Da le'enaxat so llalec so Isaías
1Ñim Nataxala' aỹem 'enapega 'eeta': «'Auacona qome ca dapaqaic qalotelec, nache ỹataqtegue 'anqa'en da 'erelec camaye da ne'enaxat maye 'eeta': ‹Maher Salal Jasbaz.› 2Qaq ime, nache 'aỹaxana da yaqto' 'am ỹauaachigui so ntaxaỹaxanaxanec Urías qataq so Zacarías, maye llalec so Jeberequías.»
3Qaq co'ollaq qaỹata'ague de'era, nache soue'eguet aso na'aqtaxanaxana maye maiche ihua, nache asomaye hualaxai, qaq co'ollaq deco'o nache ỹale so llalec. Huaña nache Ñim Nataxala' aỹem 'enapega, 'eeta': «'Anagui qome da le'enaxat Maher Salal Jasbaz. 4Cha'aye ye nogotolec qom saxanaxa da ỹaỹaten da 'eeta' ‹taxare› qataq da 'eeta' ‹chera›, nache ye Damasco qataq ye Samaria ỹataqta qanhuotta qome, nache da lsallaxa qaira'a qome ñi nta'a ye Asiria.» 5Qaq Ñim Nataxala', qaltaq aỹem 'enapega, 'eeta':
6«Qaq cha'aye ne'ena shiỹaxauapi
ye ỹataqta ñi'iỹa ñi Resín qataq ñi llalec so Remalías,
nache namayepi sa iyacnapec na 'etaxat maye ỹataqta npottac
da queta da taỹaua'a añi 'etaxat laỹe' Siloé.
7Qaq ỹoqo'oye Ñim Nataxala' ỹataqta sa ỹala'ac qome
da npaxaasheguem naqa'en na 'etaxat so tala Éufrates,
maye nacheñi ñi nta'a ye Asiria
qom anac da nactaigui da lta'araic la'añaxac,
nache 'eeta'am da npaxaasheguem na la'auaxacpi
nache ipaxaalec qome 'enauac yemaye,
8qaq ivira'a ye Judá da ipaxaalec qome,
qataq nquictasheguem ivitta'a da iviro'ot na lqosot.
Qaq nache 'eeta'am qome ca qoỹo da ỹauachiguilo naua laua't,
nache imattalec 'enauac ye 'ana'alhua, 'am Emanuel.»
9Qalapoñiỹa't qami' ỹotta'a't shiỹaxauapi,
maye qami' nlaqchiguilo da qarcolanaqai,
qana'axaỹaxañiỹa qome de'era qami'
maye qauachegoqỹa'a na qaỹoqta 'alhuapi:
na'aictaxa da qauacoñiỹa ca qaro'ogoxonaxache
qalaxaye nache 'ena'am qami' qaiquichoqche't qome,
aja', na'aictaxa da qauacoñiỹa ca qaro'ogoxonaxache
qalaxaye nache 'ena'am qami' qaicolanaqche't qome.
10Da huo'o ca qalapaqaiñi lataxac qalaq saishet da ipaigui,
qataq da qaỹa'añi ca qara'aqtaqui qalaq saishet da qaỹo'ot,
cha'aye Ñim Lo'onatac 'Enauacna qomi' hueta'agueta.
Ñim Lo'onatac 'Enauacna Nacheñi ñim huo'o naq 'enec qanqa'en
11Ñim Nataxala' ỹataqta aỹem ntenaxaalec da aỹem 'enapega, da sevita'aguet da sheegue da llecỹaxac ne'ena shiỹaxauapi, nache aỹem 'enapega, 'eeta': 12«Saishet qome da qauamachiỹa'ac noicnaxanaxac 'enauac nam 'eetega noicnaxanaxac ne'ena shiỹaxauapi. Saishet qome da huo'o da qarcolanqai qataq saishet da qaye'eetega, 'enauac nam ñe'etega namayepi. 13Ñim Nataxala' maye Qaica ca Ỹaqalanapec, nacheñita maye qui'itta qanqa'eñi, qataq nacheñita maye huo'o naq 'enec qanqa'eñi, qataq nacheñi ñi ishet da qayi'iỹai da lviraxac. 14Ñimaye 'eeta'am qome aca qoina da qami' nqovi'n, qataq 'eeta'am ca coma' da qaipogolaxaisop, qataq nacheñi ñim huerañi qome naqa'en soua dos nta'al na Israel, qataq Ñimaye 'eeta'am qome aca qoina da loxonec nam hueta'a ye Jerusalén. 15Nache qalota qome ca pogolaxaañi, huañi qataq ileu, qataq qalota ca loxonec aca qoina, qaq huaña nache netaigui acamaye.»
Da lqataxac so Isaías
16Ỹataqta qauaỹamaxacheetec qome na iqataxacpi
qataq qaỹo'oxochiichiguiñi da ỹapaxaguenataxanaxac.
17Qaq Ñim Nataxala' na'aictaxa
da nqañoxocheesop na lauo' le'ecpi so Jacob,
qalaxaye aỹem sa'amaqteetac Ñimaye,
qataq sacheto'ot da ñaquitaxac.
18Aỹem qataq na ỹalaqpi maye aỹem ỹanem Ñim Nataxala',
qomi' la'anaqa'ate dam sa qaỹauanapega ne'ena Israel,
dam chegoqo'ot Ñim Nataxala' maye Qaica ca Ỹaqalanapec
maye netasheguema añi qasoxonaxa Sión.
19Qaq na shiỹaxauapi yo'oqta da qami' 'enapegalo qome, 'eeta':
Ña qaunache na lqui'ipi na leuaxaicpi,
qataq na ilaviigui ca lỹa
maye nsoxootega't naxa da na'aqtaxaatega't.
¿Peta'a saisheto' da iuen na nhuo' le'ecpi
da inat nam natamnaxala'pi, qataq da inat na leuaxaicpi
da denataxaalec na ña nca'altauecpi,
20da yaqto' ỹaconeguet ca napaxaguenataxanaxac huo'otaq ca na'aqtac?
Qaq 'era qome da la'aqtac namayepi
qalaxaye de'era la'aqtac namayepi choche 'oopashec.
21Na shiỹaxauapi qalaq tateguelo qome,
qaica ca nyacnataguec qataq ỹaguec na lqouaxa,
qaq souaxat na lqouaxa nache qaica ca iren
qataq ỹasaxalec ca qauem la'aqtac ca lta'a
qataq ca natamnaxala'pi, nache ilo'ot na piguem,
22qataq ilolec qome ana 'alhua
qalaq nda'a't da nachoxoyec qataq ca napalaxa da ilota'a,
nache imauec qome da huetaigui ca napalaxa.
