Da qanauote' na nqopitaxanaqtaicpi maye huetalecna
1¿Qauaỹachiñi peta'a da huo'omshe huo'o da loquiaxac qataq da cotaxac maye qami' huetaiguilo? ¡Damaye huo'o, cha'aye saishet da qauañoxoche da qanlliỹañi da qarqopitaxanaqtaiqui na qauem! 2Qami' ỹataqta qami' quiỹaxanaqtaqaiqa, qataq qauauoitaique da qami' hueto'oto 'enauac nam qanqopicheetega. Qaq da saishet da qauañoxoche da qami' taỹoto, nache ishet da qauauoitaique da qauloqui qataq qaualaataxañi qataq qauayenaxañi da yaqto' huo'o ca alaataxac. ¡Qalaxaye nache 'ena'am saishet da ishet da qauañoxoche da qauanacheỹa cam qoñiitapeguec!
Qami' saishet da qauañoxoche da qami' taỹoto camaye, cha'aye saishet da qauỹaxañiỹot Ñim Lo'onatac 'Enauacna. 3Qaq da ivita da qauỹaxañiỹaique, qalaq qauem da qarquiquiaxaqui, cha'aye souaxat da qansheetaique da choche taigui qanqa'eñi da qarqopitaxanaqtaiqui. 4Qami' saishet da qauauochec Ñim Lo'onatac 'Enauacna qataq saishet da qaualaqaiguet. Cha'aye ca ỹauotec na huetalec ana 'alhua, nache camaye ỹe'eguelaxa da ipa'agueetac Ñim Lo'onatac 'Enauacna. ¡Qaq damaye nache 'eetec! Da qami' qauauochec na qauem maye huetalec ana 'alhua, nache qavi'eguelaqaỹa da qapa'agueñiitac Ñim Lo'onatac 'Enauacna. 5¿Peta'a sa qaua'amaqchiñiỹo' da nanettalec ana nere maye huetalec na la'aqtacpi Ñim Lo'onatac 'Enauacna da 'eeta': «Ñimaye ỹataqta qomi' lauotaqa'ate»? 6Qaq ỹoqta 'eesa da Ñim Lo'onatac 'Enauacna ỹataqta qomi' ỹauoteque, cha'aye nache 'eetec da nanettalec ana nere maye huetalec na la'aqtacpi Ñimaye maye 'eeta':
«Ñim Lo'onatac 'Enauacna ỹataqta dataỹa'aguet nam na'amqaanaxaicpi,
qalaxaye ỹauo'o ca ntaunaguec nam saishet da na'amaqten.»
7Qaq ỹoqo'oye ỹataqta qaualaqaiguet Ñim Lo'onatac 'Enauacna. Qataq qauataiỹa'aguet so pa'aguenataxanaxaic, nache somaye dataueguesopa qami'. 8Qanquiquiỹot Ñim Lo'onatac 'Enauacna, qaq Ñimaye nataqa'en qami' nquiigueta.
¡Qami' 'etaxaloxoicpi, qaỹa'axañiiñi da qauo'ocheetac na qauem! Qami' maye qauauoitaique da qauauochec Ñim Lo'onatac 'Enauacna, qalaxaye nataqa'en qauauoitaique da qauo'ocheetac na qauem, qami' iuen da qauauo'oi ca qarasataxaqui: da nacheñi Ñim Lo'onatac 'Enauacna da qoquiigue huo'otaq qoquiigue da ñe'etaxaloxo. 9Ỹataqta qauaquicoita qome, qataq qanỹeñi souaxat da qanqui'iqui. Qaỹa'axañiiñi da qaraỹalliguiyiqui, ime, nache qanỹiñiitac, yaqto' Ñim Lo'onatac 'Enauacna ishet da ila'a da ỹoqta 'eesa da qanaralaxache da qarhuennataxaqui. 10Saishet da qana'amaqchiñi da qauataito'ot Ñim Nataxala', qaq Ñimaye ỹauo'o ca qansheetenaguiiqui.
Saishet da qoquiitapeguelec da lataxac na laỹepi shiỹaxauapi
11Qami' ỹaqaỹa't, saishet da qauema naua qara'aqtaqalli' da qautaqaitega na qaraỹepi. Ca qauema naua la'aqtaqa da detaqtega ca lỹa huo'otaq quetapeguelec, nache camaye 'eeta'am da quetapeguelec qataq qauema naua la'aqtaqa da detaqtega nam lamaxasoxonaxacpi Ñim Lo'onatac 'Enauacna. Qami' iuen da qaualaqaiguet nam lamaxasoxonaxacpi Ñim Lo'onatac 'Enauacna qaq saishet da qoquiiteguelec. 12Ñim Lo'onatac 'Enauacna nachaqñita 'oonolec da nmit na nasouaxashetpi. Qataq nacheñi ñi qomi' ỹanema na lamaxasoxonaxacpi qataq nachaqñita ishet da ỹa'axat da qaica ca qarasouaxashet huo'otaq da huo'o ca qarasouaxashet. Qaq ỹoqo'oye qomi' sa seshetaq da qolaqtapeguelec da lataxac na laỹepi shiỹaxauapi.
Saishet da qami' na'amqaanaxaiqa
13Aỹem qana'axaỹaxañiỹa, qami' maye qoñiỹapec naxa da qara'aqtaqui: «Na na'a'q, huo'otaq qoyo'oxoñi, ñeqo'onaxaua'a ye nỹecpi; nache souaqa'a yemaye ivittec ca 'oonolec vi'i, nache sauoqo'o na qarmenec, yaqto' ñauegaq aca late'erai qorom.» 14¿Ta'ainco' da nache 'eetec da qartaxaỹaxaqui ye saq qauaỹaañi ca huaigui ca lỹa na'a'q? Cha'aye da qanachaalataxaqui 'eeta'am na sheue: da cara'acolec huo'o, qaỹata'ague qataq qaica. 15Ỹactectaxa da ỹaỹamaqchiguiñi da qoñiita' da qara'aqtaqui: «Da nachera ỹaỹamaxareeta Ñim Lo'onatac 'Enauacna, nache da ñaq ñeca'alaqtauec, nache so'otaq de'era, huo'otaq de'era lỹa.» 16Qalaxaye qami' qaravilliỹa da ño'oxonnaxaiqa naua qartaxaỹaxacolli', 'eeta'am da qaralamaxache ca ñaq natauo na'a'q, qaq damaye ỹataqta sa ỹaỹamaxañi. 17Da qami' qauaỹachiñi da qauo'oche ca ỹaỹamaqchiguiñi, qalaxaye saishet da qauo'oche, nache qami' huo'o da qarasouaxashechi.
