Jueces 12

₁Qaq co'ollaq mashe qaỹata'ague de'era nache so ỹalleppi maye chegoxoguetpi so Efraín, naỹamaxat co'ollaxa nache taitague da le'ego so tala Jordán, nache taỹa ye Safón. Huaña, nache 'enapega so Jefté, 'eeta':

¿Ta'ainco' ye qomi' sa 'aucoyegue'n da yaqto' 'am setauanaq co'ollaq 'anqo'ona da 'auloquiaxan ye 'amoniitapi? ¡Qaq nagui, nache qouetaigui ñaqa'enaq ñi 'arma' da 'am savigaxataq!

₂Nache so Jefté 'enapeco':

«Na ihuo' le'ecpi qataq aỹem huo'o co'ollaxa so qancotaxac da ñecotaqtague' so amoniitapi. Nache aỹem qami' seỹaxanalo co'ollaxa, qalaxaye qami' saishet da qauanaqui da qomi' qanpaxachiileguete. ₃Qaq co'ollaq sela'a da saishet da qauanaqui da qomi' qautauañi', huaña nache sa seren da ñachaalataxac da selogui' so 'amoniitapi, nache Ñim Nataxala' aỹem ỹanem da ỹoxonec somayepi. Qaq nagui ¿ta'ainco' da qauanaqui da qansheetaique da aỹem qauloquiaxañi?»

₄Qaq huaña nache so Jefté laỹona't 'enauac so ỹalleppi maye lma' ye Galaad, nache delogui' so maiche nhuo' le'ecpi maye chegoxoguetpi so Efraín. Nache so Galaad le'ecpi loxonec so chegoxoguetpi so Efraín souaxat da somayepi 'enapeco':

Qami' Galaad lashe', maye choche qauachegoqỹauec da qoñiỹalec na maiche qana'alhuapi maye lalamaxat nam chegoxoguetpi so Efraín qataq so Manasés. ₅Qaq so Galaad le'ecpi nqo'ona co'ollaxa da nauan som ñeguetapi da qotaitague da le'ego so Jordán maye lalamaxat som chegoxoguetpi so Efraín. Nache naxa som chegoxoguetpi so Efraín maye naneltaxaatac da huotaique da ỹa'axasoxoolec som ñeguetapi, nache somayepi inat, da Efraín le'ec. Qaq da 'enapec saishet, ₆nache qoỹenapega da nasaxauec da 'eeta': «¡Shibolet!», qaq da 'eeta': «Sibolet», nache sa ỹaỹamaxañi da nasaxauec de'era na'aqtac, cha'aye souaxat da sa ỹaỹaten, qaq somayepi nache huaña naqa'en yemaye da ỹalauat. Nache da ima'a't se'eso qaỹalauat, nache ivi' cuarenta y dos mil so Efraín le'ecpi. ₇Qaq so Jefté ivi' co'ollaxa soua seis vi'iye da lataxala' so Israel le'ecpi. Qaq co'ollaq ileu, nache qailareña ye lalamaxat lma' Galaad.

₈Qaq co'ollaq ime da nataxala' so Jefté, nache so Israel le'ecpi datalec so Ibsán, som lma' ye Belén, ₉qaq somaye ivi' treinta so llalaqpi ỹalleppi, qataq treinta aso llalpi 'alpi. Nache 'enauac somayepi da huaroneguet naqa'en som chegaqauecpi. Qaq so Ibsán ivi' soua siete vi'iye da lataxala' so Israel le'ecpi, ₁₀qaq co'ollaq ileu, nache qailareña ye Belén.

₁₁Qaq co'ollaq ime da nataxala' so Ibsán, nache so Israel le'ecpi qaltaq datalec so Elón ivittrec soua diez vi'iye, qaq somaye chegoxoguet so maiche lauo' le'ecpi so Zabulón. ₁₂Qaq co'ollaq ileu somaye, nache qailareña ye Ayalón, ye maiche na'alhua som lauo' le'ecpi somaye.

₁₃Qaq co'ollaq ime da nataxala' so Elón, nache so Israel le'ecpi qaltaq datalec so Abdón, som llalec so Hilel, maye lma' ye Piratón. ₁₄Nache ivi' soua ocho vi'iye da nataxala'. Qaq so Abdón ivi' co'ollaxa cuarenta so llalaqpi, qataq treinta so laualpi, qaq ñi 'oonolec somayepi nnotaxala' naxa na 'ashena. ₁₅Qaq co'ollaq ileu somaye, nache qailareña ye Piratón maye hualec aye qasoxonaxapi ye Amalec maye huaigui ye na'alhua so Efraín.