nqapaxaalec na na'araxanaq lco'oue'

qataq ỹo'oxootac nam lo'oxonec ana palachiyaxa,

qaq cam chec qome ne'ena 'araxanaq lco'oue'pi nache ileu,

qataq da huo'o ca ilaxachigui na na'araxanaq lco'oue'pi

nache nnoxonec na 'araxanaq llalaqpi maye huo'o na lshenataxanaxa.

₆Qaq nam palachiyaxa lo'oxonec saishet

da qaỹo'oxonaxana da qaỹo'ot ca nogoxot,

qaica ca ishet da ỹaañi nam lo'oxonec namayepi.

Nam ỹo'ottacpi namayepi qalaq nda'a't da nalaataxanaxac,

nam lo'onatac naua lhuaxaye qalaq ỹo'ot da qaica ca qairen,

₇naua lapia'ate qalaq taigueta da nqalgoqtague' na qauem,

qataq nqalgoqtague' da icoldec naua ltago'q cam qaica ca ỹasouaxat.

Naua lhuennataxaco qalaq nda'a't da tatapigui lauel da lalaataxanaxac,

naua lqauaxaqui' da jec qalaq nda'a't da no'onaxatañi

nam ilaxachiguipi qataq nam nlaxaañi.

₈Namayepi saỹauatton so nqa'aic maye huo'o da nlagaxayec,

nam ỹo'ottacpi qalaq qaica ca ỹaỹamaqchiguiñi.

Naua nqa'aico maye quetagueto qalaq namaxaguilo,

qaq cam quetague' namayepi qalaq saishet da ỹanata ca nlagaxayec.

₉Qaq ỹoqo'oye da nca'alaxa qomi' qaỹoqtalo naqa'en,

qataq qaỹoqtaique da qomi' huesochiyiñi,

seuataqtaique co'ollaxa ca ne'eraxa

qalaq nda'a't da qomi' nvitalo na napalaxa,

seuataqtaique co'ollaxa ca yo'oqchiguiñi

qalaq nda'a't da qolaqtaigui na napalaxa.

₁₀Qataq sashelaqtaua'a na lque na nỹecpi shenaqta'am ca sanauaañi,

qataq 'eeta'am da qaicaua naua qara'ai'te,

ỹoqo'oye ye laiñi ye na'a'q qalaq sepogolaxanaqteguiñi,

'eeta'am da qolaqtaigui ye pe,

qataq na'aictaxa da huo'o da qarca'alaxa qalaxaye 'eeta'am da qomi' leuaxaiqa.

₁₁'Enauac da shenaqta da sachotaqtai' shenaqta'am na 'oosopi,

qataq ñeỹenaqtac shenaqta'am na qoto'pi,

seuataqtaique ca nca'alaxa qalaxaye saishet da nvi';

seuataqtaique da qomi' huesochiyiñi qalaxaye damaye qaỹoqtaique.

₁₂Qomi', ỹataqta qalota naxa da 'am senogoqchetaq,

na maiche qarasouaxashetpi nachena na qomi' ỹa'axa't,

qaq nam qarasouaxashetpi qomi' netaiguilo,

qataq saỹaanaqta nam qauempi maye so'otaqtac.

₁₃Qomi' senogoqchetaq qataq satenachetaq Ñim Nataxala',

qataq qolqa'ai Ñim Qanatamnaxala'.

Sa'axataqtac nam saq'en qataq sasalaxasoq,

qataq llapaxasoxoyeñi naua lataxaco da yaqto'

satenachetaq na laỹepi shiỹaxauapi.

₁₄Da nalochiguiñi lataxac qalaq qaỹo'otan,

qataq da ỹaỹamaqchiguiñi nataxac qaỹoqta qanqa'en,

da 'eesa lataxac qalaq saqana'axaỹaxana

da huaña ye nlagaqa', qataq da no'on nataxac saishet da yo'oq.

₁₅Mashe qaica ca huetaña da 'eesa lataxac,

qaq cam ca'ai da qauem qalaq qaicachiỹa cam hueto'ot lalamaxat.

Qaq Ñim Nataxala' ỹataqta saỹaỹamaxaren

co'ollaq ila'a da qaica dam nalochiguiñi lataxac.

₁₆Ñim Nataxala' ỹataqta huo'o da la'aalaxa

co'ollaq ila'a da qaica ca ỹauo'o ca lata' de'era,

nache do'ogoxona da maiche la'añaxac,

qaq huaña nache Ñimaye dauegaxan.

₁₇Huaña nache napogoña da lauegaxanaxac,

'eeta'am naqa'en aca mpaqtaxanaqte,

qataq ỹaañi da nca'alaxa 'eeta'am aca aro'o da ỹanagui na lqaic,

qataq ipalaique lvi' nache ỹaañi damaye 'eeta'am aca npoto,

qataq lpachigui da layeloxo 'eeta'am ca npo'.

₁₈Ñim Nataxala' ỹanem qome ñi 'oonolec cam naigui nam ỹo'ottacpi,

qataq ỹauo'o ca nhuaxanaguec nam mpa'aguenaxauapi.

Qataq nam nquiỹatega Ñimaye, ỹanem qome ca nsheetenaguec,

ivira'a nam shiỹaxauapi maye netalec ana ỹaqauga 'alhuapiolec aso auaxai.

₁₉Qaq 'enauac qome ana 'alhua,

chegoqchiguiña da nala' lliguisheguem,

nache ivira'a da nala' lliguiñi,

da huo'o naq 'enec naqa'en Ñim Nataxala' qom ila'a da la'amaqchec,

cha'aye Ñimaye qom anac qalaq 'eeta'am aso tala da ỹa'auat,

souaxat da ỹasheerelec na la'at maye huo'o da la'añaxac.

₂₀Qaq anac qome da nca'alaxatec ye Sión

qataq 'enauac nam chegoxoguetpi so Jacob,

maye nman souaxat na lasouaxashetpi.

Qaq 'era da la'aqtac Ñim Nataxala'.

₂₁Ñim Nataxala', 'eeta':

«Aỹem so'ot da ñaỹamaxataxac da qami' ñaỹamaxatto,

da ỹa'añaxac qataq nam ỹapaxaguenataxanaxacpi maye qami' sanema,

qami' sachaxanapeguema da saishet qome da qami' ca'aisalo,

qataq cam qami' chegoxogueta, nache damaye qome qaica ca loga't.»