Isaías 9

₂Nam shiỹaxauapi maye huetaigui co'ollaxa na napalaxa,

ila'a so lta'araic ne'eraxa, qaq se'eso ne'eraxa,

icoỹarelec co'ollaxa nam huetaigui na napalaxa.

₃'Am Nataxala', 'anache co'ollaxa da lta'araic namaicỹaxac,

qataq da ỹataqta lta'araic tonaxac.

Nache 'enauac na shiỹaxauapi machiguiñi da 'Am nachatto'ot,

'eeta'am da ivita da qanqat ca ala ca nañiguishec

qataq 'eeta'am da qantootalec da qancolaxachigui ca nhuotaxanaxatpi.

₄Cha'aye 'Am 'anqateeguesop da nlataguec

maye ipataqtañi co'ollaxa na nhuo' le'ecpi,

qataq da ncogaxanataguec maye ỹo'ot da laquicoxo,

qataq da namaxasaguec maye sa ndaxaasheguem,

'eeta'am da 'eetec co'ollaq 'aulaxachigui ye Madián.

₅Qaq na pela'pi maye nalaataxaquipi na alleppi,

qataq na nogoxot maye huagui na ntago'q,

namayepi qaỹavigaxat qome nache nlachiguiñi souaxat ca norec.

₆Cha'aye ñiguiñi qome ca nogotolec,

Ñim Lo'onatac 'Enauacna qomi' ỹanema ca 'oonolec llalec,

qaq camaye qoỹanagui qome da la'añaxac da nta'a,

qataq qoỹanagui qome ne'enaua ne'enaqa'ate:

Qaỹa'aalaque naua lqataxaco, Lo'onatac 'Enauacna maye 'añaxaic,

Nta'a maye chochaq tatec, qataq Chegoqchigui da nlagaxayec.

₇Camaye nso'ongui qome añi nso'onaxaqui so David,

huaña nache nquictauec da la'añaxac

ivitta'a da ilo'ogue 'enauac ana 'alhua,

nache saishet qome da imeuo da nlagaxayec,

qataq da lo'onataxanaxac ỹataqta na'atchiguiñi qome,

cha'aye na'attalec da no'on qataq nalochiguiñi lataxac,

qaq nache chegoqchiguiña nagui nache chochaq tatec qome.

Qaq 'era da ỹo'ot qome Ñim Nataxala' maye Qaica ca Ỹaqalanapec

souaxat da lta'araic lauotaxanaqtaic.

₈Ñim Nataxala' ỹamaxa so la'aqtac da dataỹa'aguet na Israel le'ecpi,

nam nhuo' le'ecpi maye chegoxoguet so Jacob.

₉Qaq de'era ỹaỹaten qome 'enauac ye nhuo' le'ecpi

maye chegoxoguet so Efraín maye hueta'a ye Samaria,

yem huo'o naxa da ño'oxonnaxac

qataq da na'amqaanaxac da detaqtac,

₁₀nache 'eeta': «Yem losocpi mashe naañi

qalaxaye qomi' qaltaq ño'oxonaxasheguem qome

sauoqta'a ca coma' nchiiguishec.

Qataq mashe qaichec so nllecnaxanaxatpi

maye chegaqaigui ana sicómoro,

qalaxaye nmeneguet qome ñaqa'enaq na cedro».

₁₁Ñim Nataxala' namaq so ỹataqta qauemaic pa'aguenaxauapi,

qaq nacheñi Ñimaye da ỹamaxalec

somayepi da deloquiaxanataxan.

₁₂Qaq chegoqtegue da nala' lliguisheguem so siiriopi,

qataq chegoqtegue da nala' lliguiñi so filisteopi,

nache 'eco' 'oonolec da iuoxonañi so Israel le'ecpi.

Qalaxaye ñaqaiyeta da layeloxo

Ñim Nataxala' saishet da vi'iiguet,

Ñimaye nache queto'ot da darenaxaatac.

₁₃Qalaxaye na nhuo' le'ecpi saishet da ỹe'eguelaqot

Ñim Lo'onatac 'Enauacna, maye ỹo'ot co'ollaxa da nhuaxanaguec,

qataq saishet da nmitaique Ñim Nataxala'

maye Qaica ca Ỹaqalanapec.

₁₄Qaq ỹoqo'oye Ñim Nataxala'

'oonolec na'a'q qome ca huaigui da icheguec na lqaic,

qataq na la'araxashet na Israel le'ecpi

'eeta'am naqa'en ca shiguiỹac,

qataq 'eeta'am ca ichec aca chaic qataq aca na'aate.

₁₅Qaq na lqaic nache naigui na ỹa'axaiquipi qataq na nataxala'pi,

qaq na la'araxashet qalaq nachena na na'aqtaxanaxanecpi

maye dapaxaguenataxaateguec da natenataxanaxac.

₁₆Cha'aye nam lataxala'pi ne'ena nhuo' le'ecpi

nachena na isomaxanaqchet,

qaq nam ca'attague' namayepi nache deqat.

₁₇Qaq ỹoqo'oye Ñim Nataxala'

saishet co'ollaxa da ỹauotec na nsoxoppi,

qataq saishet da ichoxoreetac na saploqpi qataq ana pa'aipi.

Cha'aye imauec ne'ena nhuo' le'ecpi da qauemaicpi,

qataq qauema naua la'aqtaqa 'enauac namayepi.

Qalaxaye ñaqaiyeta da layeloxo Ñim Nataxala' saishet da vi'iiguet,

Ñimaye nache queto'ot da darenaxaatac.

₁₈Cha'aye dam qauem, 'eroigui qome

nache 'eeta'am ca norec da ỹavigaxat

aca ỹaxat qataq ca huouesat, qataq ỹavigaxat aca qo'oipaqpi

maye netaigui ca sansattec aviaq,

nache ca lmala'q ỹataqta la'ana't

da huaỹoxoosheguem 'eeta'am aca daua'ache.

₁₉Qaq souaxat dam layeloxo Ñim Nataxala' maye Qaica ca Ỹaqalanapec,

nache ana 'alhua ỹavic, nache ca norec ỹavigaxat na shiỹaxauapi.

Nache qaica ca ichoxoreetac ca maiche lqaỹa.

₂₀Ñi 'oonolec qalaq chec qome ca pa'ata'ague na aloiguishec lhuaq,

qalaxaye ñaq 'eetalec da huo'o na lqouaxa,

qaq ca lỹa qalaq chec ca pa'ata'ague na ne'emaxashec lhuaq,

qalaxaye ñaq 'eetalec da saishet da icoma'.

Nache ivitta'a da chec ca maiche llalaqpi.

₂₁So Manasés delogui' qome so Efraín,

qaq so Efraín delogui' so Manasés,

ime nache soomaye huaxaỹa't da iloquiaxa'n ye Judá.

Qalaxaye ñaqaiyeta, da layeloxo Ñim Nataxala' saishet da vi'iiguet,

Ñimaye nache queto'ot da darenaxaatac.