¡Da nvitaqtaxanaxac maye qaỹa'axatem na sallaxanecpi!
1Qaq nagui aỹem qana'axaỹaxañiỹa qami' sallaxanecpi: Qanỹeñi, qataq qana'alaqaitapiguiñi, souaxat da qanque'eenaxaqui maye mashe saqaỹaloq da qami' taleguete. 2Da qarsallaqai taỹa'a da nlaguiñi, qataq naua no'oñi qorogolli' qalaq che'c na lalaxat. 3Ana qo'omi maye qalapoñiitac ne'enaua pa'atre'c na'axa'te qalaq decochigui. Qaq de'era nachera da ỹa'axat da huo'o ca qarasouaxashechi que'eca pa'atec na'a'q qom qanmit 'enauacna, qataq nachera da nlaxaañi da qaro'ocỹaxaqui, 'ena'am ca norec.
4Qami' saishet da qaushiichiñi añi lasheue ye 'oonolec ca'agoxoic na qaro'onataxanaxanequi. Qaq Ñim Nataxala' maye qaica ca 'ena'am da la'añaxac hua'aqtega da nqui'ic qataq da lquiquiaxac namayepi. Ana'ana qo'omi maye qarsheetenaxanaqchi ctaxa, nachana ana ỹa'axat da huo'o da qarasouaxashechi qom qauataiỹot Ñim Lo'onatac 'Enauacna.
5Qami' sallaxanecpi maye qoviitaigui da lta'araic lyac, qataq qoviitaigui da lta'araic ño'oxoyec da qoñiitalec ana 'alhua. Qataq qaviyiỹa'a da ỹataqta qami' chaxaraiqa qoñiita'am ca huaca lhuaraic huo'otaq aca huaca, maye mashe lhuotta da qaỹauegueua'a ca nalaataqa'. 6Qami' qauasaqailec ca lasouaxashet ca shiỹaxaua maye qaica ca ỹasouaxat qataq qaualauache nam sa ỹañoxot da qami' dataỹa'agueta.
Da nhualaxavic qataq da na'añaxac
7-8Qalaxaye qami' ỹaqaỹa't, ỹataqta qauauo'oi da qanhualaxaunaxaqui, qataq saishet da leetapigui ye qarvilli, cha'aye mashe saqaỹaloq da nvi' So Cristo maye Qarataxala'. No'on da qaue'enaxache da lataxac na shiỹaxauapi maye netauga na no'onaxa, da ỹataqta huo'o da lhualaxavic da iuattaique ca auot, qataq nataqa'en huo'o da naquitaxac da ana 'alhua ỹami' ca no'on ala ca lañiguishec. 9Saishet qome da huo'o ca quetapeguelec ca lỹa, yaqto' Ñim Lo'onatac 'Enauacna saishet da ỹauo'o ca qanhuaxanaguiiqui, cha'aye Ñimaye nacheñi Ñim qomi' nmi't qataq saqaỹaloq da nvi'.
10-11Qoquiiteleco' qome da lataxac so la'aqtaxanaxanecpi Ñim Lo'onatac 'Enauacna soua qaỹoqteguelo vi'iye maye ỹa'axattac co'ollaq da la'aqtac Ñimaye. Qomi' ỹataqta huo'o da qara'aalaxa souaxat somayepi da ỹataqta huo'o da lhualaxavic, qataq da na'añaxateguet 'enauac nam nque'eenaxacpi. Qataq qami' iuen da qauennachiỹa'a co'ollaxa da 'eetec so Job, qataq da 'eetec co'ollaxa somaye da nala'aguet da nque'eenaxac qataq co'ollaq ime de'era, nache Ñim Lo'onatac 'Enauacna ỹataqta ỹaỹamaxatta somaye. Cha'aye Ñimaye ỹataqta soxoraic qataq ỹauotec nam huo'o da nque'eenaxac.
Na laỹepi nqataxacpi
12Qami' ỹaqaỹarolqa, dam ỹoqta napactelec 'enauac na laỹepi 'eeta': Saisheto' qome da 'an ca 'ara'aqtac da chegoqchigui 'anqa'en da la'añaxac na piguem huo'otaq ana 'alhua, huo'otaq ca lỹa. Nachaqrato' da 'oonolec ca 'ara'aqtac 'anqa'en da 'auasat. Qoneta': «Aja'.» Qaq da sa 'ashet, qaq qoneta': «saishet.» Ten, qom ỹauo'o ca qanhuaxanaguiiqui Ñim Lo'onatac 'Enauacna, da saishet da qaupaquiilec ca qara'aqtaqui.
13Da huo'o ca 'oonolec da qoñiita da daquicotac, nache iuen da nqouagaxaueetac. Qaq da ỹataqta matapiguiñi qalaq iuen da do'onaxaatac, ỹo'oxoreetac Ñim Lo'onatac 'Enauacna. 14Da huo'o ca 'oonolec da qoñiita da sa no'on, qalaq iuen da iỹaxanegue na lataxala'pi na 'amqaanataxanaxaicpi da yaqto' nqouagaxaueelec camaye; nache camayepi da'amnaxana na aceite maye chegaqaigui ana oliiva qataq iỹaxanot Ñim Nataxala' da yaqto' nataren camaye. 15Qaq camayepi da ỹataqta huo'o da lpi'iỹaxac da nqouagaxauen, nache Ñim Lo'onatac 'Enauacna ỹasateguet camayepi, nache nataren cam sa no'on. Qaq da huo'otaq huo'o ca lasouaxashet cam sa no'on, nache nataqa'en ỹapalaxat Ñimaye. 16Qaq ỹoqo'oye ñi 'oonolec da qoñiita da'aqtaxanem ca lỹa ca lasouaxashet, qataq ñi 'oonolec nqouagaxaueetalec ca lỹa, yaqto' Ñim Lo'onatac 'Enauacna qami' natare'n. Da nqouagaxaunaxac ca no'on shiỹaxaua ỹataqta huo'o da la'añaxac, cha'aye Ñim Lo'onatac 'Enauacna ỹataqta hua'axaỹa. 17Saloqnaxana so la'aqtaxanaxanec Ñim Lo'onatac 'Enauacna le'enaxat Elías. Somaye da lataxac ỹataqta 'eeta'ama qomi'; qalaxaye huo'o da lpi'iỹaxac co'ollaq nqouagaxaunot Ñim Lo'onatac 'Enauacna da yaqto' saishet da huo'o ca auot, nache ipacchigui da saishet da huo'o ca auot ana 'alhua, iviraxattre'c soua tres vi'iye, qataq so laiñi so lỹa vi'i. 18Qaq co'ollaq ỹe'eguelaxalec da nqouagaxauen, nache huo'o so auot, huaña nache na nañiguishec ana 'alhua huo'o da alaỹaxac.
19Qami' ỹaqaỹarolqa maye sa'amaqtenaqtac So Cristo, da huo'o ca 'oonolec da qoñiita ca'ai da 'eesa lataxac maye qaỹapaxaguenec, qaq da huo'o ca lỹa da huo'otaq ỹe'eguelaxateua'a da lpi'iỹaxac, 20qaq aỹem sauotaique da qauaỹaañita da ca ỹo'otec ca 'etaxaloxoic da ỹaxaañi da ỹo'ottac na lasouaxashetpi, nache camaye nca'alaxateeguesop da nleuaxa qataq ỹañoxot Ñim Lo'onatac 'Enauacna da ỹapalaxat na qalota lasouaxashetpi camaye.
